الامير عبد العزيز ابن سعود ((السامر))

ما على الدنيا هنِيْ

الله الله ما على الدنيا هنِي
قبل اقوله ردّدوه أهل الهوى
ما قدرت أوقف وأشوفك منثني
مع شعرك اللّي تثنى والتوى
الشعر لفّ القوام وشدّني
التوى بك يستجير من الهوا
ناظري قدّام حسنك ينحني
إن رفعت الشوف عوَّد ما قوى
ناظر عيوني بعينك وألهني
ألهني مع هاجس ٍ بك ماروى
آمر كبار الأماني وأنهني
قبل ما يقضي على العين النوى

هضيم كشح



يا ساجع الرمش ما فيني مكفيني
هضيم كشح وشعر وعيون فتّانه
آيات حسنك عن اللوعة تهدِّيْنِي
إقر الهوى في عيون ٍ منك ظميانه
أشوفك النور نورك ساكن ٍ فيني
أشوف به واطلق عيوني بميدانه
صوّرْتٍكْ الشعر حاسب لا تعنيني
قصيدي ألفاظ شاعر حبِّكْ أوزانه
صوتك عن الناس ياخذني ويلهيني
ومسامعي لاعذَبْ الأصوات ولهانه
طيفك عن الناس يبعدني ويدنيني
وافرح ولو الصّوَرْ بالطيف خوّانه

حقيقة


الورد خلّه بالغصون الوريقه
لا تقطع اللِّي وصفها وجنتينك
وردٍ شذا عطره يعطِّر طريقه
يوم أسقته قبل أمس لمسة يدينك
وردك حياتي كلَّها في رحيقه
والورد زينه جمعته في يمينك
بين الورود وبين خدّك حقيقه
يشوفها اللِّي شاف بالعين زينك
لين التوى في ناظر العين ضيقه
لمحت به عين الرضا في جببينك
عيني على شوفك وقربك شفيقه
متى على الله تهدي الوصل عينك
البعد يا مغلي حياتي ما أطيقه
الله على غالي ثمنها يعينك

ظميان الهوى



سحاب ظميان الهوى بلّ ريقه

إمطر عسى الله منك يروي ظما القاع


في عاتقك برق ٍ جذبني بريقه

لحبٍّ لقيته فيك من ع قب ما ضاع


برقك يرد اللِّي غدا عن طريقه

يتفضح بنوره حيرتي كل ما شاع


عنك ورعدك البعد والله مااطيقه

صوتك يرنِّمْ بالحيا صمّ الأسماع


سحاب أناظر لك وأقول الحقيقه

عن شوف غيرك عوِّدْ الشوف مرتاع


مشاعري من فيض شوقي غريقه

وأنا جفافي للغلا الظامي شراع


لا تحسب إن غصون قلبي وريقه

خضار عرق ٍ ينقله و افي ذراع


محتاج لوعود السحاب الوثيقه

في غير وصلك بالهوى مالي أطماع

العناء الجميل



يا قريب القلب لو دربك بعيد
جيتك أطوي وحشة الدرب الطويل
كل ماطال المدى شوقي يزيد
العنا اللِّي منك في عيني جميل
المسافه همّ والغربه قصيد
والدواة أسقيتها من سلسبيل
الغلا اللِّي ساكن ٍ حبل الوريد
ساقني لك وصل ياالحب البخيل
جيت أموت بعينك اليمنى شهيد
وعينك اليسرى بها شفت الدليل
في يديك القلب وإفعل ما تريد
وإفهم إنِّيْ فيك ماارضى بالبديل
مهدي ٍ حبِّي مثل هدو العبيد
وما على مهدي الهدايا من سبيل
حق عين وحق رمش وحق جيد
يا بدر شهر الحسن مالك مثيل
كلّ شي ٍ بالمحبه لك جديد
غربتي لك شوقها معني الرحيل

