جمعتنا ولمتنا السورية مع اغلى صحبة اردنية لشهر جادى الثاني 1433هـ حياكم صبايا اتفضلوا

سمفونية منتشرف بوجودك معنا اخت وعزيزة ان شالله ... ويسعدلنا صباحك واوقاتك يارب
وتسلمي على الكلام الطيب ربي يسعدك ويبارك فيكي ويسمع منك المولى ... وامين الله يفتحها على سوريا وسورية ( ام عبد الله ) وعلى الجميع يااارب

خلوني ارد على نبوعة من التجمع اللي تسكر هههه

بخصوص الفيسات اكيد بكفي :lol: بس والله انا قصدي انو مو بالقريب العاجل ابدا يعني انا دعيتلك بس قلتلك ابدا مو بالقريب العاجل

ياحياتي اكيد بدررررري عليكي وبدري على مجووود كمان شو لسى جزمته المسكين هلا انحطت على الرف ههههه الله يحميه هو واخواتهF:

وصح البنات محترمين اكثر بس دلوعات اكثر تعالي شوفي شام باليوم بتبكي مية مرة مطفشتني من كتر حساسيتها ومن دلعها :| ومو انا والله اللي بدلعها لا لا
ماعندي دلع والله بس هما البنات بدلعوا حالهم غصب:015::062: هههه الله يحميهم ويستر عليهم ربي

ياسلام قلتيلي حلوة بالمنام :K:الله يجبر خاطرك ... عيونك اللي حلوة المهم اتزوجنا وخلفنا ومشي سوقنا ههههههه
وربي يسعدك وحبيتك العافية على طووول يارب

يؤبشني الشرير انا هههههههههه ... حرام والله زوجي مابقصر بس المشكلة انا مابتوحم على الاكل ههههه الحمد لله طبعا
بس مرة قلتله نزلت العوجا ؟ ( اللوز الاخضر)) وخدي بقى كل يوم يجبلي عوجا :064: واخر كيس خرب بالتلاجة وكبيته خخخخخخ هلأ عم استنى الجانرك ييي عليها شو طيبة
سال لعابي



عن جد طبيعي انزل اول الحمل ؟؟؟ طمنتيني لاني انا من النوع اللي كتير بهكل هم وزني وخاصة اذا نزل لان بطلوع الروح لاطلعلي كيلو مابالك اخسرو
لاء بس انتي لازم تهتمي باكلك منيح اللي شفتيه بالولادة مو سهل بقى انسي الوزن وكللي تماااام ياقمر

والله يقويكي يالله بتتعودي وبتصيري بتتذكري من الذي مضى ومابتنسي شي واهم شي الغيارات والرضعات هههه
وامين الله يخليهم ولا يحرمهم لحدا يارب
انا والله كنت حاطة لولب وشلته برمضان الماضي وبعد شي 3 او 4 شهور حملت بس الله ماكتب ونزل ووبعدها بكم شهر هيني حملت الحمد لله
واملي بالله يتم حملي على خير انا وجميع الحوامل يارب
هلأ انا متحيزة شوي للاولاد يعني بموت بلبسهم واناقتهم عكس الناس ماكتير بتغرني ملابس البنات هههه بقى نفسي بولد اذا ربي اراد
واذا بنوتة فالحمد لله على نعمته المهم الخلاص والخلقة بين الناس على قولتنا

وعوافي على الاوزي شو الرقايق اللي بتستخدميها للاوزي ؟؟

مبروك التجمع الجديد
والله يسمع منك ترجع سوريا بامان وتهدا الاوضاع
والله يحمي اهالينا وكل الشعب السوري ويبعد عنه كل مكروه
اي والله الايام عم تركض ركض بقي تلات شهور لرمضان
ان شاء الله رمضان الجاية بيكون رجعت سوريا متل قبل
قولوااا آآآآآآآميييييين

شلونك اختي دمشقية
الله يعبتلك صبي متل ما بتتمني وقمور متلك
سألتيني بخصوص الطيران لسا الطيران عنا ماشي
والله يبعت يلي فيو خير

وبخصوص الطبخ اليوم اذا زوجي رح يجي يتغدا
رح اعملو مجدرة وجنبها شوندر ياسلام على الشوندر

صباح الخير ياصباياF:
امين يارب الله يسمع منك ياام محمود وترجع سوريا النا بخير
وكل عام وانتو بخير ايه والله الايام عم تركد ركد
الله يكرمك ياام محمود بصبي متل مابتتمني ان شاء الله ويقيمك بالسلامة
ان شاء الله ولادتك طبيعية

