قصة ولادتي

السلام عليكم و رحمة الله و بركاته

طبعا آول شي الحمدلله الذي بنعمته تتم الصالحات
و الحمدلله الذي أتم علي نعمته و رزقني بآحلى بنوته


و الحين نبدأ بقصة ولادتي ..
طبعا انا بكريه و من اول ما دخلت التاسع و انا ودي اولد من الثقل و التعب ،، و كل يوم اتحرى ألم الطلق و اسأل اللي عندهم خبره شلون الألم ،،، وعليه ازعجتهم بأسألتي ،،، يوم كملت اسبوعين من التاسع ،، بديت اخاف اعووشر !! ف قمت اشرب قرفه بس اشرب كل يومين او 3 ايام مره من الخوف .. وما فاد ،، و بعدها قمت اشرب حسو .. وبعد ما فاد ،، بعدها قمت اكل اناناس طازج كل يوم... و مافي بوادر .. و جى يوم 21-10 اللي هو مفروض موعد ولادتي ...
و رحت بيت جدي مثل كل ويك اند و قعدنا نشوي لحم و تعشينا و كل شي تمام .. بعدها رجعت بيت اهلي ... و انا فيني مغص ببطني ،، بس عادي نمت الليل .. وكان معاي الالم مستمر بس كآنه المغص اني ابي اروح الحمام الله يعزكم وو رحت كذا مره بدون فايده .. و رجعت نمت نص ساعه و رجعت قمت على نفس الالم .. بس قلت عادي .. و فجآه الساعه 6 و 3 دقايق صحيت على ألم نقزني من مكاني .. قلت في قلبي اييه هذا هو الطلق اللي يقولون عنه ! ههههههه
و قلت باحسب متى يرجع لي الالم ... و جاني الساعه 6 و 13 دقيقه .. عرفت ان خلاص دقت ساعة الصفر ..
قمت قعدت امي و اختي من النوم و قلت لهم يجهزون عشان نروح المستشفى .. وقلت حق الشغاله تسوي الشاي بسرعه ،،، هههه احاتيهم ابيهم يتريقون وراهم وقفه طويله فالمستشفى
و رحت صليت ركعتين و دعيت ربي ان يسهل علي و ييسر لي ولادتي .. و كان عندي ماي انا قاريه فيه آيات تسهيل الولاده .. اخذته و عطته اختي تحطه بشنطتها عشان اشرب منه فالمستشفى ..
و قبل ماطلع من البيت اكلت 3 تمرات و شربت حليب دافي ،، و توكلنا على الله .. يمكن طلعنا من البيت الساعه 7 وشوي الصبح .. و رحت الطوارئ و يوم جى دوري عشان الفحص قالت الممرضه محد يدخل الا المريضه ،، و ما رضت تدخل امي .. و تمت امي تصيح برع الغرفه ،، المهم جاتني الدكتوره و فحصتني وانا حاطه في بالي ان بتقول لي مافيج ولاده و ارجعي البيت .. بس قالت لي الرحم متوسع 5 سانتي ،، ودوها غرفة الولاده ،، !!
جان يتغير لوني هههههه .. و كنت ادعي بكذا دعاء طول وقت الطلق و الولاده
لا اله الا انت سبحانك اني كنت من الظالمين
حسبي الله الذي لا اله الا هو عليه توكلت وهو رب العرش العظيم
اللهم لا سهلا الا ما جعلته سهلا وانت تجعل الحزن اذا شئت سهلا
و سورة الزلزله ..

