زواج زووووووووجي غدا

انا بصراحة محيرني شي


انا عارف إنه مو من خصوصياتي هذا الشي

لكن ليه لما المرأة زوجها بيتزوج عليها تقلب الدنيا

ليه ما تدور السبب الي يخلي زوجها بيتزوج عليها

اكيد إنه في سبب

طبعا ترى اقول هذا الكلام مو نقص في الأخت الغاليه

سنديان

لا والله بالعكس

وانا ترى على فكره حاس إن نفسيتها مرتاحه

بعد الله وثم بعدكم

لأن لو نفسيتها تعبانه ترى صدقوني ما تدخل على النت

لكن بقول لظمأ قلبي

اتلاحقي نفسك قبل ما يفوت الفوت

بعدين على فكره ترى هذا شرع الله

يعني مو حرام

انا إن الله اكرمني اتزوج اربع يا رب حقق الي في بالي

تحياتي

الســــــــــاهـــــــــــر

الله يصبرج الغاليه..

لا تنسين الصلاه والدعاء والله يهون عليج..

وهذه كلمتين موجهة للاخ الساهر..

ليه ما تدور السبب الي يخلي زوجها بيتزوج عليها

اكيد إنه في سبب

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

اكيد في سبب؟؟؟؟ من قال الكلام هذا؟؟ ما اعتقد انك انت مسوي دراسات و بحوثات تثبت الشيء هذا.. بس اذا عندك ادلة اتمنى انك تراويني اياهن.... بس عشان الغلطان منا يصلح معلوماته...

وانا ترى على فكره حاس إن نفسيتها مرتاحه

بعد الله وثم بعدكم

لأن لو نفسيتها تعبانه ترى صدقوني ما تدخل على النت

أنت شكلك ما تعرف ان الناس مو شرات بعض... كل واحد يتعامل مع مشاكله بطريقته الخاصه.. يعني مثلا في ناس يوم تكون متضايقه ما تاكل شيء.. وفي ناس يوم مضايقه تاكل اكثر عن الأيام العاديه.. يعني كل واحد غير

وبعدين اذا نفسيتها مرتاحه شو المشكله؟؟ انا الصراحه اذا هي نفسيتها مرتاحه أهنئها:up::up::up: وانشالله تكون مرتاحه.. والا انت شو تباها تموت روحها؟؟؟؟؟؟؟؟؟؟؟

ومش انت روحك قلت ان هذا شرع الله و مو حرام؟؟
انزين ليش تباها تتعذب؟؟
وليش تقول حق الأخت الثانيه تلحق نفسها قبل ما يفوت الفوت؟

تناقض فظيع ف كلامك...

عالعموم ويزاك الله خير..
تحياتي لك..


الاخت سنديان سمحيلي ادري انه مش موضوعي ..

وانت ف دعواتي.. الله يعينج.. ولا تنسين احنا خوات واذا تبين شيء ترانا حاضرين..

تحياتي..

العنيــــــدة™

الله يهون عليج ان شاء الله ..



والخيرة في ما اختاره الله دائما ... ولازم ربج بيعوضج بالخير ان شاء الله ...
والصبر تراه من اعلى مراتب الايمان والله يصبرج ان شاء الله

السلام عليكم ورحمة الله وبركاته

الله يصبر قلبج يا الغاليه ..
ولا تحطين في خاطرج اي شيء...
وقولي إن الله يبغي يمتحنك إذا بتصبرين ولا بتكفرين..
وإن هذا أكبر إبتلاء من الله..
علشان يحط من ذنوبج و يزيد من ميزان حسناتج..

جدتكم :إسعفه

الله يصبر قلبج

اللهم صل على محمد وعلى آل محمد الطيبين الطاهرين
اختي سنديان
انا مع الاخت العنيده في كلامها لأن فعلا في تناقض كبير وواضح في كلام بعض الاعضاء .فخذي منه اللي يريح بالش وتذكري دائما
(قل لن يصيبنا الا ماكتب الله لنا) (عسى ان تكرهو شيئا وهو خير لكم)