وديري بالك ع اكلك والله انا متلك مابشتهي شي بتمنى اتدلل وقت الحمل:lol:
بس والله كل الحمل بقضي استفراغ الله يعزك وبيجو ولادي صغار كتير ياحرام:)


لاتواخذوني ياصبايا مارديت عليكن لاني والله مابتذكر شوكتبتو فايتة بالحيط انا وذاكرتي ;)
ع سيرة الذاكرة ياصبايا انا كتير بنسى والله
صحيح انو بقولو من الولادة القيصرية ولا مالها علاقة

مبرووووووووووووووووك التجمع الجديد والله يديم الود والمحبة بينا
دمشقية تسلم ايديكي على فتح التجمع الجديد وآمين يارب الله يسمع منك ويفرجها على سوريا من عالي سماه

سيمفونية مشكورة على الدعوات الحلوة والله يسمع منك وانتي ربي ينولك مرادك

اهلين ام سنا آمين ربنا كريم
هلا ام فيصل وانتي بخير يارب ولايهمك ماحداعتبان عليكي وبخصوص الذاكرة والولادة القيصرية والله انا ماعندي علم بهالشي بس والله كلنا مننسى هاد داء العصر هههههه

السلام عليكم ورحمة الله وبركاتة

مبروك التجمع الجديد

ويارب الله ينصر سوريا ويحمي شعبها ويرجعها يارب

اااااااااااخ يابنات شو متحمسة لرمضان هاي السنة
رمضان السنة الماضية قضيتو اكتئاب ونكد وبكى كان صارلي شهر متزوجة واول مرة اغيب عن اهلي هالمدة ومتعودة على لمتهم وزوجي اول يوم رمضان رجع لشغلو بعد اجازة شهر العسل هههههههههههه
فصفيت لحالي حسيت عنجد وقتها اني تجوزت ههههههههههههههه

ام فيصل حبيبتي مالو علاقة النسيان بالقيصرية""انا كنت اشتغل عند دكتورو نسائية فعندي خبرة كبيييييييرة بامور النسوان هههههههههه"
النسيان الو علاقة بالB12واكيد نازل عندك متل مو متاكدة انو نازل عندي انا باقرب وقت بدي اعمللو فحص انشالله

ههههههههههوالله يابنات امس وصلني خبر انو بنت حماي اللي تجوزت بعدي ب6 اشهر حامل وطول الليل وانا بحلم بانو عندي بيبي صغير بيجنن وهيني فتت الشات لقيتكم عن تحكو عن الحمل ولاولادة هههههههههه هالموضوع وراي وراي

ام عبدالله سالتيني بهداك التجمع عن الحمل "اذا ما خانتني الذاكرة "انا ماجلة لانو البيبي والحمل والولادة بدهم كتير ومو حابة افوت على هيك مرحلة لحتى اتاكد انو وضعنا استقر
بعدين انا استنيت احمد 5 سنين لتجوزنا خليني اكافأ نفسي وانبسطلي شوي معو ملحقين علويئ والواء
بعدين انا بشهر العسل ما سافرنا وقضيناها بجدة بالنسبة لالي بلد جديد وانبسطت بس احمد ييي علي نفسي يسافر واكون معو فعم بنفكر نروحلنا على شرم الشيخ او اي مكان المهم نسافر ونغير جو شوي فسفر وانا حامل ما تزبط

هههههههههههه طلعت اسباب كتير
بس مو يعني هالحكي انو مو نفسي فولد بالعكس انا عشقي الاطفال كنت اشتغل عند دكتورة اطفال ايام الجامعه قبل الدكتورة النسائية ومو مصدقة ايمتى تخلص هالسنة على طول لحتى اوقف الدوا اصلا هلكني هههههههههه


نبوعة كنت قايلة انو اخبي الشي يلي بيكرهو زوجي بالاكل وبياكل من غير ما يحس هههههههههههه