جرح ٍ جديد

ودِّي تشوف الهم وشلون سوّى
في حال من حبّك على غير مصلوح
جرحتني جرح ٍ جديدٍ تلوّى
على خفوق ٍ منك بالحيل مجروح
وسويت فيني شي ماينتسوى
واقول ياسيد المماليح مسموح
ليتك بزلاتك عليّه تروّى
يوم إن حبي لك من الروح للروح
إن كان حبل وصالنا ماتقوّى
فالله يعين عيون سامر على النوح
لا يابعد من جابوا آدم وحوّا
خطاك مهما صار منسي ومدموح

ارحـــم





كن عند الناس مالي فيك حاجه
أقهر اشواقي وأنا جرحي خطير
من جرح له جرح ينْشَدْ عن علاجه
عالج بوصل الهوى الجرح الكبير
وخلّ حظي بالغلا يرفع حجاجه
إمسح بلفتتك دمعات النظير
يا عنا شفّ المولَّع وابتهاجه
التوا حبّكْ بأدّقْ من الحرير
واحتبس دمِّيْ وقلّ ابه انزعاجه
وضاق بالحب الوريد الله يجير
أنشر الرحمه على قلبي وناجه
قبل أموت ارحم وحدِّدْ لي مصير
شوف عيني وقّفْ بعينك مداجه
وأرجي إن الحب يحيا به ضمير

F:الله يجازيكF:



أتعبت نفسي في غلاك وتغليكF: غالي وادوِّرْ يا هوى البال ما ارضاك
ولو إن مالي بالهوى رغبةٍ فيكF: لأقول لك يا مقيط في كفّك ارشاك
لاشك أشوف القلب لا حل طاريك F:يجيه رعشه وانتفاضه اللاماك
والأكبر إن العمر روَّح وأنا أرجيكF: ولا عشقت عيون هذا ولا ذاك
أصبحت لعبه بين أنامل أياديكF: تصدْ عن شكواي واشقا لشكواك
وتبخل بوصلي يا حبيبي وأنا أعطيكF: حبّ ٍ تدور به المحبه بالافلاك
وجازيتني بفراقك الله يجازيكF: وحرمتني من شوف طلعة محيّاك
بالغ بتعذيبي ولا نيب مصخيك F:يا سيل تسبقك العجاجه بمنشاك

جرح ٍ على جرح


لو إن جرحي منك جرح ٍ على جرح
والله لأمشي لك على كلّ ما ارضاك
آخر جروحي يوم ناقف ورا السرح
وتضفي عن الماشين من دوني رداك
ولولاي أخاف اليوم من طولة الشرح
والله لأزور حماك ما هوب يخفاك
شيَّدتْ لك في خافقي بالغلا صرح
أسكنْ بقصر الحب وأسعد بدنياك
شوفتك تحيي بالوصل ميِّت الفرح
تبي الحقيقة .. من عرفناه يفداك

يا عونة الله


عدِّلت مايل حظي اللِّي معك مال
العام وإلاّ اليوم صعب اعتداله
عليك حالي كل يوم ٍ لها حال
يا عونة الله حالتي منك حاله
الليل عقبك يا هنا شقوتي طال
عساه ما يصعب وتطْوِلْْْ لياله
الكلمه اللي قلتها لي على البال
تلقي بوجه اللي يودك دلاله
الوصل ما يدنيه جاه ولا مال
لو يرخص اللي ذاق وصلك حلاله
أطوي هموم الياس عن وجه الأمال
وتظلم ولكن ظلم حبك عداله

