ابنتي (الجوري) ابصرت النور.. قصة ولادتي

سلام عليكم ورحمة الله وبركاته

بنات بقولكم قصة ولادتي و ان شاء الله تستفيدون منها و تستمتعون بعد :)

 كانت في أحشائي 
بالقرب من نبضات قلبي
أصبحت الآن في أحضاني وأمام عيني
ابنتي (الجوري) أبصرت النور
فهي بين ذراعي اليوم... الحمد لله

طبعا موعدي المحدد كان بتاريخ 05/01/2013
يعني بالسنة الجديدة :clock:

دخلت شهري التاسع تاريخ 05/12/2012
و كنت مريحة نفسي عالاخر لاني مابي اولد في 2012 يعني لا مشيت ولا شي سويت يجيب الطلق :-#

كنت احس بتعب من الشهر الثامن بحكم ان ولدي صغير عمره سنة و اربع شهور يعني ما ارتاح كلش
و ماعندي وقت حتى انبطح و نومتي وحدة بالليل :badly:

تاريخ 10/12/2012
الساعة 05:20 الفجر وانا بعز نومي حسيت بشي نزل علي فزيت بسرعة رحت الحمام
الا نازل علي ماي فرحت لاني بفتك من الثقل وبنفس الوقت خايفة
مع اني حاطة في بالي ما اخبر زوجي الا لما يجيني ألم ما اقدر اتحمله بس لما صار الصج و جفت الماي لا شعوريا رحت له قعدته بهدوء قلت له حبيبي قوم شكلي بولد
فزززززززز و هو خايف قال لي شنووووووووو
شفيج شي يعورج قلت له لا بس نزل علي ماي و شاف ثيابي و تم خايف قال يلا المستشفى قلت له لا مو الحين حرام الولد راقد مابي اقعده هالحزة و بنتظر اييني ألم
اقنعته ينام و نمت يمه بس لما حسيته رجع نام رحت الغرفة الثانية لبست دلاغ و تميت امشي شوي بس تعبت و انبطحت شوي و غفت عيني و الا احس مرة ثانية شي نزل
قلت مابي انتظر بروح المستشفى اتطمن عالبيبي لان من دخلت التاسع والدكتورة تقول لي الماي قاصر فخفت عالبيبي
قعدت زوجي قلت له خلاص نروح المستشفى
و ولدي قعد ، فخذيته وديته بيتنا و رحت المستششفى طبعا قبل ما اخليهم يجيكوني رحت ادور لي غرفة وسبحان الله كل الغرف فل كانت و صادني احباط :thumbs_down:
الحمدلله ان كان في وحدة بتترخص
قلت لزوجي احجز الغرفة و كل شي لما الدكتورة تقرر ولادة
المهم رحنا حق يفحصوني الا تقول لي غريبة مافيج طلق و لانزل عليج ماي اقول لها مستحيل نزل ماي و انا والدة من قبل. و اعرف الماي مو اول ولادة لي
تقول لي انتي ناشفة
ياتني دكتورتي سوت لي ألتراساوند قالت لي الماي قصر زيادة بس الحين انتي روحي البيت اخذي غفوة بعدها امشي لما تحسين بألم رجعي
طلعت لزوجي و قلت له مافي شي شكلي باجر بولد
رجعت البيت و بعدها بساعة رد نزل علي ماي و قلت بصبر مابروح لين احس بألم و المغرب رحت انا و ولدي وريلي مع بيت اخوي الحديقة نتمشى و بنلعب اليهال
خذيت لي لفة بروحي و خليت ولدي يلعب شوي معاهم
بعدين تميت قاعدة
تعشينا و قلت لزوجي انا بتم في بيت اهلي عشان ولدي و لان شقتي درج و مافيني عالدري كلش
الساعة 10 حطوا الحلقة تميت اطالع و الماي يصب على خفيف.
جبت لي طشت و حطيت لي ماي دافي وايد و نقعت ريولي لين ما برد الماي
الساعة 12 رقدت و قعدت الساعة 12 ونص على ماي ينزل مني بقوة دمر لي لفراش و الزل كله بالغرفة
اتصلت بعمتي اول ما جافتني اتصلت بزوجي قالت له اييني لان مع الماي نزل دم
خذيت شور و رحت المستشفى
فحصوني الا انا مفتوحة 4 سانتي بدون ألم ما شاء الله و الماي تم ينزل ينزل ويع :badly:
اكره شعور عندي
الساعة 1 الا عشر يوم تفحصني
تميت لي 2 ونص تقول مافي ألم اقول لها ابدا
ركبوا لي الطلق الصناعي
ياتني بعد ساعة تقول لي ليحين ماتحسين قلت لها لا مافي ألم
و مايقدرون يفحصوني لأن الماي ما وقت و ماتقدر تفحص و الماي ينزل بهالطريقة
الممرضات خافوا لان بالخطيط يطلع لهم ان فيني طلق بس انا ماحس قالت ان هذا خطر لانهم مايدرون و يخافون اني اولد و هم مو حاسين فيني تمت الممرضة معاي ماهدتني و لا دقيقة
الساعة 4 الا عشر حسيت بألم خفيف بس بدء يزيد بسرعة ماقدرت اتحمل و اصرخ عالدكتورة اقول بلييييييززززز حمام
تقول لا ممنوع
حطولي شي ابيض تحتي مارضيت
جان اتييب لي شي فيه هوز تقول لي بحط لج هذي اذا في بول عزكم الله راح يطلع و ترتاحين و انا اقول لها لا لا مابي
و اهيا تركب حسيت ان في شي قاعد يدفع اقولها بسوي بوش تقول لا صبري توج 7 سانتي
اقول لا ماقدر ماقدر
لا شعوريا تميت ادفع و اتعصر و الدكتورة تصارخ لا صبري وضعيتج غلط
و قالت حق الممرضات رفعوها شوي فوق
و انا اعصر جان تصرخ الدكتورة تقول انها تشوف الراس خلاص بيطلع
و الدكتورة الثانية تصارخ عالممرضات تقول جهزوا للبيبي و نادو دكتور ماجد
الدكتورة كانت مهوسة علي مكان غلط اهيا تهوس عشان الراس يطلع و انا اشيل يدها
جان تقول لا لا
لا توقفين خلاص الحين بتولدين جان اعصر بقوة و حسيت بالراس طلع و اعصر بعد و طلعت بنتي حبيبتي الساعة 5 الا عشر
الحمدلله كانت ولادتي سهلة و فرق وايد بين ولادتي بولدي و ولادتي هالمرة ببنتي

