حمـــــــــــــــــــسة المــــــــــالح

1.
السلام عليكم بنات اشحالكم
اليوم حبيت أنقل لكم من خبرتي الخاصة طريقة عمل غداء خفيف ولذيذ
وإن شاء الله تجربونه ويعجبكم يا رب
اليوم سويت هالغدى وهو غدى بحري وقديم مال أول
الغدى هو:
"حــــــــــمسة المالح مع العيش الأبيض"
مقادير الحمسة "طبعاً العيش الأبيض ما يحتاجلة شرح"
*قطعة مالح متوسطة الحجم "مالح جيذر أو سهوة " ما تفرق
*حبتين طماطم طازج
*فلفل اخضر حار أو بارد حسب المفضل عندكم
*راس ثوم
*3 رؤوس بصل
*بقدونس
*ورق غار "حسب الرغبة" ويستخدم لقوة النكهة
*كيس طماطم واحد مدهش
*بهارات مشكلة :فلفل أحمر, هيل مطحون , قرفة مطحونة , بزار أخضر "كاري" ,كركم"جزع"
*زيت للقلي
*فنجان عصير ليمون حامض.
طريقة التحضيــــــــــــــــر:
1-نغسل المالح زين زين لين يخوز الملح عنة أو نخفف من حدة الملح اللي فيه بالغسل.
2-نطبخ المالح ب ماي مغلي بس بدون تقطيع بس من بعد الغسل على طول ف قدر الماي المغلي ونقدر نضيفلة شوية كركم وفلفل احمر مطحون وهو يغلي مدة عشر دقايق أو من لما نحس أن لحم السمكة بدى يلين وينتزع بسهولة لما ناخذ منه.
3-نطلع قطعة المالح من الماي المغلي ونبدى نقطعها بإيدنا بس ما نفرمة بس مجرد تقطيع بسيط بحيث تكون قطع صغيرة ونحطة ع جنب .
4-قبل ب وقت نكون مقطعين البصل ل مكعبات صغيرة يعني بصل مفروم ونحطة بروحة ف صحن, ونقطع الطماطم بعد لمكعبات صغيرة ونحطة بروحة , وندق الثوم زين ونقطع الفلفل الأخصر لمكعبات صغيرة بعد "أنا سويت فلفل حار"
ونقطع البقدونس ونفرمة زين بالسكين.
5-نحط كمية من الزيت ع النار ونحط فوقة البصل ونقلبة ليحمر ونحط فوقة الثوم والفلفل الخضر وورق الغار ونقلبة وبعدين نحط المالح المقطع فوقة ونقلبهم مع بعض شوي وبعدين نحط الطماطم الأخضر ونقلبة زين ونحطة يرتاح شوي ع نار هادية عشان يذوب الطماط ف قلب الحمسة ونرجع نقلبهم بين كل دقيقة والثانية عشان لا تلصق الحمسة فالمقلاة وآخر شي عاد نضيف طماط المدهش والبقدونس ونرش فوقهم البهارات المشكلة رشات بسيطة بدون مبالغة.
6- نحط البقدونس ونرش عصير الليمون ف الحمسة عشان تتجانس المكونات مع بعض وللمساهمة في تخفيف ريحة السمك ونتركهم 5 دقايق مع التقليب اللطيف ع فترات بس ع نار هادية جداً عشان لا تلتصق المكونات ب قلب المقلاة.
وقدمو الطبق مع سلطة وروب يم يمي
"واقولكــــــــــــم:صحتين وعــــــــــــــافية"