وَقِّفْ




كسِّر شعاع الشمس واكتب بكفِّكْ

نا السحاب ومشكل الوسم مفضوض


هب الهوى لك يا سحابي ولفِّكْ

وعيني ورا برق ٍ مقاديمه اتنوض


سحاب شفِّيْ مدّه الله بشفِّكْ

شفٍ يعانق شف والحب مفروض


غرّ المعاني واقفاتٍ بصفِّكْ

يا الأشقر اللِّي فوق الأمتان منقوض


وحسن ٍ تفرّغ لك لحالك وضفِّكْ

أنا أشهد إنَّهْ يا اتلع الجيد محظوظ


سحاب ناجاني عن الحب عفّكْ

وقِّفْ ترى لي فيك غايه وملحوظ

معذور


كنّا وكان الحب لك بالوفا حيّ
يومك تَخَتدْع العين بدموع عينك
اليوم ماكنّه جرى بيننا شي
تصد ترضي بالجفا عاذلينك
خلاص عفت مشاهدك وانطفا
الضي في عين مخدوع ٍ بعطفك وزينك
الشمس لي وأهديك حقِّي من الفيّ
عليّ ما تقضب دليل ٍ يَدْينِك
أصبر وأنا باصبر على صبرك شويّ
ولابد مايظهر دليل ٍ يِدِيْنك
أحتجت لك حاجة ثرى نجد للمَيّ
وصفحت عنِّيْ والنهر في يمينك
واليوم باطوِي صفحتك بالهوى طيّ
ومعذور لو طفيت شمعة سنينك

وما شفت أنا روض ٍ فرق فيه زملوق
إلاّ لقيته ينثني كنَّهْ إياك

أناظرك مثل القمر طالع ٍ فوق
لاغبت أشوفك مشرقٍ لي بالفلاك

سحر الهوى في ناظرك ساقني سوق
وأكبر دليل إنِّي تولَّعت برضاك

خلاّك تهدي لي من عيونك الشوق
وتصدّني عن شوف هذا وهذاك

مرارة الأمل

تغيب الشمس وظل الشمس باقي
ظلام الليل من باكر تزيله
يجي عند الطلوع الْهُمْ عناقي
وداع ٍ ربك الخالق كفيله
وداع ٍ عند نشوات التلاقي
تموت ابْه النفوس اللِّي عليله
يحوِّل حظ والاّ حظ راقي
بجرح ٍ واعنا روح ٍ تشيله
ويسقي ظامي الأقدار ساقي
ويعطش واحدٍ كبده غليله
أنا ماأقوى على وحشة فراقي
ولكن وطأة أيامي ثقيله
أشوف إن الأمل مرّ المذاقي
ولكن فيه فرحاتٍ طويله
وإلى من الصَّدِر لَجْلَجْ وضاقي
أدوِّرْ راحته بأيَّةْ وسيله

عز الهوى

إما قطفت الغصن في وقت حلَّه
ما أروَت ظماي وعود باكرعلى خير

قريت مردود السلام.. قّدام أسلَّم و اسألك*****
قريت حبٍ مايهون.. وخيول شوق ٍ مسرجه
على النحر خصلة ظلام.. ليلك تركها تشغلك*****
وعلى بحر نجل العيون.. حبي على النون انسجه
ما يستحي فيك الغرام.. سبحان ربٍ كمَّلك*****
للورد بالشفه غصون..واللَّي ورا الورد فلجه
أبعدت عني ياحرام.. ياحظ يالغالي هلك*****
اللَّي على شوفك تمون.. من شاف حسنك يبهجه
أنا العليل المستهام.. الشعب أنا وأنت الملك*****
ارحم عيون ٍ يسهرون.. ارسم طريقي وانهجه
علّمتني معنى الكلام..ما قلت لي قد قلت لك*****
قريت في وجهك ظنون..لاضاق صدري تفرجه

سبع الجروح


مثل السما ابعد عن يدي ويصافحك كفْ العيون
أمدْ عيني للسلام يمنا حنانك مدّها
استعصم ببعد المدى والشوف مرسول ٍ يمون
ونظرات عيني في سما باهي جمالك شدّها
أشدْ وانْزل والركأيب في مدى حبك ظنون
تَتلني لك بالهوى ولا نجحت بصدّها
جرح ٍ يزيد بشوفتك من فتنتي بك يا فتون
وجرح ٍ يزيد بغيبتك هذي جروحك عِدّها
جرح ٍ يهون بخاطري والاّ فجرح ٍ ما يهون
وجرحين من وصل وجفا وسابع جروحك مجدها
عطني أمل .. كلك رجا.. إن اليتاما يفرحون
افتح لي ابواب الغلا وإلاّ تفضّل ردّها
في شارع الحزن الطويل آقف مع اللَّي ياقفون
واحب من عذرا الهموم اللَّي تجيبك خدّها
صب السما نور القمر في عين وجدان مغبون
والنفس ما تحيا وهي محرومةٍ من ودّها