ساعدوني الله يخليكم احس اني منهارة

السلام عليكم ورحمة الله وبركاته

أختي بقولج قصة عن وحدة نفس خطيبج بس هي كانت معرسة خلاص
سوت نفس حركتج اضافت ريلها على الماسنجر وظلت وياه
وأغرت بكلامها وخلته بذكائها يحبها ويكلم وحدة ثانية على الماسنجر الا هي
لأنه كان يكلم وايد بنات
المهم الغالية
الريال اتفق وياها انه يتلاقى وياها
هي وافقت وقالت له شلون بعرفك قالها بباقة ورد معاي
المهم لما كان ريلها وياها شافت كاشخ اخر كشخة ويقولها طالع وبتأخر شوي
وهي تقوله انزين
المهم اول ماطلع كشخت هي وطلعت بسرعه
وراحت المكان اللي اتفقوا معاه

وأول ماشفت ريلها راحت عنده وهو منصدم
وقالت له انا .........
الريال من الصدمة حس بتأنيب الضمير

والحين هو حرمته وايد اوكيه

انتي اللحين حاولي انج تكلمينه وطولين وياه

على الماسنجر لين مايطلب منج انه تتلاقوا طبعا تفهمينه انج انتي تعرفينه
وانج قاصدة


والله يعينج وادعي الله يهديه والله قهر
الرياييل ماادري ليش يحلالهم الحرام ويكرهون حلالهم

الله يعينج أختي ويصبرج وياها
واقولج شيئ مهم جدا
استخيري مرة ثانية قبل الزواج
استخيري فوق السبع مرات عشان اذا كان لج خير الله يسهلج اياه
واذا كان لج شر الله يبعدج عنه.

اذا حسيته انه ماراح يترك هالعادة وانه لعاب وايد انصحج تبتعدبن عنه
لأنه لو يعزج مستحيل يسوي هلحركات
خذيها تجربة مني
ترى رجال يال كنت مالكة عليه مثله وانفصلت منه قبل العرس
وكنت استخير دائما وكل يوم
والحمد الله مرتاحة اللحين مب مثل أول كل افكر وأشك في كل حركة يسويها

لا تنسين الا الدعاء والاستخارة
الله وياج اختي
أ

:up: كلامك عين العقل

اختي فيه مثل يقول الي هذا اوله ينعاف تاليه
والله لايبلانا انشاءالله ويصلح ويهدي بنات واعيال المسلمين

بنات الموضوع مش بهالبساطة .. احنا عايشين بمجتمع ما يرحم .. بيكون اسمي مطلقه وآنه للحين بنت!! .. ما اقدر اتركه الحين بعد عشرة طويله .. وش تبون الناس تقول عني .. آنه اهلي ما كانوا موافقين عليه من البداية لأنه غريب .. واحنا العادة ما نرتبط إلا منا وفينا ( يعني ناس بينا وبينهم صلة قرابة ) وآنه اللي اقنعتهم ان هذا نصيبي وآنه راضيه به .. والحين تبوني بهالسهولة اروح واقولهم آنه ماابيه؟؟!! ما اقدر والله مااقدر :confused:
آنه مب قادرة أنام .. اليوم كلمته عالمسنجر وعطاني رقم تليفونه النذل.. ويبي يقابلني بكره .. مب عارفه شسوي ..بس بنت عمي عطتني فكره
باخلي وحده تروح تقابله وتعطيه علبة صغير وتقوله هذي عربون صداقتنا .. وما يفتحها الا بعد ما تروح عنه .. وباحط له في العلبه دبلة الخطوبة وورقه .. بس مب عارفه شاكتب بالورقة .. سااعدوووووني يا بناات ارجوكم .. مافي جدامي وقت طويل عشان افكر !!

اختي ندى معليش انا تلخبطت
الحين انتي مخطوبه ولا مالكه؟
ومن كلامك انك ماتبين تفكين خطوبتكم تحت اي ظرف عشان الناس ماترحم طيب اذا ماتبين تفكينها وش حقه بترسلين دبلة الخطوبه؟؟؟

وغير كذا الناس ماراح تنفعك اهم شي تشوفين وين مصلحتك فيه مو مصلحة الناس انتي الي بتعيشين مع الشخص مو اهلك ولا الناس
واذا شفتي ان هالشخص مافيه خير احسن تطلقين وانتي بنت احسن من انك تطلقين وانتي مو بنت يعني شي ارحم من شي
والله يوفقك انشاءالله ويهون عليك مصيبتك هذولا الرجال مايملا عينهم الا التراب ويمكن هالشي الي صار خيره لك عشان تعرفينه على حقيقته قبل لاتطيح الفاس بالراس

