تعبت ماني قادره امسك الساني

السلام عليكم ورحمة الله وبركاته


ياجماعه امي هالايام دايم تبكي بسببي بس والله غصب عني ماقلت لها شي الله العالم اني جالسه اوجها عشان ماتنحرج مع احد وماهي راضيه تتقبل الكلام بشكل عادي على طول تبكي وتقول اني جالسه اغثها وليه انا اقولها كذا والله مقدر امسك الساني لما اشوف الغلط ياناس والله مليت من حياتي انا .. حسيت اني مو قادره اخذ راحتي بشي احس اني الوم نفسي على شي انا ماغلطت فيه وخايفه يجيها شي بسبب كلامي وبنفس الوقت مابي لها الاحراج والتعليق عليها من الناس مدري وش اسوي شوفو المواقف اللي تصير لها وانتو احكمو من جد فشيله لها هلمواقف والله ..

1= امي من النوع اذا جا حد يسلم عليها على طول نزلت راسها عشان يحبونه ونا اقولها يا أمي لاتنزلين راسك للناس يحبونه لان فيه بعضهم اكبر منك وبعضهم مايبغون يحبون راسك كذا احراج عليك واللي يبغا يحب راسك هو راح يمسكك ويحبه ووالله العظيم شوف عيني كم وحده نزلت راسها لها وفشلتها وماحبت راسها وهي عاد من النوع اللي ترتبك من شوفة الناس لانها مو اجتماعيه بالمره واحس بنحراجها مع كذا ما تترك هالعاده والله العظيم ان حتى حريم اخواني اذا مانزلت راسها لهم يحبونه يسلمون عليها بيدهم اذا جا يمشون من عندنا ومتى مانزلت راسها لهم تشوفونهم كنهم يقولون وش تبي ذي ويحبون راسها بس وهم مايبون ومره وحده منهم طنشتها ولا حبت راسها وحتى لما نروح لمكان والله اشوفهم يطنشونها ومايحبون راسها اذا نزلته لهم لان فعلا غلط هالشي حتى مره نزلت راسها لوحده اردنيه زايرتنا واضطرتها انها تحب راسها ولا هي ماتبي اصلا واضح شكلها لانها مو مكلفه والله هي مو بنتها بس وش اقول حتى يوم قلت لها عن كذا قامت تبكي .


2= وهذاك اليوم كنا زايرين بيت خالتي وكانت فيه وحده مع امها وتقول لأمي عاد لازم تجين عندنا تروح وش ترد عليها يوه لا خلاص هذا احنا شفناكم هنا واذاجيتو عند اختي هذا نشوفكم والام وبنتها يقولون لا عاد لازم تجون لنا وهي تقول هذا احنا شفناكم رحت قلت لها يا أمي اذا احد قالك لازم تجون عندنا لاتقولين لها لا خلاص هذا احنا شفناكم وبس يكفي ترى كلمة ان شالله تسكت وفيها لباقه مع الناس قولي ان شالله حتى لو انك منتي رايحه ونا طول الوقت بس جالسه ارقع لها قدام الحرمه واقولها ان شالله ابشري اذا جا يوم وربي كتب راح نجيكم وهي تقول لااااا شنروح خلاص هذا حنا شفناهم طيب قولي ان شالله وهم راح يسكتون ماراح يردونها عليك من جديد المهم بالاخير وش سوت قامت تبكي ليه اقولها كذا .


3= يوم رحنا لبيت اختي اللي من ابوي هي طبعا ماتروح لها ولا هي تجي عندنا ولهم فتره طويله على هالحال بس اختي سوت عمليه من فتره طويله المهم بعد جهد جهيد اقنعتها نروح لختي ووافقت يعني تخيلو رحنا وبعدين جت بنتها صبت لنا القهوه شربت الفنجان وبعد كذا جات بتصب لها قالت لا مابي الى الان عادي بس بعدين قامت تاخذ الفنجان وتقلب فيه وتقول الله وش كبر هالفنجان اكبار واجد زين سكتنا رحنا من الغرفه اللي كنا جالسين فيها للغرفه اللي فيها اختي وسلمنا وجلسنا معاها وبعدين شافت الفنجان وقالت اشكبره مدري اشلون تشربون فيه قامت اختي تضحك وهي ترد عليها بضحكه بس تحسون من ردها عليها زي اللي تقول اشهالكلام المهم جينا بعدين وقامت تناظر بالديكور اللي حاطينه وتقول الله اشهالخشب اللي حاطينه يووووه وش هالدرج عالي درجكم وش هاللمبات وش هالثريا اشطولها خطر ماتطيح عليكم ..
والله ان اللي يسمعها يقول ماعندنا زي كذا ولا مو شايفين خير لان اسلوبها وهي تقولهم مابقى شي ماتكلمت عنه من اثاث بيتهم ونا انكتمت وسكت ولا قلت لها شي .


4= بنت خالتي تقولها عاد هذا امي ياخالتي تجي عندكم روحو لها مسكينه تنبسط معاكم لارحتو لها مسكينه جالسه بروحها تجي تقول لبنت خالتي لا والله اهيه اللي تجي عندنا احسن مانبي نكلف عليها وزوجها بخيل ولا يرضى لها تشتري شي خلي اللي عندها لهم عساه يكيفهم وعشان مايهاوشها ياربي وش جاب سيرة البخل وايش وليش يعني حتى بنتها قالت لها لاياخالتي ان شالله ان امي في خير ولا شي ناقصها يعني كنها تقول احنا اغنى منكم لاجاتنا ميخالف اما هي لا عسى اللي عندها يكفيها وفوق هذا تقولها لا محنا برايحين لاجيتو في العطله الكبيره ونا اقول بقلبي ااااااااالله العطله الكبيره عاد معقوله مانروح لخالتي الى العطله الكبيره والبنت تلزم عليها الا لازم تروحون لمي مثل ماتجيكم والله انها يستاسع قلبها فيكم وهي مستخسره تقول ان شالله زين قولي ان شالله كان سكتت ولا تعبتي البنت :confused:



والله مواقف لاتعد ولاتحصى من الاحراجات ونا اللي انقهر عليها قصدي من الكلام لها هو توجيها ابي اعلمها الذرابه في الكلام مع الناس مابي احد ينتقدها ولا يقول عليها كلمه وبالاخير تكون نهاية كلامي انها تبكي ولا تقوم من على الاكل والله العالم اني ابيها تكون احسن الناس وكثير انقهر من حاجات تسويها غلط واسكت بس مرات لساني يفلت مقدر اشوف الغلط واسكت وهي ماترضى اوجها عن اي شي ..

مدري وش اسوي معاها تعبت مره