مشكلة زوجي والمستشفيات

السلام عليكم اخواتي



ما اعرف من وين ابدأ ....دايما انا وزوجي في خلاف
ولدي من وهو صغير وانا احس انه يحك في اذنه بطريقة كأنه تالمه ... اكلمت زوجي زوجي يكره شي اسمه اطباء مع ان ابوه طبيب واخته طبيبة ...ورفض اني اوديه الطبيب
كلمت ابو زوجي وقال لي لانه مزكم قلت له ان هو من فترة طويلة يحك اذنه والزكام من اسبوع ...المهم ما كبرت السالفة لان هو طبيب وهو ادرى




بعد كم شهر ولدي اذنه رجعت تالمه مرة ثانية وكلمت ابوه ما طاع نروح الطبيب ...فقمت انا وامي رحنا الطبيب وطلع ان عنده التهاب مزمن في اذنه ...الكلام هذا وولدي عمره تقريبا 10 شهور



الحين ولدي الحمدلله كمل سنتين و9 شهور وانا دايما احرص ان يوم الجمعة انظف انفه واذنه يعني حمام خاص يوم الجمعة واقلم اظافره وهكذا فحسيت ان اذنه شبه مسدودة بالشمع ....حاولت انظفها فرفض لانها تعوره قلت مومشكلة بحاول الاسبوع اللي بعده


وقريت من كم يوم عن التهابات الاذن ومشاكلها وتاثيرها على السمع فخفت ان ولدي سمعه يتاثر خصوصا ان هذه الاذن بالذات دايما فيها شمع اكثر من الثانية وعلى كلام الطبيب انظفها بحذر من برا يعني ما ادخل قطنه الاذن وايد على الاطراف


اتصلت بزوجي وقلت اني بروح اشيك اذنه فوافق رحت لنفس طبيب الاطفال فقال لي ان هذا تقريبا شمع والافضل تروحي لطبيب انف واذن وحنجرة يشوفها وينظفها


رجعت وكلمت زوجي رفض وبعد ساعة تقريبا قال لي خلاص مومشكلة نروح مع اني مومقتنع اي حد ممكن ينظف الاذن لو عنده الادوات مو لازم اخصائي ...قلت له مومشكلة نروح لاي حد بس مضمون المهم اتطمن على صحة ولدي


رحنا لاخصائي الانف والاذن والحنجرة فشاف الاذن بجهاز مثل المنظار ونحنا بعد شايفين معاه كاننا دخلنا الاذن حتى الطبلة تشوفينها كانت اذنه ملتهبة جدا جدا ولونها احمر والتانية طبيعية وفيها شمع بس النسبة عاادية مو زيادة ...وبعدها قاس الضغط امام الطبلة وخلف الطبلة لقى ان وحدة شبه عادية والتانية الملتهبة مافيها اي ضغط مسدودة يعني الهواء ولا يدخل ولا يطلع ....وقال ان هذه بمرور الزمن تاثر ...قلنا له من شو قال من عدة عوامل المكيف والمشروبات الباردة واشياء وايد تسبب الالتهاب بس احيانا في اشياء ما تكون ظاهرة تكون مخفية المهم ....كتب لنا ادوية واعطانا الفحوصات وقال لازم لازم بعد 7 ايام نرجع مرة ثانية




المشكلة


اول ما طلعنا من الطبيب وزوجي يهاوشني الولد ما فيه شي وهذا طبيب كذاب ومتفلسف وما بجيب الدوا ولا برجع له قلت اوكي نروح للطبيب اللي انت تثق فيه قال لي انا اصلا ما احب الاطبااء والمستشفيات وما بوديه خليه لما يصير شي نروح المستشفى الحكومي قلت له اوكي خلينا نسوي له بطاقة ونتابع هناك اللي تباه بس مصلحة الولد قال مرة ثانية لو شو ما صار لا في اطباء ولا مستشفيات ولا تقولي له انه مريض ولا من يحزنون خليهم يمرضون بنفسهم ويتعالجون بينفسهم ولا ادوية ولا مستشفيات ...



انا الصراحة قررت اني بعطيه فرصة 3 ايام ولا باخذ الولد بنفسي لطبيب تاني وبجيب له الدوا بكرة لا سمح الله لو صار شي للولد بيكون اهمال من الام يعني انا ولا شنو رايكم شورو علي