ما أدرررررررري
آنه وايد مشوشه وأفكاري تايهه .. وعمري ما حسيت بهالضياع اللي آنه فيه الحين ..
بس ودي اعرف !!! لــــــــــــــــــــيش؟؟:cry:
آنه ما سويت شي
يبون وحده تخون .. وتكذب .. وتخبي عنهم كل شي .. انزين آنه مو جذيه .. شسوي؟؟
ياليتني كنت خطيبته .. احنا مملوك علينا.. يعني آنه زوجته تقريباً .. حرم والله حرااااااام .. الله يهديه
بس آنه مااقدر اتركه .. لو قلت حق هلي .. ما استبعد ان الوالده تموت من حرتي ( بسم الله عليها) وحياتي بتصير جحيييييييم مع ابوي واخواني ..
وآنه للحين ..... أحبه .. هذا القهر.. اني أحبه

نصيحه مني مني


مدام انج اتحبينه صارحيه قوله حقه



حرام عليج تطلبين الطلاق ادمرين حياتج


مدان انتي اتحبينه وهي يحبج


حلي هالمشكله ترا وايد بنات مروو بنفس هالمشاكل واكبر


واخر شي يوم صارحوو رياييلهم تم ريال يتندم وبعدين عاشو حياه حلوة بدون مشاكل
:confused:
دخليج مدام انتي اتحبينه لا تطلبين الطلاق


حرام عليج


والله
:confused:
اعترفي حقه والله انصحج
قولي حقه مدام انت اتحبني وتباني ليش تلعب علي
ترضاها فيني ؟؟؟

قولي حقه :confused:

حرام بس وايد كاسرة خاطري


لا تطلبين الطلاق :confused:

..................................................................................

آنه باصارحه .. بس ايش يضمنلي انه ما راح يرجع لهالسوالف .. ويكون حذر اكثر..؟؟؟ آنه وايد خاايفه :sad:

حبيتي
والله حاسه فيج

وما أباج تكونين نفسي
ولا ابى اي وحدة تكون لها نفس قصتنا
بس يا اختي ليش تعبين نفسج

انتي بس استخيري عشان الله يوفقج
استخيري وادعي ومايهمج كلام غيرج والناس

والله العظيم نفس شعورج قبل ما انفصل
خفت على أمي وابوي وردة فعلهم

بس الله كريم

انتي استخيري وادعي الله يهديه
وصراحة فكرة بنت عمج حلوة

واكتبي هالشعر : له تأثير كبير
وانتي بعد قبل ماتسوين هالشيئ
استخيري عشان الله يكتبلج في هالحركة الخير
والنتائج اللي تريحج

فكري اختي عدل كل خطوة استخارة
وراح ترتاحين عدل
صدقيني نفذي كلامي

وهذا هو الشعر :

ستذكرني اذا عاشرت غيري وتبكي عشرتي زمنا طويلا

عشان يحس في قيمتج ويتندم
والله يوفقج يااااااااااارب ويهنيج ويهدي ريلج وان شاء الله
يحس فيج

اتمنى من كل قلبي تتوفقين الله وياج اختي

لا حــــــــــــــول ولا قوه الا بالله........ما في غير انج تواجهينه ما اعرف كيف متحمله كل ها الوقت...

واعديه وواجهيه وقوليله يا ولد الحلال انته فطريج وانا فطريج وشوفي ردت فعله..

وبعدين شو الي ضمنج انه بعد العرس ما يرجع لعاته وبتعبين... مثل ما قالولج اول استخيري وشوفي الي بيصير

والله وياج

الله يعينــــــك نـــــــــدى:cry: ويصبرك ويفـــــــــــــرج همك يارب
حلــــوة الفكرة,, بس انتبهــــــــي لا تخلين بنت تقابله وتعطيه الخاتم ,, تخيلي تصير بينهم علاقة:rolleyes: مالهم امان والله..
انا براي انك تواعدينه في مكــــــان دايم كنتو تتقابلون فيه..
وتعطينه الخاتم وتطلعين على طول..
وطمنينا عليك يالغالية
:sad:

ندى الدوحه

والله تغمضين:cry:


بس ليش الرياييل جي :mad2: والله ما اعرف شو بقولج ..وانا سامعه بنفس القصه .. وكله كلام حب على المسنجر .. وآخرشي الريال قالها .. والله انا كنت حاس ان انتي .. انقهرت حرمته لأنه جذاب .. تقول كان يقول كلام على المسنجر عمري ماسمعته منه .. اي حب واي اوهاوم واي خرابيط .. بس انتي خليج ثقيله شوي .. وقوليله ترى بعدني بنت .. ولي الحق اني اقول ما ابيك .. لأنك ما تستاهل ... عندي رساله سبق وحطيتها .. ياريت لو تعطينه اياها ..

