مشكلتي مع حماتي

اني متزوجة من 4 شهور تقريبا ,, وعايشة في شقة في بيت عمي ,, المهم عندي حماة وحدة بس عمرها 8 سنوات,, و الباقي صبيان ,, حماتي مدلعة واااجد بما انها البنية الوحيدة واصغر وحدة في البيت ,, قبل سنتين توفى عمي الله يرحمه فصارت مدلعة اكثر بما انها يتيمة ,, خصوصا زوجي يحبها ويدلعها ويعتبر روحه ابوها من عقب وفاة عمي ,, طبعا كل هالشي جاب نتائج سلبية و الي تضرر اكثر واحد اني :badly:!!! حماتي تحبني واني احبهااا وااجد ,, اهتم فيها لدرجة اني كنت ادرسها والبسها الخ ,, المشكلة انها تغاااااار مني بصورة مو طبيعية ,, في بداية الزواج كنت احسها تغار بس كنت اقول عادي هي جاهلة و الجهال يغارون ,, بس وي الوقت قمت احصل مضايقات وااجد منها ,,و المشكلة ان غيرتها وصلت لدرجة انها تقلل ادبها عليي وتحرجني قدام الناس!! يعني مثلا مرة من المرات كنت اني وبيت عمي رايحين نزور ناس من اهلهم,, وحماتي كانت لابسة شنطة وتاج اني شاريتنهم اليها ,, شافتني اكلم جاهلة من بناتهم ,, ما شفناها الهي معصبة وتقول تسولفين وياها واني لا!! وقامت فصخت التاج و الشنطة وصفعتهم على وججهي وتقول ما ابي من عندج شي !! الكل استغرب واني انحرجت زين ما صحت قدامهم:'( .. وطبعا كل مرة تطلع ويايي اني وزوجي لازم ترجع متهاوشة ويانا ,, يا انها تبي تركب قدام او تزعل لان زوجي قال ليي كلمة وهي لا :sick::( .. اذا ادخل المطبخ عشان اطبخ شي لازم تبي هي تسوي نفسه وتقول اي عشان محد يقول انتين سويتين واني لا !! تزعل اذا احد كلمني وضحك ويايي ! واذا احد عصب عليها او كلمها تقول انتون تحبونها واني ما تحبوني ,, مع ان و الله محد مقصر عليها في شي وللحين مدلعة وما في شي تغير ,, حتى زوجي من عقب الزواج ما تغير عليها في شي عشان تغار مني جدي ,, وكلمة و الثانية قالت ليي شيلي اغراضش واطلعي من البيت هذا مو بيتكم !!
تعبت وااجد اني وزوجي وكل الطرق استخدمناها عشان ما تغار وتعقل بس ولا شي جاب نتيجة ,, حتى اني الحين قمت اتباعد عنها واتجنبها عشان ما احصل منها مواقف تلوع الجبد:-#,, عطوني حل و الي يرحم والدينكم وسامحووني على الاطالة ...