(أحمد )نور عائلتي الصغيرة ...

السلام عليكم ... شخباركم ياحلوين

(هذا مسج التبشير )
**
**
**
دعوة للهنا يا ناسي تلبوني
ولد جاني قمر بالفرحة بتجوني
(احمد )حق تشوفونه وتهنوني
ادري بهالسعد كلكم متنسوني
ربي برحمته اولادي يهديني
(علي & احمد ) اخليهم وسط عيني

ولدت تاريخ 17 يناير 2013 .. وموعدي كان تاريخ 27


قصتي كلش خفيفة وماتخوف ... مثل قصتي بولادتي الاولى سهلة

تاريخ 17 يوم الخميس الصبح بدا الم الطلق ... ومن البداية كان يجي كل 10 دقايق مافي مجال انه يكون مخربط من البداية كان منتظم كنت بخبر زوجي بس هونت ما حبيت اربك احد عالفاضي ... سويت كل شغلي غسلت ثياب وكنست وطبخت غدانا .. عابلت ولدي وخبركم الجهال ازيد من شغل البيت ...

رجع زوجي عالساعة 4الا خبرته وخبركم الرجال من تقولين عندش طلق قومي المستشفى ... قلت ليه بروح المغرب وعالمغرب خبرت امي انها اتجي وياي وقلت ليها اكيد برجعوني البيت هههه واثقة من روحي .... وصلت السلمانية عالساعة 6 وشوي سيدة غرفة الفحص الا اتقول 4سم بس الراس واجد ضاغط عالعنق من جدي طلقش صاير حامي يوم اوصل كان كل 5دقايق الطلق ... عطوا امي اغراضي وخبروا زوجي يملي البيانات ... سوا لي توسعة بسرعة ودوني غرفة الولادة وهناك الدكتورة فجت كيس الماي وخبرتني ان دقايق وبتحسين انش تدفعين قلت ليها كم سانتي الا اتقول 7 وبالفعل مرت 10 دقايق صرت ادفع جهزوا كلشي واني مو مصدقة اني بولد الحين لان حاطة في بالي يمكن اولد الصبح ... عالساعة 7.47 شرف ولدي عالدنيا ...

الخياط هالمرة زود عن بكري المفروض يكون اقل بس هالمرة صادني تمزق من ولدي داخل المهبل ... النزيف نفس الشي دبل بس الحمدلله المشيمة طلعت كاملة وما صادني مشاكل وياها ... ضغطي قام يعلى شوي غريبة ... وحطوا ليي فتيلة بسبة الجروح الي صادتني يوم ثاني طاحت بروحها ...