رسالة إلى خائن


هل انت خائن؟
أغمض عينيك بهدوء أرم السؤال في أعماقك وكن على يقين أنه لن يسمعك أحد سواك
إذا شعرت ببعض الألم أو الغضب فأنت يا زوجي مصاب بداء الخيانة . لكن أي نوع من أنواع الخيانة تمارس؟
ولماذا تغوص في وحل الخيانة؟
ومن ذلك الذي تغرس خنجر خيانتك في ظهره؟
هل جنت نفسك المليئة بمبادئك السامية ؟
أم أنك خنت قيمك الاسلامية المتضخمة في شخصيتك؟
أمانك خنت تربيتهم المثالية لك وسهرهم لليالي العمر كي يفتخروا بك بيوم الحصاد؟
أم انك خنت أنسان سلمك قلبه الطاهر ونام مطمئناً إلى وفائك .
ويرعبك أن يكتشف يوما خيانتك له ؟
أم أنك تخون عرضك ؟
ولماذا تخون؟
هل تفتقد معهم الأمان وتشعر بأنك خارج نطاق حياتهم ؟
هل تعيد الخيانة لنفسك أعتبارهاوثقتك بهذه النفس؟
هل أدمنت الخيانة وقطعت بها شوطا عظيماً من الضياع والاسفاف فلم يعد بمقدورك أن تتراجع؟
هل تكثر بالخيانة الرتابة والملل الذي تسلل إلى علاقتنا ؟
هل توفر لك الخيانة جو من المرح أنت في حاجة اليه بعد عناء يوم طويل من العمل الشاق؟
هل تعتقد أن الخيانة الحل الامثل للهروب من نفسك ؟
وهل تعتقد بأنها الصفعة الملائمة لأنسان منحك حياته؟
بالتأكيد انك تدرك عمق القذارة في وحي الخيانة فهل تظن بأنها تليق بك؟
هل تظن بأنها الاوفى لمن لا ينتظر ولا يتوقع منك ثقتك العمياء لحظة اكتشاف خيانتك له ؟
هل كنت على استعداد لتلوث صورتك الجميلة في أعينهم ؟
هل فقدت حرصك على أن تبقى ذلك الذي يشار اليه ببنان الوفاء؟
بالتأكيد لا
إذاً فما زال الوقت أمامك كي تغتسل كي تتطهر كي تستغفر كي تستتر قبل أن يفتضح أمرك بخيانتهم.( منقول نص الرساله فقط للامانه من احدى المجلات )

انصحج انج ما تقوليله .. وعقب ما تعطينه هالرساله .. سيري عالمسنجر شوفي اثرت فيه ... والا بعده على سوالفه ..

اذا ما اثرت فيه واجهيه بالحقيقه المره ..

:s2 لاتعليق

السلام عليكم ورحمة الله وبركاته

الله يعينك اختي وياجرك على مصيبك
اول شيء في هالاشياء مافي شيء اسمه الناس .. واهلك اكيد بيفهمون وماراح يقولون لا هذا الي اني اخترتيه تحملي ..

وانشالله مايصير الا الخير وربي يوفقك ويهديه ويسعدك معاه

شوفي اختي قبل اي شيء استخيري واستخيري
فكره صديقتك حقت الصندوق حلوه .. حطيله فيها كلام عن الوعد وانك ماتوقعتي منه هالشيء وانك حزينه ومتضايقه يعني فكري بالكلام كويس

بس لاتوديله الصندوق بنفسك .. خلي احد يوديه وهو الي يقابله والافضل تحطيله الصندوق بالمكان وتروحين يعني مايشوفك يلقى الصدوق بس علشان يعرف انك كنتي عارفه انه هو ومايشك انك تعرفتي عليه وانتي ماتدرين انه خطيبك
لانه فيه نوعيه من الناس علشان تبرر غلطها تروح تدور على غلطات الناس ويسولك مشكله انتي في غنى عنها

وحاولي تاجلين طلب مقابلته لك .. يعني كل مره تحججي بشيء علشان تحاولين تعلقينه فيك اكثر واكثر ويكون عندك وقت تفكرين بالكلام الي راح تكتبينه بالصندوق

حركه الصندوق كفيله بانها ماتخليه يرجع هالشيء اذا كان عنده دم ..

