خطيبي توفـــى

السلام عليكم ورحمه الله وبركاته

لا اعرف من وين ابدأ ..

انا وحيده ... اعيش في سكن لاني متوظفه في منطقة واهلي في منطقة ثانية ... ما اشوف اهلي الا في الويكند ...


كنت هنا في هالمنتدى من 3 شهور استعد لتجهيزات عرسي .. مع الغاليات بنات عمان في قسم التجهيزات .... اممم جهزت كل شي .. وخلصت كل تجهيزاتي...

كنت فرحانه لانه اخيراا بعد 14 خطبه ما اتوفق فيها كلها مشاكل ومعارضات من الاهل انه اهلي اخيرا وافقوا لحد وتمت الخطبة

الشهر الماضي صار لخطيبي حادث سيارة وتوفى (الله يرحمه ويغفر له يا رب )

شعور ما اقدر اوصفه ... صدمة ما بعدها صدمة

كان باقي لنا شهر ونعرس ..

الحمد لله على كل حال ... انصدمت يا بنات لدرجة ظهرت لي الثعلبه في راسي من أثر الصدمة والحالة النفسية ....

صبرت على هالظرف وكلي ثقة بربي انه هالشي خيره ربما تكون لي او لخطيبي ... يا رب انك ترحمه وتغفر له ...

رجعت للسكن اللي كنت احسب الايام والليالي اني افتك منه ومن الوحده اللي انا فيها ... شفت اغراضي المكودة في الغرفة وتجهيزاتي مال العرس .. تذكرت كلامه لما يقول اصبري ماشي باقي وبطلعك من هالسكن .... زادت معاناتي ... اتذكره يوميا


كلامه كان يرن في بالي لما يقول لي (ابا اجن لين ايي العرس متى بيي العرس) ... مسجاته لين الحين في تلفوني ... صورته .... هداياه ...


الوحده يالسه تزيد من معاناتي ... لا صديقات عندي ولا حد يسليني ....

اشغلت نفسي اقرا قران وادعيله ...

داومت ... كل العيون فالدوام نظرات حسرة وشفقة زادت من معاناتي ...


هذا الشي صار لي من شهر ... وانا احمد ربي والله اني راضية بحكم ربي ... وصابرة ...


اسفة لطرح هالموضوع ... مجرد افضفض لكم .. والشكوى لغير الله مذله


بس الحين صار لي موقف وابا مشورتكم لانه العقل عندي متوقف ما اقدر افكر ولا اقدر اتخذ قرار

اهل المرحوم من اروع الناس اللي عرفتهم وقفو معي في هالظرف ... المصيبه بالنسبة لهم اكبر وكيف لا واللي فاقدينه اعز ابنائهم ...

اهله ربي يحفظهم اهتموا فيني اكثر من اهلي اللي هم عمومتي وخوالي ... انا ابوي متوفي وعندي امي الله يحفظها ما قصرت معي فهالظرف

المهم ما اطول عليكم ... اهل المرحوم لما زرتهم ... من اسبوع تقريبا ... انا وامي وخذينا لهم فلوس المهر نرجعه لهم ... هم ابدا ما طالبونا فيه ولا جابو سيرته ... واحنا نعرف الاصول ... ام المرحوم قامت تبكي وتقول انه هالبيت ما اباه حد يدشه غيرك وابو المرحوم قال لي نفس الكلام وكلام وايد ما اتذكره لاني كنت ابكي وما اقدر اوصف لكم المشهد الكل كان يبكي حسيت انهم تعلقوا فيني وايد لدرجة امه تقول لي اباك تقضي رمضان عندنا قلت لها ما يصير ... وعقب ابو المرحوم قال نحن نباك لولدنا الثاني وهو اخو المرحوم وانه ما كانوا يبون يطرون السالفه هالوقت لانه مب وقته لكن لما شافونا ردينا المهر اضطروا يقولون ... يقولون خسرنا ولدنا وما نبا نخسرك انتي بعد ....


بنات والله انه هالعائله حبوني اكثر من هلي وانا بعدني ما سكنت معهم ولا شافو خيري ولا شري ...

انا ما اتخيل اني اتزوج هالفترة وانا شلت سيرة الزواج من راسي ... وما اقدر انسى المرحوم بهالسهولة

ومستغربه من قوة صبرهم ومن اقتراحهم اخذ اخو المرحوم ...

امي تقول لي مصيرك يا مريم بتعرسي وانه تاخذي ولد هالعاىله افضل من انك تتزوجي غيرهم

هم غرقونا بافضالهم ...


والله يا بنات ما اعرف شو اسوي... شو تقترحون علي .. انا حالتي النفسية ما تسمح اتخذ قرار .. مخي متوقف... قلت لامي انتي قرري بدالي هالمرة انا ما اقدر اتخذ قرار بس ما وافقت قالت الراي لك


شورو علي