قديمة ياعمري
مرة عملت عجة"مشاط زهرة وهو بيحبها كتير "وروح قلبها البصل انا هيك بحبها فبشرت البصل بشر وقلت اذا سالني بقلو ما حطيت
اصلا هيي ما بتبين بس من وسوسة جوزي اول ما حطيت الصحن رحت اجيب الباقي لقيت فاتح الحبة من جوة وعم بينبش فيها انا صرت اضرب اشكال الوان فطلع البصل وقلي شو هاد قلتلو من الزهرة مو مسلوقة منيح قام قلي هاد بصل صرت احلف ايمانات انو مو بصل "يارب سامحني ما حبيت اطلع كدابة قدامة "وصرت ابكي انتة مو مصدق انا ما بكدب وهو يقول انا ما بينضحك علي هههههههههههههههه قضيناها خناق وحردنا عن الاكل واستغفرك ربي كبيت الاكل متل ما هو هههههههههههههه ومن بعدها حرمتها انشالله عمرينو ما اكل بصل طفشني ياشيخة

انا اليوم عالغدا "او بالاحرى عالعشا"بدي اعمل كبسة جوزي مشتهيها

سامحوني اذا حدا من التجمع القديم سالني وما جاوبت لانو والله مو متزكرة لانو مبارح انا قرات الردود وانا استنى زوجي ومن بعد فتت لقيت التجمع الجديد الله يديمو ويملاه بالحب والاخوة الصادقة يارب

قسما بالله حبيتكم وكاني بعرفكم من زمان

صحيح مقلتلكم شو عملت امس

بعد الكسل اللي صار معي الصبح وبعد الفرفرة بقسم الترتيب واتنظيف بمنتدى تاني شنيت حملة هجوم عالصالون والله يابناااااااات اكلتو بسناني صارلي اشهر مو منضفة الشباك ومن الحماس بالتنظيف لقيت حالي مطلقة الشباك بايدي اخدتو عالبانيو وليفتو ونضفت مجرى الشباك على راحتي طبعا شو لقيت غبرة لا لا لا هادي مو غبر هاد انا لقيت صحراء الربع الخالي فشباكي هههههههههههههه

وشلت الكنت وشطفت وغيرت ديكور الكنب وطاول السفرة
كتيت الكنب يا الله شو طلع منو غبرة مع اني مغطيتو بشراشف بس ااااااااااااخ عالغبرة هلكتني والشقف لونو بني من كتر الغبرة المهم من ال2 لل9 وانا على رجل وحدة ولمن خلصت من الصالون بلشت بالترتيب العادي للبيت وطبخت وتروشت واستنيت ابو الشباب لروح

طبعا الاصابات في كل مكان ايدي تسلخو من الكلور ورجلي وايدي عضلو وظهري انقسم واصابات ناتجة عن الوقوع من فوق الطاولة وطنت راح اوقع من تالت طابقة وانا بركب الشباك بالاول ما عرفت وبيتي مشرع الدنيا مغرب اتصلت على جوزي وانا ببكي كيف اركب الشباك ماعمري ركبت بس بالاخر زبط ههههههههههه بعجبكم

واليوم جوزي حلف يمين ما اصيب شي بالبيت عدا الطبيخ لانو طول مبارح وانا اصحى مخنوقة من الغبرة ورجلي وظهري بوجعوني فما رح اعمل شي بيطلعلي يوم اجازة هههههههههههه

السلام عليكم بنات
وينكم ماحد طل


بنات انا بدي افقع بدي انجلط ومو عارفة شو بدي اعمل

انا هلا صارلي بالضبط 9 اشهر و22 يوم وبنت حماي الوسطانية لهلأ ما اجت باركتلي بالبيت

واول ما تجوزت كان اسلوبها زنخ وكل ما تشوفني تقلي بدنا نجيكي بدنا نجيكي محملتني جميلة بجيتها قبل ما تيجي حتى وقبل ما سافر بشهر 2 حكت تلفون يوم جمعة وقالت بعد نص ساعة بكون عندكم ونحن ما كنا بالبيت وصارت تقول لزوجي انا بس بدي اجي ربع ساعة بصراحة انا ما حبيت تيجي وقتها ما بحب تحميل الجمايل
وسافرت وهيني صارلي شهرين راجعة مكلمة امها وقايلالها انها بدها تيجي وحماتي حكت مع جوزي وقايلالو انو بصير بعدين الحق علينا نحن اذا ما اجت يعني هي بنت حماي بالاخر بطلع عملت اللي عليها قلت لجوزي ماشي خليها تجي الجمعة هي لانو جوزي ما بكون بالبيت وهي حتيجي مع جوزها وانا ما بستقبل رجال ببيتي حتى لو زوج اختو
قبل شوي حكى معي وهو رايح عالشغل التاني وبيسالني انو يحكي مع اختو عشان جية يوم الجمعة والا يأجلها ليوم الاربعا""يوم الاربعاء جمعه العيلة""ويقولها انهم يتفضلو يوم الجمعة قمت انا قلتلو انو الاصول هيي اللي تحكي قام قاطعني وقلي سيبيكي من الاصول فتدايقت وسكتت ما حبيت اسم بدنو وهو رايح عالشغل بعدين رجع كرر السؤال قلتلو خليها ليوم الاربعا قام قلي خلص راح احكي معها تلفون بيجاكر فيي لانو عرف انو انا تدايقت من حكيو

