اتكفون ردوا علي

بسم الله الرحمن الرحيم
السلام عليكم ورحمة الله وبركاته

أنا حبيت أشارك بهالقصه وأبى من الأخوات العضوات الرد بس يا ليت ما تقسون علي ..

تعرفت على وحده من البنات عن طريق الهاتف وعلاقتنا دامت تقريباً سنتين ويمكن اكثر وكانت علاقتنا قويه البنت كان تعاملها وياي خيالي كانت مثال للصديقه فعلاً كنت لما أمر بضيقه الاقيها قريبه مني .. في الأعياد كانت تسلم علي قبل تروح لبيت أبوها الكبير .. حتى لما كان عندي ظروف كانت هي الوحيدة اللي قريبه مني وواستني وما لقيت من صديقاتي أحد غيرها يوقف بجنبي ..
كل هالكلام وأنا وياها ما نعرف بعض إلا بالتلفون .. يعني لو كنا في نفس المكان ماكنا عرفنا بعض ..
بداية التعارف كان فيه خلاف بيني وبين وحده من اعز صديقاتي وكانت أهي قريبه لها فقامت وكلمتني علشان تحل الخلاف اللي بيننا .. ومن هنا بدت العلاقة ..
حبيتها من جد لاني حسيتها فعلاً فيها كثير من اللي تمنيت الاقيه في صديقاتي ويمكن كان التواصل والسؤال الدايم أهم شي
كانت أفكارها قريبه من أفكاري ..
حبيتها فعلاً و أتحدى لو تلاقي في الكون كله من يعوضها عن حبي او حتى يعطيها نصفه .. كانت عزيزه علي مثل خواتي ..
كانت لما تكلمني تقول لي بعض الخواطر اللي كتبتها وتأخذ رأيي فيها وكانت تقول إنها كتبت هالخاطره فيني وما أنكر ان كتاباتها كانت حلوه حتى أنى كنت أشجعها تنشرهم لانهم حلوين ..
وكانت تقول انها في كل مكان تحكي فيني بين اهلها بين صديقاتها حتى ان الكل يبي يتعرف علي ..
كانت دائما تقول بيجي اليوم اللي نشوف بعضنا فيه ..
الله كتب وشفتها في مناسبه بس اهي ماشافتني .. فيه بنات دلوني عليها ..
صديقتي اللي كان الخلاف اللي بيني وبينها سبب في تكون هالعلاقه .. كانت دائما تقول لي اتركيها لاتكلمينها وكنت مستغربه كيف واهي قريبتك وكانت سبب في حل المشكله اللي بيننا وتقولين عنها كذا ..
في البدايه اتوقعتها غيره .. تخبرون غيرت الحريم ..
وكانت تصر علي اني اقطع علاقتي فيها ولانها كانت كل مكالمه تسألني انا قطعت علاقتي فيها ولا لا كنت اقولها ايه ماعدت اكلمها .. بس بصراحه مليت من الكذب..
فقلت لها وبصراحه انا ماقطعت علاقتي فيها لاني ماشفت منها شي ولا حتى سمعت منها أي كلمه مو زينه ..
ولان طبعي ماأغير نظرتي في الشخص ولا احكم عليه ليما اشوف تصرفاته .. رفضت اسمع كلامها ..
فقالت لي اني انا اللي راح اندم بعدين قلت لها ليش قالت بكيفك .. ما اهتميت ..
لاني ماشفت أي شي يدل على كلامها .. وبعدين ما كانت توضح لي وش تقصد بكلامها ..