استخيري قبل لاترسلين الصندوق واستخيري بعد ماتعطينه الصندوق تكملين معاه ولالا

وعلى فكره اذا صار فيه طلاق وانشالله مايكون ينكتب بعقد الطلاق انك بنت مو ثيب

ربي يهديه ويتمم عليك بالخير .. زلا تنسين الدعاء ادعي كثير ودايما
تحياتي
لك روحي

اكتبي
وش موقفك لو كنت أنا اليوم خاينك......وش هو شعورك لو فؤادك غدرته

ليتك تموت اليوم و ارتاح أنا منك..........يرتاح قلب بالخيانة طعنته

يلعنك قلبي والاحاسيس تلعنك .. و يلعنك دمع صادق لك نثرته


فكرة بنت عمك رائئئئئئعة صدقيني بيحس بندم شديد و بغيب فترة وبعدها بيرجع يبوس رجولك ....بليييز طمنينا عليك

السلام عليكم ورحمة الله وبركاته

ياالغالية اكثري من الدعاء وذكر الرحمن

و الله يعينج على بلواج


جدتكم إسعفه

La-lona
حراام عليك وش الي يلعنك .. بعدين بيشوف البنت تسمع لشنان يجيه حاله صرع ..

ههههههههههههههههههههههههههههههههههههه

موتيني ضحك لما قريت ردك

قولي اميين ربي دايم يسعدك ويهنيك ويكتبلك الجنه وكل من يعز عليك وماتنقطع الضحكه منك زي ماضحكتيني

اتخيل شكله يقرء الكلالالالام بيقعد يغني

اتوقع لو تكتب كلام غامض اكثر .. يعني تحسسه انها مره متضايقه وزعلانه ومنهاره وماهي مصدقه ان الوعد الي وعده كان بس كلام وكيف هي راح تصدق كلامه ووعوده بعد كذا

وتحياتي
لك روحي

الغالية ...انا صدق متعاطفة وياج و الله يعينج....و الله الرياييل ما تعرفيلهم ...ما في شي يمزر عينهم ...و هذا حال الطيب في هاي الدنيا ...انا حاسة فيج و بالمرارة اللي انتي عايشة فيها ..و ادري انج انتي بين نارين ...تفكرين فيه من جهة .... و اهلج و الناس من جهة ثانية ...و انا مابا اقولج اتطلقي و في نفس الوقت خايفة تمين على هالحالة تعذبين روحج اكثر و اكثر ...بس انا بقولج شي واحد يوم بتتعرضين لمشكلة بغض النظر عن حجمها فكري فيها من جميع الابعاد...عشان تتوصلين لحلول ترضيج و ترضي اللي من حواليج....عزيزتي اولا فكري في عمرج و في راحتج قولي في نفسج شو اللي بيريحني انا و بينهي العذاب هل هو الطلاق و الا الاستمرار مع هالشخص؟ يلسي مع نفسج لا تقولين بنت عمي قالت لي شي و ربيعتي قالت شي و اختي قالت شي ...يمكن هاذيل كلهم يقولون شي و انتي مب مقتنعة فيه و تسوينه عشان هم قالوه ...و انا اقولج هالشي غلط و يمكن انا اعطيج حل بعد ما يرضيج !!!

بس تدرين...الشي الوحيد اللي اقولج اياه الجأي لربج و ادعي و تضرعي و استخيري مرة و مرتين و عشر ...و ما خاب من استخار...و بعدين ممكن تكلمين حد كبير من اهلج و حكيم سواء اخوج او ابوج او اي حد و تقولين اذا فقدتي السيطرة على تفكيرج انج لاحظتي هالشي على زوجج و انج محتارة و تحتاجين لوقفتهم...عشان يتعاطفون وياج و يعرفون بمعاناتج ...انا الصراحة ادعيلج من كل قلبي انه يفك حيرتج و ينفرج همج ...و يوفقج يا ربي ...و ان شاء الله ما تشوفين الا السعادة في دربج و ممشاج...

بسم الله الرحمن الرحيم


الله يعينج اختي ويفك حيرتج...ويريحج


أنا طبعا رايي من راي خواتي:eek2:

اول شي خلي ثقتج بربج كبيرة.وادعي ربج واستخيريه دايما.

