الله يخليكم ساعدوني مين ملكت او تزوجت بالتقويم

السلاااام عليكم ورحمة الله وبركاته...
و شكرا على المنتدى الرائعو الله وانا احوس بقوقل طلعلي و كأني طحت على كنز على طول سجلت سيدا وجيتكم قلت مافي غيركم راح يساعدني اتمنى تقبلوني بينكم,,>>
انا لقيت موضوع قديم عن تجمع اللي حاطين تقويم بس دورت وما لقيته اتمنى من اللي عنده خبرة بتقويم الاسنان يساعدني..
انا مركبة تقويم ليا شهر ونفسيتي زفت من يوم حطيت التقويم بس بكاء ونواح وقولون وحالة بقولكم ليش واتمنى تساعدوني مالي غير الله ثم انتم ..
بنات داخله على الله ثم عليكم و الله يوفق اللي ترد عليا و اللي عندها خبره ولها فترة بالتقويم لا تبخل علينا محتاجتكم و الله .. ودكتوري كل ما اسئله عن شيء مو عاجبني بالتقويم يجلس يتفلسف على راسي ويقولي هذا كذا التقويم ايش تبغي و الله يحطم اكثر ...
بنات بقولكم سالفتي وساعدوني انا مره تاخرت بالتقويم بس ليا تقريبا 5 سنين او اكثر من ايام كنت بالجامعه ااجل الفكرة واقول السنة الجايه..اسناني كانت واحد من الاسنان الاماميه بس مخرب اللوك ومتقدم شوية يعني يبان لما اضحك و بعد ضروس العقل زادت المشكلة ..فقررت خلاص اروح اركب التقويم كفايه تأخير و توكلت على الله وبديت شغل باسناني وبذي الفترة من النحاسة انخطبت و جو الاهل و صارت الشوفة والحمد لله كله تمام هذا كله وانا لسه ما ركبت التقويم.. بعدها بفترة خلاص قلي الدكتور اخلعي 2 من فوق و2 من تحت عشان عندي بروز و بعدها باسبوع ركبلي القواعد و التقويم وشده ليا بس احس خفيف ما حسيت بالام اللي يقولوا انه قوي ..كلهم قالولي اتوكلي على الله خلاص وركبيه ايش فرقت ذحين ولا بعد الزواج كله واحد وامكن مطولين للسنة الجايه وانا كنت عمله حسابي ومتفقه مع الدكتور اشيله يوم زواجي وارجعه بعدين لان المدة سنة ونصف قالي عادي .وكنت متطمنة انو الزواج حيكون بالعطلة الصيفية يعني لسه في وقت تقريبا سنة ..المهم ذحين اتفاجات انو مستعجل وخلاص حجز القصر قبل العطلة ويبغى يملك الاخ الشهر الجاي.انا عيوني صارت كذاااااا ايييش ... انتو متخيلين توى خالعة مو اي اضراس الضواااحك يعني فشلة بقوه ولسه ما ترتبت الاسنان على الاقل كيف راح املك واضحك وشكلي كذاا.. فكرت اشيل التقويم بكبره واعمل تركيبات اسنان مكان المخلوعة وخلاص ما ابغى التقويم بكبره بس كلهم بالبيت يهاوشوني يقولولي خسارة تشيليه عادي ليه مكبره الموضوع ومداها بشهر ونص تقفل شوية واصلا ماهي باينة مرا بالتقويم ومن ذا الكلام..بس انا خلاص النفسية قفلت و صايره ما اكل ولا اشرب بسبة الموضوع ..يعني شافني عادي وبيوم الملكة يشوف اسلاك وكمان لسه الاسنان حالتها حالة مره محرجه من الموضوع وكل ما قلت لابويا يقوله سالفة التقويم يقولي ليه ايش دخله عادي ركبتي ولا ما ركبتي ..ما ابغاه يتفاجأ أو يقول ليش ما قلتي لي وبعضهم مايتقبلون الفكرة نفسي اقول لامه او اخته بس كمان مستحيه ومو عارفه ايش اقولهم وانا عمري ما كلمتهم قبل..
الله يخليكم اللي خلعت الضواحك قبل التقويم تقولي متى بدت تقفل شوية وما يبان الفراغ بعد كم شهر؟ يعني مداها بثلاث شهور تقفل وتترتب عشان احاول ااخر الملكة وادورلي عذر اهئ اهئ
و الله بنات ندمت اني خلعت وحطيته احس اني تسرعت ..
شجعوني الله يخليكم عادي الوحدة تكون بالملكة وتوها مركبه تقويم؟انا اخترت السيراميك بس برضه احسه مرا واضح وكبير ومكبر فمي
و اللي متزوجه ومركبه تقويم تحسي الموضوع عادي ولا زوجك بيتضايق منه خااايفه موت من هذي النقطة خايفه ما يتقبل شكلي وانا لسه عروس ؟
الله يخليكم طمنوني الله يوفقكم دنيا وآخره مالي غيركم الله يحقق لكل وحدة ترد اللي ببالها ويسعدها يا رب..