السلام عليكم ورحمه الله وبركاته
يارب تكونو بخير انا كنت متابعه برنامج لخبيره التجميل رانيا وقالت على طريقه للبلسم طبيعيه وتعمليها بنفسك فى المنزل فحبيت ان
كل بنات عروس يستفادومنها للامانه لسه مجربتش البلسم بس هجرب واقولكم واسيبكم بقى مع الموضوع
بلسم للشعر دون إضافات
المقادير:
62.5 جم مية بلسم (هتلاقيها عند العطار)
62.5 جم من شمع البلسم (هتلاقيها عند العطار)
3 كوب كبير ميه
الطريقة:
- هنحط الميه على النار لغاية ما تغلي، وبعد كده نضيف عليها شمع البلسم، مع التقليب برفق لغاية ما يدوبوا مع بعض ويتجانسوا تماما، ويغلوا مع بعض غلوتين تلاتة.
- بعد كده هنهدّي النار خالص، ونضيف مية البلسم، ومع التقليب هتلاحظي إن لون الميه بقى أبيض جيري، وبنستمر في التقليب من 4 : 10 دقائق بالكتير أوي.
- بعد كده ارفعي البلسم من على النار وسيبيه يبرد شوية لمدة 5 دقايق، وبعد كده حطّيه في برطمان زجاجي، والبلسم ده ممكن تحتفظي به لمدة سنة كاملة من غير ما يتأثّر بدرجة الحرارة.
بلسم بالأعشاب للشعر العادي والدهني
بلسم الأعشاب اللي هنحضّره دلوقتي بيساعد في علاج مشكلات الشعر؛ زي التقصّف والتساقط..
بلسم الأعشاب
المقادير:
62.5 جم مية البلسم
62.5 جم شمع البلسم
2 ¼ كوب كبير ميه مغلية
مقادير خليط الأعشاب:
ملعقة كبيرة لافندرملعقة كبيرة روزماري
ملعقة كبيرة كاموميل
كوب ميه
الطريقة:
- هنسخّن الميه على النار، وبعد كده نضيف عليها الأعشاب، مع التقليب باستمرار لغاية ما الخليط يغلي، ونسيبهم مع بعض على النار لغاية ما كمية المية تنقص وتبقى نصفها تقريبا.
- بعد كده بنصفّي مغلي الأعشاب، مع مراعاة الضغط على الأعشاب بالملعقة؛ علشان تنزّل كل الفايدة بتاعتها في الميه، وبكده نكون جهّزنا تقريبا 3/4 كوب من خليط الأعشاب. هنضيف مغلي الأعشاب اللي حضّرناه على مقدار الميه اللي عندنا (2 ¼ كوب كبير ميه مغلية)، ونحطّهم على النار علشان يغلوا مع بعض، وبعد كده بنضيف عليهم شمع البلسم، ونقلّبهم مع بعض لغاية ما يدوبوا تماما، وبعد كده بنهدي النار شوية، ونضيف مية البلسم ونقلّبهم مع بعض لمدة 4 أو 5 دقايق؛ بس نراعي إن النار تبقى هادية عليهم، وهنلاحظ إن اللون بقى بيج مش أبيض زي البلسم التاني؛ بسبب وجود الأعشاب.
- وبعد كده بنرفع البلسم من على النار، ونسيبه يهدي شوية ونشيله في برطمانات زجاجية.
- ممكن نضيف ملعقة من عسل النحل على كل أنواع البلسم اللي عملناها؛ بس بعد ما البلسم يبرد تماما، وبكده يبقى عندنا بلسم بالعسل.
يارب تجربوه وتقولولى على النتيجه وانا كمان هجربه انشاء الله
وبدل مانضيع فلوسنا لا نوفر:$:
اشوفكم انشاء الله مع موضوع جديد:)