بالله يا بنات بيصير هيك راح اقرب على 10 اشهر متزوجة وهلا حليتلها تيجي واذا ما اجت بيصير الحق علينا
اختها لمن تزوجت بعد ما رجعو من شهر العسل على طول راحتلها
مع انها اتفقت مع اختها عالزيارة الها قدامي وبعدين لفت وجهها علي وقالتلي بدنا نجيكي بدنا نجيكي
ما بحب اللي بيقلل من قيمتي بس كيف بدي افهمها للحلو اللي عندي؟؟

انا مقهورة ولو بايدي ما بدي جيتها بس جوزي كيف يقلي سيبيكي من الصول هيي جاية على بيتي مو على بيت الجيران بصراحة انا محرورة منو وصارلي ساعة بفكر احكي معو تلفون واسملو بدنو وابق كل اللي ببطني بس مو حابة اعمل مشكلة
امانة قولولي شو اعمل وابينلو اني زعلانة والا اطنش واحبسها جواي ويادار ما دخلك شر
من قهري بدي احكي مع امي وافضفضلها بس والله ما بحب احكيلها شي بيدايقني لانها بتهكل همي واللي عندهم بيكفيهم

قبل شوي اتصلت فيه بدي بطاقة شحن بيحكي معي ولا كانو فيه شي بيدلع الاخ وبيضحك ولا كانو سم بدني
وبعتلي رقم البطاقة وكاتبلي بعدها بحبك يا زنخة

بالله شو اعمل معو هاد

مسالخير صبايا
كيفكن شواخباركن
اهلين فيكي ام عبدالله ايه والله حيصير معي زهايمر ع بكير الله يعينا:lol:
اهلين فيكي فديت عطرو يسلمو ايديكي بظن والله حتى انا قريت انو في فيتامين بكون مسبب النسيان عندي لان عندي نقص فيتامينات;)
والله ضحكتيني الله يخليلك زوجك يارب
والله يعطيكي العافية عالشغل
والله انا مايدرى زوجي اني عم نزل الشبابيك ونظفن ياويلي منو
والله اول مابروح الصبح ع شغلو بنزل هالشباك وبليفو ولامين شاف ولامين دري:lol:
لان هو بغار كتير وياويلي اذا قربت عالشباك لو كنت مغطية
اول ماتزوجنا بعد بفترة نزلت البرادي وغسلتن بس اجى المسا قلي ليش هيك عملتي مابتعرفي انك بتبيني
قلتلو والله حاطة غطا صلاة ومسكر الشباك قلي ولو بتبيني ويوميتها والله شو خناقة عملي بدال يسلم ايديكي:woo:
يلا اتعودنا لهيك بساوي من دون مايعرف
وبالنسبة لبنت حماكي عادي والله طنشي لاتكبري القصة وتزعلي انت وزوجك لان اصلا الرجال اهلو بالمرتبة الاولى
بقى عادي لو شو ماعملت معك كرمال زوجك اتحمليها واستقبليها منيح المهم جاية ولاقيلها عذر الله اعلم شو عندها

اهلين ام فيصل حبيبتي
ههههه زوجك متل زوجي بس انا بطلت توفي معي اذا انا ما نظفت مين بدو ينضف