اختك:غديــــــــــــــــــــــــــرون

ههههههههههههههههههههههه

المشكله إنك العنيده أخذتي ببعض الكلام

وتركت الآخر

زي الي يقولون ويل للمصلين

طيب لو فهمتي الكلام كامل ما كان قلتي تناقض

انا في بداية كلامي

قلت تدور على الأسباب الي تخلي زوجها يتزوج عليها

واقول إنه شرع الله

يعني ماهو حرام

بس هذا مجرد تذكير

وبعدين قلت

الأخت تلحق نفسها

يعني تشوف إش الأسباب الي بيخلي زوجها يتزوج عليها

وتعالجها

بعدين لي عتب على غديرون

الواحد ما يعطي عقله غيره

ترى انا على فكره ما ايد إن إنسان يتزوج على زوجته طالما

ما بيعاملهم سوى

يعني ما لهذي لذيك وما على هذي على الثانيه

اتمنى إنكم ما تفهموني غلط

تحياتي

الســـــــــــــاهـــــــــــــر

اسمحلي ادخل واقول كلمة حق ان شاء الله
اخي الساهر صح هو شرع الله
وصح ممكن فيه سبب
بس موشرط اخوي انها تكون هي المقصرة في حقه
يعني السيارة مرات تيبها وهي عجباك بس بعد فترة تبي تغيرها
صح ممكن يكون فيها عيب بدأ يطلع وممكن ايضا انك مليت منها لان
حب التغيير في النفس البشرية
بعني مو شرط ايكون النقص من الأخت سنديان
يمكن زوجها من النوع المزاجي الي يبي يتزوج لانه يمل بسرعة
ويحب التغيير وهذا بعد طبع في النفس البشرية وكلنا في هالطبع
بس الأختلاف في شو هو الشي الي احنى انحب انا انغيره
يعني حتى الحريم يملن من اكله او ثوب معين وهو مب بالي او متقطع
بس لأن النفس عافته
والإخت يمكن الله بلاها ويمتحنها في زوج ايحب ايغير في هالنوع

وهذي وجهة نظر والسموحة
والإختلاف لا يفسد للود قضية
بس ايضا الحق ينقال اخوي اني مالاحظت اي تناقض في كلامك

الله يصبرك يا أخت سنديان

بصراحة يعني الوحدة شو تعمل يعني الرجل يوم يحصل عيب ولا ما يحصل عيب في زوجته يوم تظرب في باله يتزوج يتزوج عيل ليش الحرمة مطالبة بالصبر بصراحة لا دراسات ولا شي راح تحل هذه القضية لأن هذا الشي نابع من اعماق الشخص نفسة وكل له سلوكة وطريقته بالحياة وبعض رجالنا الأعزاء:down: فاهمين الأية الكريمة التي تدعو لتعدد الزوجات غلط الله سبحانة ما شرع هذه لكل من هب ودب هذا التحليل لفئة من الرجال.

بس أختي العزيزة عندي اسئلة لك؟
1- هل انتي عقيمة لا تنجبي له؟
2- هل أنتي مريضة يمنعك مرضك من القيام بواجباتك الزوجية؟
3- هل أنتي قبيحة لهذه الدرجة لدرجة ان زوجك ما يستحمل يشوفك لو كان كذا كان ما تعنى لك من البداية؟
4-هل انتي مهملة بنظافتك وشكلك؟
5 -هل انتي عصبية لا تطاقي؟


أختي العزيزة

من دون ما تجاوبي أنا عارفة الجواب أنتي مافيك شي من هذه الأشياء كلها لكن رجالنا والله يسامحهم ما عندهم غير مثنى وثلاث ورباع من دون ما يرجعو لأسباب هذا التحليل.

عزيزتي وسعي صدرك ما دام ما قدرتي تمنعي الشي من بدايته ومع أني أقول لك حاولي تعملي اي شي يرجع لك زوجك وإذا ما نفع ما عليك غير تدعي هذا الدعاء(صبر جميل ولله المستعان) تمعني زين بهذا الدعاء وراح تشوفي فايدته كبيرة لنفسيتك.

:confused::confused::confused::confused:والله يا أختي أكتب لك هذي النصيحة وأنا حاسة بحرقة بقلبي الله يصبرك.

الله يصبرك ويبرد قلبك ويرده لك احسن من اول

الله يصبرك ان شاء الله وصدقيني بيرد ويكون ندمان لان دائما الزواج الثاني مايستمر المشكله في ريايلنا كل مادلعناهم كل ماداسونا اكثر يعني الي انشوق مو مهتمه بزوجها شو الريال متخبل عليها والي مهتمه في ريليها شو شو ابسوي يايخون يايتزوج الله يسامحهم ويااختي ياتحطين في بالك ان القصور فيكي والنقص بالعكس هو الي مايملي عينه الا التراب وانت ياخ ساهر يعني من ريال يتزوج علي حرمته خلاص الحرمه هي السببب والله وانتوا انانين

ادري انة هذا الموقف بايخ بس اختي لازم اتكونين قوية بإيمان ربج....صلي وادعي ربج انة تنسين هذا الرجل.......يا رب يصبرتج ووفقج مع واحد احسن منة...................ان شاء الله

الله يصبر قلبج اختي سنديان

وانا ايد كلام اختي ام انوار والله اني كنت بقول نفس الكلام اللي قالته

حسبى الله ونعم الوكيل

اكثري من الاستغفار ومن قراءة سورة البقرة وادعو الله لك الثبات (u)(u)

اخي الساهر..