نستكمل القصه ،، و جاتني موظفه مواطنه قالت لي انتي فلانه قلت لها ايه قالت امج تصيح برع .. و انا داخله اتطمن عليج .. قلت لها ان قالوا لي ولاده قالت لي اتصلي في امج قلت لها جوالي عندهم .. و راحت مسكينه جابت جوالي و جات وكلمت امي .. وقالوا لي بندخلها لج في غرفة الولاده .. المهم و راحت عني الممرضه و بعد مده ناديتها قلت لها متى بتوديني غرفة الولادة ؟ الا تقول لي غرف الولادة مليانه انتظري 10 دقايق .. و بعدها قالوا لي يلا و رحت غرفة الولاده ،، قلت لهم ابي امي ! قالت اول شي بدلي ملابسج و نركب جهاز الضغط و الطلق و النبض وبعدين ندخلها ،، وبعد ما خلصت و ركبت المغذي وكل شي ،، دخلت امي .. واختي ،، جان تصيح امي و اصيح وياها .. و مستحمله الالم و ساكته .. بعدها جاني الدكتور اللي بيولدني .. يمكن بعد ساعه او ساعتين من دخلت الولاده جى .. و فحصني مره ثانيه وقال لي 6 سانتي .. و سآلني اذا ابغي ابرة الايبدورال ( ابرة الظهر ) قلت له ماعرف متردده ،، قال اتخذي قرار قبل ما افتح جيب الماي ،، و طلبت امي و دخلت علي و تناشقنا و قلت له ابيها و بعدين جاني دكتور التخدير و قال لي الاعراض الجانبيه و قال لي فكري برجع لج ،، و لما رجع قلت له بتوكل على الله و باخذها .. و زوجة خالي و رفيجتي يقولون لي لا تاخذينها و اخذي بس الاكسجين ف جربت الاكسجين وماحسيته فادني و لا خفف الالم .. و كنت اسمع صوت صراخ اللي يولدون و خوفوني زياده .. و جى بعدها الدكتور و عطاني اياها .. و بديت احس شوي شوي تنمل رجولي و يصعد التخدير شوي شوي .. طبعا الابرة يبقى منها انبوب صغير بالظهر طول وقت الولاده .. بعدها جاني دكتور التوليد و فتح جيب الماي .. و بعدها ارتحت شوي لان ما قمت احس بألم الطلق الحمدلله ،، بعدها الممرضه قالت لي نامي على جنب عشان ينزل الراس اكثر ،، و آآه من الالم بعد ما انقلبت على جنب ،، تألمت واييد مع انها تقول لي مافي طلق على جهاز الطلق ،، بس كان ألم نزلة الراس يعور ،، و بعدها نومتني على الجهه الثانيه و كان لما يبين ان في طلق تقول لي بووش .. و كنت ادفع ،، بعدها جاني الدكتور و فحصني و قال لي 9 سانتي و بعدها بشوي رجع لي وقال 10 سانتي ،، و طلب من الممرضات يحطوني في وضعية الولاده .. وانا اطالعهم مب مستوعبه ان خلاص باولد !

و طبعا بدوا الممرضات و الدكتور يقولون لي ادفعي و يشجعوني و امي و خالتي و اختي واقفين عند باب الولاده .. و طبعا قامت الممرضه و الدكتور يضغطون على بطني بقوه ،، و تألمت من ضغطهم ،، لان كانوا يدفعون البيبي معاي ،، و بعد كم دفعه قويه مع اخر دفعه صرخت صرخه خفيفه و مسكينه امي تقول سمعت صرختج و صحت زياده ههههه ...
و بعدها سمعت صياح اسومتي حبيبتي :L: اعلنت قدومها لدنياي
و قمت انا اصيح و يقول لي الدكتور الحمدلله على السلامه ،، و بعدها تعذر مني ماقدر يخيطني لان عنده قيصريه ،، و جاتني دكتوره ثانيه خيطتني ،، و خذت في خياطتي ساعه كامله .. و انا كنت احمد ربي و اشكره على النعمه .. و ولدت الساعه 2 الظهر ،، بتاريخ 22-10

و ما شاء الله كل اهلي تقريبا جاوا المستشفى وكانوا يدخلون و يتطمنون علي و يقرون علي قرآن ..

الحمدلله يارب :adore:

ادعوا لبنتي ان الله يجعلها من عباده الصالحين و يحفظها لي ولابوها