تعبت من خيانة زوجي شالحل؟

السلام عليكم

كنت كاتبه مشكلتي بالتفصيل بس انمسحت بالغلط للاسف .. بحاول اختصر ..

كل مره اكتشفت ان زوجي يكلم غيري فالتلفون سواء بالكتابه او بالمكالمات .. واذا حاولت اواجه يقولي انتي تتوهمين وهالشي ماصار وماعندي حد غيرج طبعا يحاول ينكر لكن هو كذاب وانا عارفه ومتأكده انه يكلم ..

المهم زوجي مايحب البلاك بيري ومكنسله من فتره يقول لانه مزعج ومايستفيد منه .. وفجأه لقيته شاري بلاك بيري .. وماضافني استغربت عبالي بكون اول وحده فلستته .. قالي لا ماراح اضيفج غريبه مع انه كل مره لما يكون عنده بلاك بيري يضيفني الا هالمره وفهمني انه ماراح يطل فالبلا بيري وانه بس لحق ربع الدوام مشيتها ..

الاخ فالبيت اشوفه صار يقعد وايد عالبلاك بيري ويكتب فيه يعني يبين ان في شي .. ولما اقرب منه يحط التلفون عشان ماشوف شيسوي .. وهو حاط باسورد على تلفونه قلتله ليش الباسورد يقول بس انا فالدوام اخلي تلفوني واروح عنه ويمكن حد يطل فيه وفيه صوركم واشياء خاصه !! خير من متى فيه صورنا وتلفونك يديد وماستخدمته ولا صورتنا ولا شي .. حتى رقمه اللي اتصله عليه وكل شي فتلفون ثاني مش البلاك بيري ..

وهو قالي لو تبين تشوفين تلفوني عادي بعطيج تشوفينه .. قلتله عطني الباسورد رفض .. المهم امس رحتله لان كان قاعد عالبلاك بيري ويكتب وقلتله عطني تلفونك قالي ليش قلتله ابي اشوفه قالي شتشوفين مافيه شي قلتله معليه بشوفه قالي لا ماراح اعطيج ولا راح افتح الباسورد .. خليته وقمت سحبني وقالي صدقيني مافي شي وانا عارف شتفكرين .. وبعدين قالي اوكي بعطيج تشوفينه بس دقيقه ومادري شمسح المهم عطاني توني ماسكه التلفون الا يقولي عطيني اياه انا براويج .. دش عاللسته وفره سريعه مامداني اشوف شي وسحب التلفون اقوله زين عطني انا بشوف بروحي وبرجعه مب ماكلته مارضى كلش .. وطبعا لقطت اسم بنت فاللسته وطبعا انكر وقال هذا رفيجي وعادي الشباب يسمون جذي .. اسم دلع بنات شدعوه اسم واحد !!

مشكلته عباله اني غبيه ومافهم حركاته وانا اقل حركه تلفت نظري واعرف معناها .. ونسيت اقولكم سالفه صارت قبل .. طبعا انا خذت البن كود ماله من على كرتون التلفون وضفته عندي وغيرت نك نيمي وكان يبين ان وحده طبعا الاخ قبل الاضافه وكان يسولف معاي وعادي عنده وقلتله لو مضايقتك عادي بحذفك قال لا مافيها اي ازعاج وحياج الله << شفتوا مسكين صادق مايكلم بنات .. المهم كنت اسولف معاه عادي وقالي ان مرته ماتدري عن هالتلفون ولاتمسكه شرايكم؟ وطبعا كان مستعيل اول ماطلع من البيت قالي اشرايج اتصلج ؟ طبعا رفضت لان بيعرف ان هاي انا .. وكان عادي عنده يشوفني فمكان عام .. وقالي بطريق المزح تبين امر عليج اطلعج عاد مادري من صجه ولا مجرد مزح .. وكان يحن يبي يشوف شكلي ..

وطبعا اخر اليوم اكتشف ان هاي انا انصدم وتفشل من نفسه وماعرف شلون يتصرف معاي وبس كان متغير معاي في ذيك الليله يعني مهتم يعني يكفر عن ذنبه وطبعا قلتله انسى اللي صار وكنت اكلمه واعامله عادي واقلتله احبك وكل شي وحتى امس يوم قلتله عطني تلفونك ولما شفت اسم بنت وقلتله هذي بنت بعدها طبعا هد تلفوناته وقعد معانا وتصرف معاي بطريقه اللي تبين انه مذنب ويبي يرضيني ويكفر عن الشي اللي مسويه ..

امس قعدت افكر شسوي فيه ماعرفت قمت اكلمه عادي كانه مافي شي صار ونمت عادي بس من قمت كأنه حالي اعتفس مب قادره انسى حركة امس ونك البنت اللي شفته .. يعني تخيلوا شعوري كل مايقعد عالتلفون انا شيكون شعوري؟؟ لما يطلع برا بروحه يمكن يكلمها تلفون او فالبي بي شدراني انا .. يمكن رايح يشوفها يمكن اي شي صح ولا لا ..

وامس قالي بمر على الربع نص ساعه الا رد البيت استغربت قلتله شفيك ماطولت قالي لا غيرت رايي ورجعت طبعا تحليلي ان هو كان يبي يطلع شوي بروحه عشان يقدر يتكلم فالتلفون ورجع ..

انا ماتوهم ولا اشك فيه بس حركاته اللي يسويها كلها تبينلي هالشي .. وبعدين انا طوفت وايد وخلاص لاعت جبدي كل مره نفس السالفه كل يوم يكلم وحده ومادري شيسوي من وراي .. غير تصرفاته الثانيه اللي اكرهه بس صابره عليها .. مثل دخوله مواقع اباحيه او احصل صور اباحيه فتلفوناته الخ ..

الحين ابي حد يعطيني حل .. انا اليوم من قمت احس اني كارهته ماكلمته ولا عطيته ويه لبست وقعدت مع اليهال .. يعني اكلم اليهال عادي بس ماكلمه ولما يكلمني اكلمه من طرف خشمي يعني مطنشته .وهو يقولي شفيج شكلج متضايقه قلتله مافي شي بس اكيد هو فاهم قصدي. من شوي طلع حضرته ماكلمته ولا سألته وين رايح .. وطرشلي مسج ان انا مع ربعي بس مارديت عليه ..

وقلت بعد شوي بطلع مع اليهال وبطرشله مسج انا طالعه وبستمر على التطنيش مادري افكر اروح بيت هلي او انفصل .. اعرف بتقولون هدي وكل الرياييل جي بس لاعت جبدي منه استغفرالله مايستاهل شي .. بدل مايحمد ربه ان صابره عليه وانا الحمدلله ماينقصني شي والف واحد يتمناني .. حسبي الله ونعم الوكيل