الموضوع مش موضوعي وما أبى أخربه بس في اشياء لازم تنقال..

أولا أنا ما قلت شيء يضحك.. فما في داعي لل "هههههههههههههههههه" ف بداية ردك.. واذا قصدك تتطنز بعد ما له داعي..

بعدين انا فهمت كلامك... وانت خليت كللللللل شيء من اللي انا قلته و علقت على شيء واحد وهو اني قلت لاحظت تناقض ف كلامك..
معناه باقي كلامي صح..

انا اللي ضايقني:

1*انك انت ما حاولت انك تقول شيء يريح الأخت او تدعيلها...
2*قلت "اكيد في سبب" بدل ما تقول "يمكن في سبب"..
وانت مصر على انه لازم في سبب

و

بعدين قلت

الأخت تلحق نفسها

يعني تشوف إش الأسباب الي بيخلي زوجها يتزوج عليها

وتعالجها

اخوي مو شرط يكون في سبب.. بس انت الله يهداك مصررر

3*ما فرحت لها يوم قلت ان نفسيتها مرتاحه.. يعني كان ممكن تقول الحمدالله الاخت نفسيتها مرتاحه.. بس انت يبتها بطريقه مادري كأنك تباها تكون تعبانه..

ومع انك حاولت تشرح بس انا بعدني ملاحظه التناقض.. سبحان الله في ناس عندها قوة ملاحظه اقوى عن غيرها..


عالعموم كل واحد له وجهة نظر و رأي.. والاختلاف ما يفسد للود قضيه..

وبما انا مسلمين انا متأكده انك ما تتمنى للأخت سنديان الا الخير..

وكل عام وانت و جميع المسلمين بخير..

تقبل تحياتي...

العنيــــــدة™

أختي العزيزه العنيدة

بصراحة إسمك يدل على القوة

والظاهر إني ما اقدرلك

بس إنتي تقولين ما حاولت تقول شي يهديء أختنا

تعرفين اش المصيبه عندنا إحنا المسملين والعرب بالذات

نجامل الناس على حساب بعض

انا هذا الشي الي احس فيه

ليه اجاملها واضحك عليها

لا بالعكس

لما اعطيها الصراحة حترتاح اكثر

وعمر المجامله ما حلة مشكله بالعكس تزيد المشكله تعقيد

بعدين صدقيني كل شي للمسلم خير

وفيه حديث للرسول عليه الصلاة والسلام

فيما معناه

كل عمل إبن آدم خير له إذا اصابته ضراء صبر فكان له خير

وإذا اصابته سراء شكر فكان له خير

بعدين تدرين يمكن زواج زوجها

يصحي زوجها من الغفلة الي هو فيها

يمكن تكون ما هي مقصره معاه

ويراجع حساباته بعد ما يتزوج ويعرف قدرها

وترى قدرها مرفوع ومحشووووووومه

على قولك إختلاف الرأي لا يفسد للود قضيه

تحياتي

الســــــــــــــــــاهـــــــــــــــر

أناحاسه فيك ياأختي الغاليه وأرجو من الله العلي القدير أن يلهمك الصبر لكن بأقولك بعض من النصائح أتمنى تفيدك لأنها ليست من فراغ
حاولي تكونين أحسن من أول معاه وأعرفي كيف تملكين قلب زوجك لأنه الأهم اللحين قلبه
لاتحاولين تبينين غيرتك أمامه حاولي قدر الأمكان تمسكين نفسك ولا تقارنين نفسك فيها أبدا
صدقيني ياعمري ان الود والكلام الحلو والأهتمام فيه وفي نفسك هي الأساسيات في الحياه الزوجيه وكل امر المسلم خير وثقي برب العباد وأدعيه بأن يسخر زوجك وضرتك لن في كل صلاه وتحري أوقات استجابة الدعاء وقولي كل اللي في نفسك لرب العالمين والحمد لله يا حياتي انك عايشه بحسه .
حالك أفضل من الأرمله اللي فقدت أعز مخلوق على قلبها .
المهم يالغاليه لا تضيقين صدرك ولا تستسلمين للوساوس وتأكدي ان هذا فيه خير لك يراح تعرفينه في يوم من الأيام لأن الله أرحم من العبد على نفسه
الله يوفقك دنيا واخره ويجعل لك منكل ضيق مخرجا.....

