بعد ثلاث سنوات وانتظر

السلام عليكم ياعروسات ,,, متضايقه واريد افضفض ليكم لاني معتبرتنكم خواتي واحنا كلنا خوات في هذا المنتدى ,,,, ابدا ليكم من بدايه زواجي ما كنت امبي احمل بسرعه وكنت امبي اتاخر وكل ما يمر شهر بدون حمل اقول في خاطري خلني امهل شوي وتوني متزوجه بس كان الشي كله طبيعي يعني بدون موانع ولا هالسوالف ما كنت مهتمه للموضوع لكن في نفس الوقت اذا ربي رزقني وحملت ما اعارض وبعد بستانس واايد بالاخص اول ولد , واتجيني اوقات اتخيل فيه لو اكون حامل او يصير عندي ولد وكان يراودني شعور بالراحه والرضا لو حصل هذا الشي , ومضى على زواجنا سنه وحسيت حزتها فعلا صار تاخير وزوجي اعصابه من ثلج ومو هامنه الموضوع حتى يقول ليي انا ما افكر في هذا الشي والصراحه صرت اتحسست من اقل شي يعني لو اروح مكان يبيعون فيه ثياب يهال او كتب اطفال اتباعد عنه واحس هذا المكان ممنوع اوقف عنده الا اذا فعلا صار عندي طفل , وبعدها كملنا السنه الثانيه ورحنا نفحص وما كان في اي عارض يعني اثنينا طبيعيين , لكن شعور الامومه برد فيي ولا حسيت بعد هالفحص يصير حمل وشعور كان في محله وكملنا السنه الثالثه والحين ثلاث سنوات صار ليي واللي يقهرني كلام الناس يعني امثر من وحده تقول ليي انتين ثلاث سنوات مو وايد وفلانه صار ليها عشرين سنه وفلانه ثانيه صار ليها ثلاثين سنه صدق الكلمه الطيبه ليها تأثير على النفس يعني لو وحده تقول الش مثلا الله يعطيش تحسين بالراحه من كلامها وتحسسش بالمل لكن غير الثانيه اللي تقول افلانه مهلت عشرين تحسسش باليأس وكانها تقول لش امهلي مثل افلانه او بتمهلين عشرين يعني هو مو ابتعدد السنوات يعتبر تاخير , اتصدقون احس روحي بعد ما بحمل ولا بصير في يوم من الايام ام والثلاث سنوات كانها بتتضاعف اكثر حتى وحده قالت ليي عن اسم دكتورة زينه وهي تعالجت عندها وحملت واني اقول في خاطري بعد خلني اصبر ما ادري اللي اسويه صح واللي افكر فيه طبيعي اعتبر متاخرة وعليي اتحرك على تاخر الحمل وفي النهايه هذي ارزاق يعني اقول في نفسي اذا الله كاتب ليي بالذريه بيرزقني بدون ما اروح للدكتورة ومو شرط في ناس يتعالجون سنين والله ما يرزقهم .