بيعين الله والله هالزيارة على عيني بس متل ما قلتي بس عشان خاطر زوجي

هلا تغريد الله يبارك فيكي وربي يسمع منك ويفرجها على سوريا
وانا كمان متلك جيت على السعودية برمضان وكنت مقضية اول عشر مع اهلي واجيت لهون ولقيت اختلاف كبير بين اجوائنا واجوائهم بس يالله انتي خلي رمضان هالسنة غير شكل ;)
ومو انا يلي سألتك عن الحمل هي ام محمود ههههههههههه ماقلتلك ركزي :confused: خخخخخخ
بس والله برافو عليكي بتعملي زينة العقل عيشي حياتك شوي وانبسطي لاتعملي متلي انا دغري حملت وكريتهم التلاتة ورا بعض
وبسم الله ماشاء الله عليكي الله يقويكي ويعطيكي الف عافية والله النضافة والرتابة مافي احلا منها وضحكتيني على تركيبة الشباك انامرة كنت باليمن ونازلة على سوريا وشنطة السفر ماكانت تتسكر معي اتصلت على زوجي وصرت ابكي وهو صار يضحك عليي وبعد ماهديت اتسكرت بكل بساطة هههههههههههه
وبخصوص بنت حماكي لاتحطيها ببالك ان اجت ولا مااجت يمكن بدها تغيظك لاتخليها تأثر عليكي وخصوصي قدام زوجك كل ماكنت متسامحه مع اخواته وطيبة ومابتعتبي عليهم بشي بتحلي بعين زوجك وبصير بشوف اغلاطتهم معك وتقصيرهم

اهلين ام فيصل كيفك وكيف اطافيلك وبسم الله عليكي بعيد الشر عنك الله يبعد عنك وعنا كل مرض

يسعدلي صباحكم ياااارب بالصلاة على النبي فصلوا على النبي
اللهم صلللي وسلم وبارك عليه هههه

هلا روح عامر الله يبارك فيكي وتسلمي حبيبة قلبي الله يسعدك ويكرمك انتي كمان باحلى فؤاد وقت اللي بتحبي ويخليلك سنا يارب
وكويس الطيران شغال عندكم .. الله يختارلك الخير يارب
وهنا وعوافي على المجدرة بس شو هو الشوندر يعني مخلل ولا مسلوق ؟؟؟ ولا شو اله على قة بالمجدرة حتى نتعلم شوي منك

&&&&&&

اهلين ام فيصل الله يسعدك حبيبة قلبي والله كللك ذوق
وربي يسعدك ويرزقك ماتتمني يارب .. الحمد لله عم حاول اهتم باكلي اكتر من اول وانا متلك ولادي بيجو صغار يعني محمود اجى 3 كيلو كان ماشي حالو
بس شام اجتني كيلين و400 غرام كانت من قد الكف هههههه ولاء الحمد لله انا مابقضيها استفراغ العفو يعني بس هيك لعية نفس بس انا بيجعوني رجليي كتير بحملي فان شالله هالحمل ماتصير
... المهم الله يرزقنا سلامتهم وسلامتنا خخخخ بتسوى الدنيا وبيبقو بيكبروا على الارض

يعني هو سلامتك من النسيان ب الحمد لله اللي عم اسمع انو في ناس متلي لاني انا وصلت لمرحلة احيانا بقول اكيد فيني شي
عن جد بنسى كتير ... وهي نحنا صبايا يعني لسى ماختيرنا اذا الله عطانا عمر ان شالله وعجزنا شو بنعمل بحالنا ههههه

اهلين سوريتي الله يبارك فيكي ويسلملي ياكي من كل شر يارب
وربي يفرجها عليكي وعلى الجميع من اوسع ابوابه ان شالله

***********

اهلين تغريدوو صباح النضافة والترتيب والروائح العطرة (( الكلوركس احلى ريحة )) هههه ماشالله عنك الله يقويكي يااارب بتصدقي بالله انا اكبر منك وصارلي عمر متزوجة مابعرف اشيل الشباك اسم الله عنك ولاء ازيدك ولا بفكر اني اتعب نعسي واشيله هههه بنضفه من جوا منيح والسير تبعه وكل شي من برا على اد ماتطول ايدي او زوجي هو اللي بقيمه وخلصنا هههه

و روووقي حبيبة قلبي مابهون علينا زعلك ابدااااا وهي قصة بنات الاحما قصة مابيخلى بيت منها سبحان الله الا انا ههههه لان بنات حمايي كلهم من عمر امي واكبر خخخخخ فهنن بحالهم وانا بحالي طبعا والبعد نعمة كبييرة هههه

لا تدايقي حالك دخيلك اللي بيجيكي اهلا وسهلا واللي مابيجي كمان مية اهلا وسهلا ... وخليكي عادية جدا اذا اجت ولا تبينيلها انك والله كنتي متوقعة هالزيارةمن
زمان لا لا خليكي عادية وبينيلها كمان انو موفارقة معك كتير (( انا غيرهم انا شريرة هههههه))

وابو الشباب ياحبيبة قلبي دايما حتى لو وصلت انو هو يسب اخواته انتي لا تسبي عنده مبدأ لانه خخخخخخخخ
متلنا بالضبط لا حدا يقرب على اهلنا واخواتنا ابدا خط احمرررررر ...