الدكتورة كانت جدا ممتازة و نظفتني عدل و اهتمت فيني وايد
من اول مارحت المستشفى و جافوا اني مفتوحة 3 لي 4 سانتي يات و تمت تهمزني و تمسح على راسي


الله يرزقكم كلكم بولادة سهلة
و حطوا في بالكم لا خروع و لا خرابيط راح تسهل عليكم الولادة كل التساهيل من رب العالمين
انا ما سويت ولا شي لا تحركت و لا سويت شي غير ان لنا نزل علي ماي نقعت ريولي بماي دافي و بس


طبعا انا ولدت بمستشفى ابن النفيس بالبحرين
عند الدكتورة سونداري
انصح كل وحدة تروح لها لانها شاطرة وايد و حبوبة
انا صار لي والدة 9 ايام
من اول يوم الدم كان مو وايد نفس نفاسي بولدي
عادي مثل الدورة
و اليوم الدم كان خفيف و بعدها تم ينزل علي بني غامج ( سوري عالتوضيح )
صراحة خفت و كلمت دكتورتي قلت لها ليش الدم شوي قالت لاني نظفتج زين
الحمدلله حتى الخياطة مو حاسة فيها
حدي حبيت الدكتورة
كنت اقول مابي احمل بعد بس الحين لو فكرت احمل اكيد راح اخلي نفس الدكتورة تولدني

وبس
اسفة عالاطالة
اي سؤال او استفسار انا حاظرة