صـــــــــــــارت عندي عقده من شي اسمه.......

السلام عليكم ورحمة الله وبركاته



هاي سنة الحياة .......:pain:

اذا الريياييل موكلهم سوا عيل ليش نسبة الطلاق عدنا مرتفعة وايد

اللي سمعته : ان في قطر نسبة الطلاق 30%
وفي الامارات 40%

واذا قلتوا لا الاحصائية ما تقول جي
عيل شو تقولون لما أشوف معظم اللي حواليني وفي كل مكان اسمع عن وحدة تطلقت..ومنهم أنا ، والله يشهد اني كنت أحبه موت واخدمه بعيوني لكن انفصلنا ..بسبب شخصيته الدكتاتورية وسعيه انه يسيطر علي .

يا ترى طريقة الزواج غلط عندنا؟؟!!!

يعني لازم الوحدة ترابع رياييل وبعدين تختار الاحسن .. !!!!!! واللا شو .. !!

احتلانا في الرياييل وفي نفسنا

ويا قلبي لا تحزن!!

يااااااااا بنات الحلال ...


الطيبون للطيبات ....



ولن يصيبنا الا ما كتب الله لنا




والله يسعد الكل ولا تشاؤم بعد اليوم ....

مب كل البنات لهم نفس التفكير ونفس طريقة الحياة ...

في احيانا فشل الحياة الزوجية من الزوجة نفسها ما تعرف تتصرف مع زوجها بس انا اعرفكم انتوا بنات عاقلات وتعرفون تحببون ازواجكم فيكم ...


والله يسعدكم يارب...

اختي بسمة ملاك بقولك شي




اذا فشلتي في التخطيط فانك خططتي للفشل


يعني اذا انتي كنتي تفكرين في انك بتفشلين في حياتك الزواجيه معناته انك قاعده تخططين للفشل في حياتك

وهذا الموضوع دليل على انك انسانه متشااااائمه لابعد درجه

بقول ج شي

لا تنسين ان الله سبحانه خلق لكل شي نقيض

يعني
فرح وحزن
حياة وموت
زواج وطلاق
ابيض واسود
استقرار و تفكك


وكل هالتناقضات تصير في الدنيا على شان نعرف نستفيد منها وليس العكس



اتمنى انك تعالجين نفسك قبل اي شي

وخل نظرتك متفائله

شوفي اللي متزوجين ومتهنين صار لهم اكثر من 20 سنه

شوفي اللي فرحانين انهم ارتبطوا مع بعض

لا تشوفين الجانب السلبي


الله يوفقك واذا تبين اي نصيحه انا حاضر

مرحبااااااا بل البنات الخايفات ولمتشائمات من الزواج


ليششش كل هذا التشائم الزواج :up: احب اقولكم ان الزواج شئ


فرضه الله علينا وهو مكتوب وقسمه من الله ما نقدر نغيره


حبيباتى انا بقولكم عن نفسى انا متزو جه من تقريبا 20 سنه مر فيها

الزين و الشين واكذب عليكم اذا قلت مافى مشاكل فيه لاكن بعض


الاحيان انا افتعلها علشان يكون فيه مراضاة :shy: عزيزتى قال تعالى :


((( وجعلينا بينكم مودة ورحمه ))) المره العا قل الى تبي تعيش بحياة


سعيده تقدر بتصرفاتها مع زوجها وطريقة تعاملها معاه تخلي حياتها

جنه........................... الرجال اسمحيلى مثل ................


الا طفال يبيلهم دلع ومدارات وغنج وكل شئ يطرى على بالك


صدقونى مالنا بد من الزواج والله حلللللللو ولازم ههه من البهارات


عيشو حياتكم بتفأول بدون تشأو م وكثير من الرجال يكون احن


عليك حتى من اهلك ويرفع عن الحاجه من الغير وتكونين حرة نفسك


فى مملكتك الى هى بيتك ولله يرزقك بلذريه الصالحه


اتمنى لكم التوفيق بحياتكم جميع :z_thanks: :flower:

الصراحه انا عندي نفس العقده والله

:pain:

اختي بسمة ملاك

انا وياج في كل اللي قلتينه

والله انه الحرمه تسوي كل شئ عشان ترضي ريلها

لكنه ولا يهمه ادلعه واتعامله شرات الياهل

وتسوي المستحيل عشانه

لكنه ما يستاهل لانهم الرياييل في اعتقادي ما ينعطون ويه

اذا دلعتينه استقوى عليج وتمادى في غلطه وياليتها غلطات بسيطة

والظاهر انه على الحرمه من البداية ماتكون سهلة وطيبه زياده عن اللزوم

ترى الطيب في زمنا ينخدع ومن اقرب الناس اليه

اكيد بتقولون عني متشائمه وايد

والله من اللي اشوفه في كل مكان اقول ان الحياة بدون ريال

احسن وان الرياييل هم سبب كل البلاوي

موضوع شيق اختي مع اني لست متزوجة انشاء الله يا بنات ادعولي ان اتزوج في اسرع وقت قولوا امين ادعولي الله يرحم والديكم:shy:


لكن اختي العزيزة الحياة الزوجية هي ميزاج الحياة يعني يوم حلو ويوم زعل لكن يعتمد على حكمة وذكاء الزوجة كيف انها تكسب زوجها واهله في طرفها ...لابد من ان تكون ذكية دبلوماسية وان تاخذ امهاتنا رضي الله عنهم خير ميثال وخير قدوة في هذه الامور ...

كل شي يكون بيد الزوجة هي الي تقدر اتخلي بيتها جنه ام نار هي تقدر تتحكم في كل شي
اتمنى اني قد افدتكم

تعرفون بنات لا تعقدون عماركم بها المسلسل الحريم والله انه مشاكل والله الحياة الزوجية غير جي ليش ما تشوفون رسولنا ااكريم كيف كان يعامل امهاتنا وكيف كان يتقاسم ويهام اللقمة وكيف كان يتغشمر وياهم ويمازحم الحياة الزوجية رحمة من رب العالمين الحمدلله على نعمته

اختي بسمة ملاك جزاك الله خير في اعتقادي المراة متى تزوجت لابد ان تتشكل نفس الحية يعني يوم اتكون في بيتها لا زم اتغير من شكلها ما اتم على شكل واحد ولا تسريحة وحدة لان والله احنا عايشين في عصر كله فتن يعني الريال يوم يظهر يطالع فوق الركبة و ......الخ يعني لازم المراة تكون جميلة دلوعة في عين زوجها

وي ليكوون صرتي راوية الثانية ؟؟؟؟


اللله يستر ... ويهونهه عليييج ؟؟ بالعكس واللله وناااسة الزواج شي حلووو ....

السلام عليكم

بناااااات المسلسل مب اهوا السبب بلعكسسس احس مبالغ فيه

بس انا الي اقصده هلي اشوفه فالوااااااقع كل وحده مب عارفه شو تسوي عشان ترضي الرياااااال وهو 00000 استغفر الله بس

مب كل الرياييل بس كل واحد فيه غلط يختلف عن الثاني واهما 90 بلميه سبب فلطلااااااق والخلافات الزوجيه

والحين اختي داااااااانه كل البنات صاروا واعيات من ناحية الاهتمام والكشخه لزوجهااااااا بس شوووو الييترس عينهم صدقيني ماتلقين

ودي اشوف اي اثنين متزوجين ويكون الريال مب ظااااالم حرمته0000اتمنى

وكل الحريم الي نعرفهم نسمع عن رياييلهم وسوالفهم واهيا تلقينها خبر خيرررررر

:eek2:

السلام عليكم ورحمة الله وبركاته

الواحد ايام الخطبه يبدء يرسم احلام حلوه لحياته المستقبليه وانها كلها سعاده وحب ورومنسيه .. وينسى انه المشاكل من واقع الحياه واول مايصير شيء بسيط تتهدم كل احلامه ويقول ماكن موقع هالشيء يصير

اكيد كل بيت فيه مشاكل كثير وفيه فرح وسعاده والشطاره انك تخلين الفرح يغلب على الحزن

يعني شوفي الناس الي تعرفينهم وعايشين بمشاكل لاتسئلينهم ليه لان كل واحد بيرمي اللوم على الثاني


المشكله ان الوحده لما تتزوج تحط اول شيء ببالها ابي اجيب اطفال .. ومايمديهم يتزوجون الا وهي حامل وتعب الحمل والارهاق وبعدين النفاس وبعد النفاس جسمها يخرب وتنشغل بالبيبي مره تعبان ومره يبكي مو راضي يسك ومره مدري ايش

وبس يكبر شوي البيبي وتخف مشاكله يلا ابي بيبي ثاني ونرجع لنفس الموال

طيب من وين تجيبين وقت تقعدين مع زوجك وين تلقين وقت تفهمينه ؟؟ تعرفين كيف يفكر وكيف هي نفسيته ؟؟؟

مااقول لاتجيبون بيبيات بس استنو سنه على الاقل اعرفو بعض كويس وطبعا هذا يعمتد على اشياء كثير

