بنات البحرين ساعدوني - التأمين ضد التعطل

سيده نفسي;16056986:

اهلا وسهلا حبيبتي ولو ان ردي متأخر بس بقولج تستفيدين

بسويه لج على خطوات :thumbs_up:


1- اول شي لازم لازم تكون البطاقة الذكية تكون مقلوبة الى عاطلة عن العمل .. في هالحالة وين تروحين؟؟ تروحين مدينة عيسى مكان ما نسوي البطايق بس ما يحتاج تاخذين موعد.. فيه هناك قسم خاص لقلب العناوين او من عاطل الى موظف او العكس اول ما تروحين سألي وبيدلونج

2- لازم يكون عندج حساب خاص بالبنك وتطلعين منه كشف للحساب لانه بيكون من ضمن الاوراق المطلوبة لمركز التوظيف..

3- ما يحتاج ابدااا تروحين وزارة العمل ولا شي.. شوفي انتي من اي منطقة؟؟ فيه موجود مراكز متوزعه على جميع مناظق البحرين.. مثلا مركز مدينة حمد شامل للمطقة ذيج كلها..
فـ شوفي انتي من وين واختاري المركز الجريب لج.. :thumbs_up:

4- لما بتروحين هناك لازم تكونين حاملة صورتين شخصيتين او 3 صور ما اذكر بالضبط وكشف الحساب تبع البنك .. ونسخ من : الشهادة الجامعية او الثانوية ، البطاقة الذكية، الجواز والسيرة الذاتية ..

5 - تروحين المركز وتقولين لهم ابي اسجل بالتأمين ضد التعطل وبقولون لج الاجراءات يسجلونج ويعطونج ورقة فيها للمتابعه الاسبوعية وبيعطونج معاها تاريخ لمحاضرة.. طبعا المحاضرة مدتها شي ساعه.. وحدها تافهه عن شلون تسوين سيفي وشلون تقدمين اوراقج لاشغال وشلون تكتسبين الوقت وهالاشياء ومن بعدها امتحان اعتبره كلش مال يهالوه مو مرتبط بـ ولا شي يخص الشغل.. وخلاص تقدمين الامتحان وبس..

6- من عقب اول امتحان لازم خلاص الحين من اول ما سجلتين تبدأين تراجعينهم مرة بالاسبوع عشان يشوفون هل فيه اشغال تناسب مؤهلج او لا ..

:lol: طبعا مافيه نادرا الواحد يحصل واذا حصل تكون حدها مش ولا بد.. فيعني لازم تورينهم ويهج اسبوعيا يعني 4 مرات بالشهر عشان بالنهايه ينزل لج المخصص في الحساب.. عادة ينزل من عقب اسبوع وشي الى اسبوعين من كل شهر بس اول مرة يتأخرون ينزلونه عقب شي شهر ونص او شهرين ..


وبس حبيبتي هاي كل السالفة..

طبعا اذا كنتي جامعية بكالريوس وفوق المخصص يكون 150 دينار واذا دبلوم او ثنوي واقل 120 دينار..
حاسبي انج ما تغيبين لازم اسبوعيا اي يوم بالاسبوع تروحين بس عشان تسجلين حضور وبالنهايه ينزل لج.. طبعا تودين معاج الورقة اللي عطوج اياها..

وحدج يعرضون عليج وظيفتين جنه او 3 وظايف ماذكر بالضبط تقدرين ترفضينهم اذا رفضتي عقبها يوقفون المخصص..


والمخصص لمدة 6 شهور فقط!! :thumbs_down:



بالتوفيق حبيبتي :)