الحقوني الغيره ذبحتني

السلام عليكم ورحمة الله وبركاته بقلكم قصتي وماخاب من استشار بعد زواج دام عشرين سنه تزوج زوجي عليه وماقدر المصايب الي نزلت عليه قبل زواجه بسنه توفى اخوي وبعد اخوي بسته شهور توفى ولدي الكبير وكان عمره 19 سنه وبعده بشهرين توفت امي وبعد امي بشهرين توفى ابوي وكانت نفسيتي مره دمار وختمها زوجي بزواجه لدرجت اني بغيت انتحر مرتين بس لما قالي خبر زواجه انهرت ورحت عند اخوي وجلست عنده ثلاثه شهور واخذت علاج نفسي والحين الحمد لله قدرت اتاقلم شوي مع الوضع الجديد بعدين جا زوجي عند اخوي يبي يرجعني وجلست معه وناقشته ليشش يتزوج عليه وانا كنت مخلصه معه ووفيه وكان الكل حاسدنا على عشرتنا انا ويها وقالي انه يحبني حيل ومايقدر يعيش من غيري ويقولي والله لو الف العالم ما الاقي مثلك بس لي رغبه في الزواج ولي زاد قهري انها بنت عمه وياما كلينا انا ويها سوى وجلسنا وطلعنى سوى لدرجة اني اشك انها انعرضت عليه ورجعت بيتي عشان عيالي وهوه ماهو مقصر معي في شي بس يعض الاحيان يتصرف تصرفات تقهرني مثل لا زعل منها يجلس متنكد حتى في يومي يقلب البيت نكد ولا يطلعها في يومي وما يغير ملابسه الا عندي عشان اغسل انا بالرغم ان عندها ملابس له حتى الاكل يجي يدور عندي على اي شي ياكله وانا والله ماهو كره في اني اسويله شي والمشكله اني مازلت احبه واحاول ارضيه باي شي بس اهتمامه فيها قاهرني وذبحتني الغيره كل ما احاول اريح نفسي اتعب مره ثانيه شورو عليه اطلعه من حياتي ولا اصبر واتحمل ولا كيف اتعامل معه ياليت اذا فيه اتجارب او حلول تفيدوني وجزاكم االله خير