انتي ادرى بوضعج مع ريلج اكثر من اي شخص ثاني.واي شي بيصير اعرفي انه مكتوب لج حتى لو اطلقتي لا سمح الله .يمكن يكون فيه خير لج.

الله كتبلج انج تعرفين هالشي قبل الزواج(u) حكمة من رب العالمين
عشان تقررين وضعج كيف بيكون معاه. يمكن تواجهينه وهو بيستحي وبعدين بيخضع لج طول حياته وبيتأسف منج على فعلته الشينه. ويمكن يقولج انا بعد منصدم منج ليش انتي ادشين المسنجر والنت وبهالطريقة بيغطي على فعلته.


في مصيرج وحياتج انتي متحكمه بكل شي لا تفكرين في الناس.رضاء الناس غاية لا تدرك.فكري في راحتج انتي


الافكار المطروحه رائعه شوفي اللي يناسبج وسويها.بس اهم شي يمكن نحن المتزوجات بنفيدج فيه. وهو لا تطليعن زوجج على نقاط الضعف فيج.ولازم لازم تفهمين زوجج عدل عشان تعرفين من اي باب اتينه فيه.:up:

اذا كنتي متمسكه وايد فيه. لا تضخمين وايد حجم المشكله. ولا تبينين للريال انج ميته فيه. بس ممكن تقولين له :::شو لعب الليهال اللي يالس اتسويه:D2.....او انه طاح من عينج


عشان يصطلب عدل. وتاخذين منه وعد رياييل انه يترك هالسوالف لانه ريال متزوج.



والله يهديه ان شاء الله ويكون لج زوج صالح:cool2:


وطمنينا عليج:smile:

بنااااااااااااااات باقولكم وش صار أمس
بعد ماعطاني الرقم في المسنجر وتواعدنا اني اتص له الساعه 2 , اتفقت مع وحده من ربعي ثقه انها تكلمه .
وآنه اكلمه بالليل قالي يلا حبيبتي ننام علشان آنه تعبان ، قلت له اوكي حبيبي( وآنه طول المكالمه كنت معاه جداً طبيعيه وما خليت كلمه حلوه ما قلتها له علشان ما يحس بشي ) أول ما صكر من عندي ، اتصلت حق صديقتي واتفقنا انها تشبكني عالخط وياهم من غير ما يدري ، انتظرنا لين الساعة ثنتين واتصلت له ، كان صوته صوت واحد جداً ملهوف وقالها تراج متأخره دقيقه ، :mad2: وآنه اسمعه واحس بنار تحرق قلبي ، وقعد يسولف معاها لا ويحط حجر الأساس لعلاقتهم يقولها : آنه احب كذا وما احب كذا ، لا والقهر قالها سكري آنه باتصل لج واتصل لها من رقم قالي انه مطلعه حق اخوه .. المهم قالت له آنه بنام الحين وباكلمك بكره .
أول ما سكرت من عنده طرشت له مسج يقول :
المشكلة مني أنا اللي اعتبرتك
كل هلي ودنياي وضليت مغليك
هذي النهايه بالخيانه ذكرتك
مع السلامه .. عل هالجرح يكفيك

المرسل :
الورده ( طبعا هذا هو النك اللي آنه كنت حاطته بالمسنجر)

والمسج الثاني كتبت له فيه :
شكراً يا زوجي الغالي

تعرفون وش صار؟


حرق تلفوني .. وما رديت طبعاً .. طرش لي مسجات آنه آسف والله الشيطان قص علي سامحيني والله انها أول مره وآخر مره أرجوج آنه من دونج اضيع وأي شي تبينه آنه حاضر ومستعد اسويه بس لاتخليني والله احبج ارجوج حبيبتي انتي ما تستاهلين اللي آنه سويته فيج ... ومن هالكلام.

شسوي ؟؟ اسامحه؟ والا اخليه يحترق كم يوم بعد؟

بس تدرون ؟؟ والله انه عور قلبي يوم قالي آنه ما اقدر انام ارحميني!!
بنات آنه احبه وااااااايد ، وقبل ما اوافق عليه آنه استخرت والحمد لله ارتحت له واايد.. شسوي فيه الحين ؟؟
خاطر ي اعطيه كف واكوله .. آنه احبك ليش سويت فيني جذيه؟؟!!:o



تم تعديل المشاركة بواسطة المشرفة...