المهم :
علاقتنا كانت قائمه بس بدت تفتر حتى لما كنت اكلم كانوا اهلها يصرفوني كل يوم تصريفه شكل ..
مره في السوق .. مره تصلي .. ومره عندها ضيوف .. واحياناً ترد اهي علي وتقول انه عندها ضيوف بس على الباب بيطلعون ثواني اودعهم وارد اكلمك ..
انتظرت .. وانتظرت .. وكلمتها ليما مليت نفس الاعذار ونفس الردود .. كنت كل اسبوع اكلمها ..
تركتها و ما كلمتها بس والله ما جابت لي خبر ولا كلمتني ..
لما كلمت صديقتي الاولى وقلت لها انها ما عادت تكلمني ولا ترد علي اشفيها علي ما تبيني .. كانت تدور لها الاعذار .. اكيد مشغوله .. اكيد عندها ظروف .. بس اهي تحبك ..
بس اعذارها ماصرت اصدقها لانها لو تبيني تكلمني لو بس تسأل عن اخباري ..
تركتها شهور مو يوم ولا يومين ... ماسألت فيني قلت لصديقتي اني ماراح اكلمها وحتى لو كلمتني ماراح ارد عليها .. لاني اكتشفت انها كانت تحكي من وراي وتقول فلانه قالت وقالت وانا ماقلت شي ..
كانت تشوف قريباتها وتقولهم اهي تبي تتعرف عليكم واتجيني وتقول انهم يبون يتعرفون علي ..
ومافيه احد منا اساساً سأل عن الثاني .. لما عرفت قلت اكيد بحسن نيه ماتقصد شيء ..
لكن صرت اكتشف اشياء تقول اني قايلتهم وانا ماقلت شي حتى لصديقتي اللي حذرتني منها.. حتى انه حصل خلاف بينها وبين وحده من قريباتها لما درت عن تصرفاتها فقامت اهي واتصلت فيني بعد غياب وقالت اذا سألتك قولي كذا وكذا .. يعني تملي علي عذرها اللي تبيني ارد فيه على قريبتها ..
حاولت كثير اني الاقي لها العذر بس والله مالقيت لها أي مبرر على تصرفاتها معاي ..
وقطعت علاقتي معاها للابد ولما قلت لصديقتي اللي كانت تحذرني منها قالت تستاهلين دائما كنت اقول لك اتركيها وانتي تعاندين وانا فعلاً من النوع العنيد اذا ماشفت الشي بعيوني ماقدر اصدقه ..
عرفت بعدين انها من النوعيه اللي كل شوي مع شخص جديد بحياتها وتنسى القديم ..

ياااااااااااااااااااااااه

ما صحصحت الا بعد فوات الأوان وعرفت أش كثر أنا جاهلة ..
الله قدر وكلمت وحده قريبه لها حيل فقالت هذا طبعها حتى مع اقرب الناس لها ..
وفي مره الله كتب وحضرت مناسبه كانت اهي فيها والله يوم شفتها تمنيت الارض تنشق وتبلعني لاني كل ماشوفها اكره نفسي اكثر من الاول واحقد على نفسي .. لما شافتني جتني وسلمت علي بس والله سلامها بارد قالت لي اخيرا شفتك .. وراحت وخلتني مرت على قريبتها صديقتي وقالت شفتها ومشت وتركتها..
لليوم صار لنا سنتين متقاطعين إلى ثلاث سنوات ما سألت فيني ..
والى اليوم وتصرفها مأثر فيني صرت لما اضحك مع أي انسانه اقول انها بيجي اليوم اللي بتسوي فيني مثل فلانه .. وتموت الضحكه ..
ماعدت قادره اتناسا تصرفها معاي .. حتى صديقاتي القديمات تركتهم وماعدت اكلمهم مو مني والله غصب عني ما عاد اقدر اكلم احد فيهم ..

أبى رأيكم بصراحة ويا ليت ما تقسون علي ..

الحمد لله مافيه احد يقدر يحكي عني بكلمه شينه لاني انسانه محترمه وخلوقه والحمد لله الكل يشهد لي .. صحيح هاديه بس عنيده وراسي يابس ..

من جد ابي اتخلص من هالاحساس القاتل واللوم لنفسي لاني عطيتها وجه من البدايه وصدقتها ..
حتى لما تركتها كلمت صديقتي وقلت لها قولي لقريبتك اني مابي منها شي مسامحتها واذا انا في يوم زعلتها او بدر مني شي تسامحني وكذا اعتقد اني ماقصرت معها ..
* بعد هالقصه كل فتره والثانيه يحصل لي موقف قريب من الموقف السابق وتنتهي العلاقه اللي كانت قائمه او اقل شي يصير.. تشين الخواطر.. كثير من اللي كانوا حولي تحولوا الى اعداء الا الصديقات اللي من بعيد رغم انه مافية ولا وحده تعرضت في يوم لاي كلمه مني لاني تعودت اكون كافيه خيري شري بس الحسد الله يكفينا شره و الغيرة ..


على فكره انا كنت استسخف كلمة فلانه والله تغار مني ليما جربت وشفت الغيره كيف حطمت الحب اللي كان ساعـــتها بس عرفت ان الغيره بلوى الله يكافينا وياكم شرها ..

اتمنى اشوف ردودكم علي ..