بسم الله الرحمن الرحيم
السلام عليكم ورحمة الله وبركاته
فديتكم لكم وحشه..
والله عندي وصفات وايد بس اخاف تملوا والا بنزل لكم كل يوم موضوع^^
اليوم يبت لكم كيكة الدريم ويب
صارلي اكثر من سنتين كاتبتها ولا يربتها>>> وبصراحه ندمت
ما شاء الله طعمها يهبل واهم شي السكر طعمه خفييييييف
احسها ادمان مثل كيكة الجبنة
المهم اخليكم مع المقادير والطريقه
المقادير للكيكه:
كوب ونص طحين
كيس دريم ويب
كوب وربع سكر بودرة
ثلاثة ارباع كوب حليب سائل
ثلاثة ارباع كوب زيت
4 بيضات
ذرة ملح
ملعقة صغيرة فانيلا
ملعقتين بكنج باودر
المقادير للمهلبية:
3 فناجين حليب سائل
ملعقة ونص نشا
7 ملاعق حليب بودرة
زيت شوي>>> هو المفروض زبده بس انا ماحب استخدمها
ملعقتين سكر بودرة
الطريقة:
نخلط مقادير الكيكة في الخلاط ما عدا الطحين والبكنج باودر
نضيف الخليط على الطحين والبكنج باودر ونخلطهم زين
نصب الخليط ف صينيه مدهونه وندخلها الفرن
لحد تستوي الكيكة نجهز المهلبيه
نخلط مقادير المهلبية ف قدر بعيد عن النار لحد تتجانس المكونات وتذوب ف بعضها
بعدين نحط القدر ع النار ونستمر بالتحريك لحد يثخن المزيج ونطفي النار ونحطه ع جنب
بعد ما تجهز الكيكه
نحط فوقها المهلبية ونرش سمسم ع حسب الذوق
ندخلها الثلاجه شوي لحد تبرد
وهني بعد ما طلعتها من الثلاجه
ونقطعها وذوقوا احلى طعم^^
روووعه جربوها>>>> دقايق وشفت الصحن فاضي
بالعافيه عليكم
في حفظ الله
...