هذا نوع من البنات فيه نوع ثاني اهم شيء عندها الناس شكلها عند الناس بيتها قدام الناس .. وهذا النوع مشاكله الزوجيه ماطلع الا بعد فتره

وفيه الي حاول تسعد زوجها بس ماهي عارفه شلون تحس انها تعطي تعطي بس مو جالسه تاخذ السعاده الي كانت تحلم فيها ومع الوقت تزهق وتبدء تهمل زوجها


وفيه الازواج الي فيهم طباع العزوبيه ملاصقه فيهم حتى بعد الزواج .. وهذولي الي يسمونهم ابو طبيع وفيه بعد المرضى النفسيين وهذا تكشفه البنت ايام الخطوبه وبالسؤال عنه ومن هنا تجي فايده الملكه الطويله نسبيا

وفيه الزوج الي مو رومنسي ولا يدل دربها وتصير زوجه مسكينه حساسه وهذا ممكن بشطارت البنت غير من طبعه مو كثير بس يعني يصير لطيف نواعا ما

وفيه الي يحاول يسعد زجته بس ماهو عارف كيف ونفس الشيء يعطي يعطي بس ماهو لاقي نتيجه حلوه فيمل ويزقه ويهمل البيت والي فيه

احنا مشكلنا مانعرف كيف نتعامل بشكل صحيح مع الطرف الثاني
ونعطي نبذل الشيء الي احنا محتاجينه ومانتبه بالضبط ايش الطرف الثاني محتاج صحيح وبعدين يجينا احباط لاننا مانشوف رده فعل حلوه على كل العطاء الي اعطيناه

وبصراحه اشوف اغلب البنات تكون دايما افكارهم سطحيه مكياج ولبس وهذي عيونها حلوه وهذي بشرتها خطيره بالتئكيد كل بنت عندها هالاتجاهات وتحب الموضه والمكياج وانها عتني بنفسها بس لاتحاول تعطي انطباع السطحيه عنها عند زوجها .. لاتقعد قدامه طول الوقت تتكلم في المكياج واشكال الحريم وكلام الناس

وعندنا بعد مشكله ثانيه مانعرف نتعامل مع المشاكل صح .. ومانعرف نتنازل ونحس اننا اذا تنازلنا جالسين نهين انفسنا

تحاول فهم زوجها وتفاجئه دايما بمعرفتها وخبرتها

وفيه الي مايثمر معاهم عروف من جوات نفسهم لا رجال ولا حريم .. وهذولي مو معقول انهم اغلب المجتمع هذولي قليلين مره الله يبعدهم عنا

اهم شيء قبل لاتخين اي خطوه استخيري واستخيري واسئلو عنه كويس .. اسئلو اصحابه الناس الي يشتغل معاهم اسئلو بالمسجد اهم شيء تسئلون كويس وانشالله ماراح تاخذين الا نصيبك


وفيه كتب حلوه تخليك تفهمين الرجل كيف يفكر وبالضبط هو ايش يحتاج علشان ماتصيرين تعطينه الاشياء الي انتي تحتاجينها وتحسين انك ماقصرتي معاه وهو مومهتم ولا مومقدر
تعلمك كيف تعطينه الي يحتاجه وانتي مرتاحه فبسطينه وتنبسطين
عندك مثلا رجال من المريخ ونساء من الزهره
وفيه الرجال والنساء والعلاقات بينهما

والحيه الزوجيه يبيلها ذكاء ونفسيه مرتاحه وشخصيه مستعده انها تعيش مع شخص ثاني على الحلوه والمره تفمه وتمتص غضبه وتسعده وتريحه نفسيه تبي تبني سعاده وتفهم ان التنازل مو معناه اني جالسه اهين كبريائي


دعائي لك بانك تلقين الرجال الي يحترمك والي يقدرك ويسعدك .. ويسخره لك ويسخرك له ويقدرك تسعدينه وتهنيه .. وكل بنات المنتدى

تحياتي
لك روحي

أنا اشوف إنه كل الرجال أنانيين..بغض النظر عما إذا كنت سعيدة أو لا..أقصد بصفة عامة يتميزون بهذي الصفة
وبرضة بصفة عامة كلهم :down::pain::down::pain::down:

الان أصبحت السعادة للأسف نادرة و أعتقد أن هناك خطأ في طريقة زواجنا في الخليج....أولا كلنا يهتم بالشكليات ....و ثاني شئ لأنه احنا الخليجيات بطبعنا فينا خجل من الرجال و مانخالطهم كثير فبالتالي مانقدر نحكم صح على عريس الغفلة في فترة الكذب....عفوا اقصد الملكة
يصورلك الحياة جنة و تكتشفين إنها :down:
معليش لاتزعلون بس أنا أشوف إنه هذي حالة معظمنا
نفسي أحس بالسعادة اللي يقولون عنها في الروايات:confused::confused::confused::confused::confused:

السلام عليكم ورحمة الله وبركاته

اختي"La-lona"

الروايه اسمها روايه .. شيء خيالي من الوهم وحتى لو كان روايه حقيقيه فلازم يكون فيها مبالغه علشان يوصل الاحساس للقراء وهو احساس خيالي

واذا انتي جالسه تدورين على سعاده في روايه فعمرك كله ماراح تحصلينها

اهم شيء بالحياه انك تكونين قنوعه قنوعه بكل شيء عندك .. والقناعه مو معناها الرضوخ هذا نصيبي وربي يائجرني وبس

لازم الواحد ياخذ بالاسباب ويحاول

والرجال مو كلهم انانين لازم ماننسى اننا نختلف شوي عنهم بطريه التفكير فمانقدر نفهم بالضبط ايش الي يفكرون فيه وهنا جي شطارتك بانك تحاولين تستوعبينه

في احيان كثيره نشوف علامات عند الاهتمام على الرجل .. ولكن الحقيقه هو اصلا مايدري احنا ايش نبي فيوقف مايعرف يسوي شيء ومن كثر الوقوف بيتعب ويبي يجلس ويترقب ومايحس انه فهم ويزهق وهو جالس يطالع فيمسك الجريده ويقد يقرء

يعني لازم توضحين للرجل انتي ايش بالضبط تبين ايش محتاجه .. وتفهمينه مو بالطريقه الي انتي ستوعبين فيها الامور لا بالطريقه الي هو يفهم فيها

يعني مثلا ماجربتي مره تقوليله ليش ماتروح تتروش "تستحم"بيقولك ليه طالع مني ريحه .. بتجين تقوليله لا بس المويه صايره حلوه ومنعشه .. بيقولك لا مالي خلق

انتي بينك وبين نفسك تبينه يتحمم علشان مثلا ريحته مو حلوه بس ماودك تجرحينه .. وبعد ماتقوليله هالكلام ويرد عليك كذا بتقومين وانتي متضايقه وتقولين مايحس فيني ومدري ايش

وهو اصلا مافهم عليك .. ويمكن بعد فتره من كثر ماتلمحيله انه يروش بيقولك اذا صار فيني ريحه قوليلي ماراح ازعل بس لاتقعدين تلمحيلي ماادري ايش تبين بالضبط

هذا مثلا بسيط مو شرط يكون هو نفسه صح بس تقريبا فيه اشياء كثير تنطبق عليه


وبنفس الطريقه المرءه تحاول ترضي الرجل وتشيله من فوق الارض ومايبقى شيء ماتسويه .. وتكتشف انه ما انتبه ولا ماهو راضي او حتى مايقولها كلمه شكرا

ماقد فكرتي ليه ؟؟
لا مو علشانه اناني
لانه ماهو محتاج الي انتي جالسه سوينه .. ما اشبعتي احتياجاته الاساسيه فماهو قادر ينتبه للاشياء الثانويه

علشان تعرفين اكثر عن هالاشياء ممكن ترجعين لكتاب رجال من المريخ نساء من الزهره وانا انشالله بحط بعض المقاطع

تحياتي
لك روحي

شـــــــــــــــــــو بقول غير ســــــــــــنه الحياه:smile:

يا عزيزتي اصابعك ماهي سوا


لازم يكون فيه مشاكل بالحياه الزوجيه والا ما تكون حلوه ومثل ما يقولون

هاذي البهارات مع اني ما احبها .


وياما ناس متزوجين ومرتاحين على الآخر وهم فيه االعكس

يعني االدنيا فيها الابيض والسود :shy:

بنـــــــــــــــــــــــــــات من كثر مانسمع عن الزواج وفارس الاحلام

الحين صرنا نخاف شيصير بعد الزواج من مشاكل وتعاسه

مثل ماقالت اختى:LALONA
الان أصبحت السعادة للأسف نادرة و أعتقد أن هناك خطأ في طريقة زواجنا في الخليج....أولا كلنا يهتم بالشكليات ....و ثاني شئ لأنه احنا الخليجيات بطبعنا فينا خجل من الرجال و مانخالطهم كثير فبالتالي مانقدر نحكم صح على عريس الغفلة في فترة الكذب....عفوا اقصد الملكة

تعقدنا من سيرة الزواج :down: