اللهم اني اسألك ان تجعل كل ما اكتبه خالصاً لوجهك الكريم ..
وشاهداً يوم القيامة لى لا عليِ
اللهم امين
اللهم امين
بخصوص صبغة حنة الاعشاب الهندية رويال
royal henna..بعشبة اوراق الغرس الهندى القديم
انى قررت هذه اللى حانصبغ بيها فى عرسى بلا صبغات اللى تخرب الشعر وتشفشفااا "زى بوشفشوفة الطاغى "هوة وهالميش
والله يابنات وربى شاهد وقسما بالله عندى خالتى بااستمرار ادير فيها ومخلية شعرها حاجة تهبل يابناويت لمعـــــة بالذات ماتتخيلوهاش مش زى الصبغة اللى تطفى لون الشعر وتشهبه وحتى تنعم الشعر
بس انى الحق ماجربتهاش لعند توة بس هالنجربها هاليومين وحانقوللكم على النتيجة لانى حتى جوجلتها فاتشجعت بعد قريت الكلام المكتوب عليها ولقيت اغلب البناويت اديرو فيها ومشكورة هلبة وعندها حتى موقع ...
وحتى للمراة الحامل يعنى لاكيماويات ولا شئ الوحدة اتفكر انه اضر روحها ولا اضر جنينها ...
وهذه انى شريتها صورتهالكم هية والطريقة ولازم اديرو الطريقة زى ماهية مكتوبة بالملى بالذات كمية المية ماتنسوس
..وانى خديت اللون البنى ...
...وفى منها الوان بنى - واسود - وعنابى"برغندى " - واحمر-الكستنائى
وقالولى تقدرى تخلطي كم لون علشان يعطيك لون مختلف
والباكو الكبير فيه ست طروف بس انى خديت زوز باكوات احطياط علشان شعرى طويل واللى شعرها قصير اكيد هاتستخدم كم طرف ..وبعدين سعر الطرف كان قبل الثورة بخمسين قرش وتوة تلقيه عند العطارين بخمسة وسبعين قرش لعند الدينار ..يعنى متوفره هالحنة عند العطرين بس ..وهذه الطريقة المرفقة مع الحنة
وتاكدو يابناويت من الاستيكر الفضى على الباكو وعلى كل طرف هذه الاصلية اما لو مالقيتيشى فامقلدة
في من هالحنة امتاع اليدين والرجليين حتى هية شاكرتها اختى الحق ..قالتلى عادى تعجنيها بالمية بس وتخليها تخمر من 4 ساعات لــ6 ساعات وبعدين حطيها ..
وهذه الوان الحنة المتوفرة ..بس فى السوق عندنا فى ليبيا ديمة ناقص اللون البنى والكستنائى..
1- الاسود
2- الكستنائى
3- البرغندى "الاحمر الداكن "الغامق""ويقولوه حتى عنابى
4-الاحمر
5- البنى
ماتنسو يابناويت اللى جربتها تدخل وتزيد تعطينا رايها فيها..!!
ادعولى يابناويت ربى يقوى سعدى ويسهل زواجى وسترتى ..وماتنسو طبعا الميزان حبيب الكل لو استفدتو من هالمعلومة