وبخصوص تأجيل الحمل انا اللي سئلتك ... وياستي الله يسعدك وان شالله بتسافري وبتنبسطي مع زوجك وبتقضوا اوقات حلوة وبس ترجعو وتستقري ببيتك
تدري انك حامل .... شلووون بالله فيلم مصري هههههه
المهم الله يرزقك بللي تتمنيه يااارب

ودخيلك اذا زوجك لهالدرجة مانتك بالاكل فخلاص لشو تعبي حالك سويله اللي بحبه وخلصنا وعوافي على قلبه وقلبك وريحي راسك والله يبعد المشاكل عنكم وعنا
والله نحنا حبوبات منمشي الحيط الحيط ومنقول يارب الستر خخخخ

صباح الفل والياسمين والمسك والعنبر
لما بفيق الصبح وبقرأ تعليقاتكم بتفائل وبيصير يومي غير شكل
تغريد
الله يعطيكي العافية عالتعزيل والله يقويكي اكيد هلأ التعضيل والوجع والسق والنق
انا شبابيكي للاسف ما بينمسحو من برا ابدا يعني ع طول وسخين ان ما حنو علينا اصحاب الفلا وجابوا عمال ما بينضفو
الله بيعين
الله يعينك على أكل زوجك وبعدين هلأ اكيد تعودتي انا زوجي عندو شي اسمو صحي ومفيد يعني اي اكلة مو منيحة حاذفلي ياها وخاصة المقالي واي اكلة مو مفيدة اول فترة كتير اتدايق وانزعج هلأ استغنيت عن كل الاكلات يلي ما بصير اطبخها
اما من شان بنات حماك متل ما قالولك الصبايا ولاتنحفلي فيها هدول اخوات زوجك احسن الشي تقوليلو ع كيفك شو مابدك عمول
ومتل ما قالت ام محمود البعد نعمة كبيرة لما نزلت ع سوريا اسبوعين اتخانقنا انا وزوجي كرمال شغل البيت وانا مرضت وبنتي مرضانة وما رح قوم اشتغل صارت حروب ولهلأ بيزكرني بهالشي لاني ما اشتغلت عند اهلو

أم فيصل
الله يعطيكي العافية ويقويكي يارب والله صرلي زمان ما عملت تعزيلة هيك متل سوريا
بتعرفو عم اشتاق للتعزيل هون ما بحاجة للتعزيل والبرادي زوجي ما بينزلي ياهون وانا ماعندي سلم
كنت ب سوريا انا نزلهم وانا ركبهم الله يرحم هديك الايام
وبالنسبة للنسيان وانا كمان عم انسى كتير وانا زيادة عن النسيان مابقي عندي تركيز ابدا
لازمنا علاج
أم عبودي
اجواء رمضان غير ب سوريا اهالينا الشوارع السوس والمعروك يا سلام ع رمضان ب سوريا
كيفك وكيف اولادك ان شاء الله بخير

أم محمود
يا اختي هادا الشوندر والمجدرة اكلتنا المفضلة عند اهلي
كان بابا لما يجبلنا الشوندر فورا منقول لماما عمليلنا مجدرة
الشوندر الاحمر منسلقو وبعد ما يستوي بقشرو ومنقطعو مكعبات وعصير ليمونة وملح ومي وتومة اذا بدك وفيكي تستغني عنها بس معها اطيب
وبتصير متل الشوربة بس باردة وكتير طيبة مع المجدرة وكمان بحط الشوندر بدون شوربة بقطعو حزوز
هلأ زوجي مبارح اكتشفت انو مابيحب الشوندر لانو اكل قطع وحسو ما متقبلو
بس انا وحدة ورا وحدة جربوها بيجوز تعجبكون
اما الطبخ اليوم اليوم ما رح اطبخ انا موجوعة شوي صرلي يومين وجع ومغص وكل يلي بدكون ياه انا شكيت من وجع الدورة مشان هيك عم استنى اخلص ان بقي الوجع رح روح عند دكتورة