السلام عليكم ورحمة الله وبركاته ..

:rolleyes::rolleyes::rolleyes::rolleyes::rolleyes::rolleyes:

هذا حالي بعد قراية الردود .. وايد متزوجين عليهم أزواجهم ؟؟

والخلافات اللي صايره بين الأعضاء ؟؟
يعني كلامكم هو اللي يجرح الأخت .. ويجوز يذكرها بأشياء ..
الحين لازم تكون ناسيتها ..


:confused::confused::confused::confused::confused::confused::confused::confused::confused::confused::confused::confused::confused::confused::confused::confused:

وهذا شعوري للأخت المبتليه ..

أنا فعلاً بجيت يا قلبييييييييييييي ..

بقولج شنو تسوين ..

لا تكبتين أهم شي لا تكبتين بقلبج ..
إذا فيج بجيه ابجي .. صااااااارخي ..
كسري صحون .. سوي اللي نفسج فيه ..

توضي وصلي .. وادعي ربج ..
ترا الله كبيييييييييير ..
ورمضان باجر اشغلي نفسج بالمطبخ بأي شي ..

ولا تزعلين نفسج بالمره ..
تأكدي أن محد مهم بهالدنيا ..
المهم هو صحتج .. وراحة بالج ..

شغله صعبه وخياليه أدري ..
لكن حاولي ..

والله كل شي تقدرين تتعاملين معاه بالنفسيه ..
هيئي نفسج أن أنتي المهمه وبس ..
والباجي بالطوفه .. المهم تكونين مرتاحه ..
أطلعي تسوقي .. أمشي ..

أوقفي قبال المرايا وكلمي نفسج ..
ان اللي بالمرايا لازم تمسح دموعها وتبتسم ..
لأنها تستحق الابتسامه ..
ولأن محد بهالدنيا يقدر ياخذ الابتسامه منها ..
ولأنها انخلقت وانولدت علشان تعيش حياتها ..
مو علشان غيرها يدمر حياتها ..

زوجج تزوج صح ؟؟؟

أنتي توفيتي ؟؟ لأ ..

يعني مو نهاية الدنيا .. أبداً ..

يعني الحياه جدامج طويله ..

الله خلقج علشان تعيشين الحياه .. وحياه طبيعيه ..
ومدام فيج عمر .. عيشيه ..
وراح تثبتلج الأيام أن محد بالدنيا يستاهل يضيق صدرج علشانه ..

أنتي متزوجه .. عيشي حياتج كمتزوجه ..
لها حياتها المستقبليه كزوجه ..

كوني مميزه .. حبي الحياه ..

لأن الحياه حلوه .. وتستاهل نعيش أيامها طول بعرض ..
ونستانس فيها قد ما نقدر .. بحدود ديننا الاسلامي ..

تفائلي .. تفائلي .. تفائلي ..

والله كريم ان شاء الله ..

والفرج أيي بالساعات ..

عسالله يوفقج ويهديج ويهدي سرج ان شاء الله ..

وتذكري الابتسامه عنوان حياتج .. :smile:

أعتذر طولت عليج ..
وأسفه عالفلسفه ..

حبيت أساعدج .. :o

الله يعينج اختي والله قلبي عليج والله ياجررررررررج في مصيبتج لامها فعلا كارثه وانا اييد اختي a9eela في كل كلمه قالتها

أشكر جميع المشاركات والمداخلات وأسفة إذا سويت بعض المشاكل بين بعض الأعضاء وأنا شايفة إنه كل واحد بدأيخمن من رأسه الأسباب اللي خلى زوجي يتزوج ......

وبالنسبة للأخ الساهر أحب أقولك شكرا على مداخلتك ولكني حسيت كأنك متهمني إني أنا مقصرة في حق زوجي وإني انا مرتاحة.


لكن والله ماأحد يعلم مافي قلبي غير ربي ولعلمك يااخي أني سألت زوجي مرارا وتكراراإذا كنت مقصرة في حقه .


لكنه حلفلي على المصحف أني لست مقصرة وقايمه فيه وبالبيت وبالأولاد لكن السبب الوحيد هو أنه عنده المقدرة الجنسية وما تكفيه وحدة
وأنه يحب التغيير .

والله المستعان على رجال هذا الجيل.....