ازيكو يا قمرات
وحشتوني اوي
طبعا زى ما وعدتكو انى كل شوية هنزلكو حاجات جديدة ومفيدة قولت اكتبلكو النهاردة
.
.
.
للى بتحب تخزن ورق العنب دلوقتى عز التخزين وصل الكيلو لـ 5 جنية ولو هتجيبي اكتر من كيلو ممكن تنزلي فى سعرة شوية مثلا 4 جنية
هنجيبة ونغسلة كويس اوي ومش هنشفة وهو مبلول نرصة فوق بعض ونحطة فى كيس بلاستيك وعلى الفريزر
ولما نحب نحشى منة نتلعة ونسيبة يفك ونحشية من غير سليق ولا اى حاجة
وبالهنا والشفا
الفراولة
لو تحبو تخزنوها اليوم اللى هتلاقية حر كدا جامد اعرفى انك لو نزلتى السوق على الساعه 3 او 4 هتلاقى كيلو الفرولة رخص لانها ملهاش روح للحر
ولو تحبي تخزينها وهى رخيصة كدا والدنيا حر اشتري والبياع هينزل معاكي فى سعرها لانها هتبوز منة من الحر هاتيها انقعيها شوية واغسليها كويس ونضفيها وكيسيها صحيحة فى الفريز او مقطعه قطع صغيرة ولما تحبى تعمليها عصير تلعيها وحتى عليها شوية مية صغيرة وسكر وهتلقيها نزلت شربات بتاعها وابتدت تفك
وبالهنا والشفا
بالنسبة للحمة وغلو سعرها دلوقتى بقت مولعه....
عندك كزا حل ممكن تعملية
اولا انك تستخدمي اللحمة الجملي هى حلوة وصحية لانها مفيهاش دهون كتير لكن ملهاش شوربة
يعنى ممكن تعمليها مفروم او ببصل او فى الفرن مشوية يعني....
او ممكن تجيبي لحمة من محلات السبكي اللى فى الدقي ديما عندة عرض 3 كيلو لحمة علية كيلو كبدة بلدي او بدل الكبدة كيلو مفروم بـ 127 جنية وانا جربتها واللحمة حلوة والكبدة كمان هو سر رخص سعرة انة بيجيب المواشى من برا بس صاحية ويدبحها هنا علشان كدا هي ارخص لانها مش متربية هنا لكن طبعا عليها ختم الصحة وكل حاجة وكمان السجق البلدي عندة الكيلو بـ 35 جنية.....
كمان سلسلة محلات نيو ماركت ودى موجودة فى كل منطقة اللى هى زمان كان اسمها الجمعيه ودى كيلو اللحمة فيها اخر مرة جبتة كان بـ 40 جنية وطعمها جميل انا بجيبها من نيو ماركت اللى فى المنيل جنب سينما فاتن حمامة وهى لحمة سوداني وتبع الحكومة ومضمونة...
او بقى اخر حاجة محلات اللحمة المستوردة .. وانصح اللى تحب تجيب منها انها تجيبها من محل يكون شغال يعنى البضاعه اللى عند مش بتركن لانها اصلا بتقعد شهور عقبال ما تجيلنا من برا فكمان مش تكون قاعدة عند المحل اللى هنشتري منة .. اشتري من محل مشهور وشغلة كتير علشان تضمنى ان كميات اللحمة عندة متجددة مش متخزنة....
.
.
.
.
طبعا الطماطم غليت جداا وصل الكيلو لـ 5 جنية بردو انزلى اخر النهار وهاتى التري اللى هو ينفع للصلصة وصلصيها وشيليها فى الفريزر طبعا انا بقى اتصاحبت على وحدة بياعه عندنا فى السوق بروح مثلا اقولها شيلي مثلا على 2 جنية للكيلو اروح تانى يوم الاقيها شيلالي مثلا 10 كيلو او 7 كيلو او 5 اللى يتلع معاها اخدة منها وطبعا هى كسبانه وانا كمان كسبانة وبتكون مديانى ناشفة على ترية انا بقى فى البيت افرزها واللى ينفع السلطة اشيلة فى التلاجة واللى ينفع صلصلة اعملة صلصة واشيلة فى الفريزر وممكن تتاخدى لمامتك او حماتك وبالتالى لما تادى منها مثلا بتاع 20 كيلو وتوزعوهم على بعض البياعه هتديكي بسعر رخيص وانتى كسبانة بردو
.
.
.
.
بالنسبة بقى للنضافة ::
ومن تجربتي احسن مبيد حشرات زاحفة كيروكس جميل جداااا بعد ما تنضفى الشقة وتمسحيها هاتية ورشى منة على مداخل الشقة كلهااا مقلوكيش على اللى ممكن تلاقية ميت بعد كدا لان الحر بيطفش الحشرات
وبيخليها تهجم علينا فاحنا بقى نتصدلها من الاول ونتسلح بكيروكسس:D
اخر حاجة بقى .....
مش اى حاجة تشتروها من اى سوبر ماركت كبير اشترو العروض اللى محتاجينها وبس
لانى الاسبوع اللى فات كنت فى كارفور ولقيت فية التايد الاتوماتيك اغلى من لما بجيبة بـ 3.5 جنية فطبعا انتبهت ان مش كل حاجة هناك رخيصة يعنى مش تروحى تجيبي العروض اللى محتاجة وكمان تكملى بقيت حاجة البيت من هناك يعنى لو فى المنتج الواحد جبتية اغلى بـ 3 جنية شوفى عقبال ما تكملى بقيت حاجتك اللى مش عليها عروض هتلاقيكي صرفتي اكتر من المفروض تصرفية لو جبتيها من برا
وخلص موضوعى كدا النهاردة
وان شاء الله ليا موضوع تانى مع حاجات تانية ممكن تفيدكو
ومتنسوش تدعولي بالزرية الصالحة عاجلاF:
دا الرابط للى مقراش الموضوع الاول
حملة هنوفر يعنى هنوفر ( 1 )