قصة ولادتي بـ "حلا".

مرحبا بالجميع،
بما انها اول مشاركة الي، حبيت اعرفكم بحالي: اسمي خديجة وانا من فلسطين من عرب الـ48.. بعمل مدرسة لغة عربية..
وهاد قصة ولادتي:-
هاد اول حمل الي "بكرية"، تارريخ ولادتي المتوقع كان 29/9/2011، اول ما دخلت شهري وانا فاقدة الصبر وحابة اولد وارتاح.. وكل ما ينتابني الم بسيط اتأمل واقول هاد طلق، بس بعدها يتبين انه مجرد طلق كاذب :/..
في اول شهري كان عندي طلق منتظم بس ما في فتحة، فقررت اصير امشي على امل اني اولد. فكنت كل يوم اجُر جوزي ونروح نمشي.. بس بالنهاية فلست وسلمت امري لالله وقولت امتا ما تيجي تيجي ما عاد يهمني!!
خاصة اني كنت حامل انا واختي ومعطيينا نولد بنفس التاريخ. بس اختي كمان ضلت حامل لبعد شهرها. لحد ما قررت اروح انا واياها على المستشفى ونكشف.. حتى كل الدكاترة كانوا يضحكوا علينا كيف انه جايات مع بعض نولد!
بعد الكشف قال لنا الدكتور انه احنا التنتين عنا الرحم مفتوح 2سم، وانه في امل بهاليومين نرجع لحتى نولد واذا ما صار شي ع الاسبوع الـ41 نرجع نوخذ طلق صناعي.

مروا يومين ومر تاريخ الولادة المتوقع وما في اي بوادر ولادة، وبعد تمام الاسبوع الـ41 وكان يوم خميس تاريخ 6/10/11، حضرت الشنطة وجوزي اخذ اجازة عمل ورحنا على المستشفى..
بعد الكشف قال الدكتور انه الرحم فاتح عندي 2.5 وانه كمية المياه حول الجنين قليلة. حوّلني على غرفة الولادة. وهون بديت اخاف واتوتر.. اتصلت لامي ولحماتي وخبرتهن.. وبعد ساعتين انتظار دخلوني على غرفة الولادة :hysterical:. انا وقتها كثير خفت. خاصة لما سمعت صوت الصراخ اللي بالغرف اللي بجنبي.
وقتها كان بالغرفة معي امي وجوزي وحماتي، كل شوي اطلب منهم ينادوا اللي بخدر خليه يعطيني ابرة الظهر، وهاد من كثر الخوف.
وكل ما تيجي المولدة اطلب منها تنادي على المخدر.. ولا حياة لمن تنادي :(. وظيفتها بس تطلع اللي بالغرفة لانه مسموح بس مرافقين 2 يكونوا معي مش اكثر! واخر اشي عصبت وقالت انه اذا ما اطاعوها رح تجيب الامن يطلعوهم :(.
وبعد ساعتين من المطالبة اجا اللي بخدر وحطلي ابرة الظهر، للبنات الحوامل اللي بقروا، مشعرتش بالمرة بالابرة بس وخزة بسيطة وهاد هو! يعني ما تخافوشّ.
بعد ما حط الابرة مشعرتش باي الم يذكر.!
بس حبيت اذكر انه لما دخلت على غرفة الميلاد كانت الساعة 6:00 بعد العشاء، مرت الساعات والطلق عندي مش قوي كما يجب على الرغم من انهم حطولي طلق اصطناعي.
صارت الساعة 3 الصبح واجت المولدة تفحصني، وهون المفاجأة: الفتحة مش متقدمة يعني كل هاد الوقت وهي بس 2.5 :confused:!!!
وقتها يأست!! وفكرت اني رح اضل ايام بغرفة الولادة لانه التقدم بطئ جدا وحتى شبه معدوم!!
بس المفاجأة الثانية انه ع الساعة 4 الصبح رجعت فحصتني ووجدت انه الفتحة6 سم! :D
فقالت لي انه هسا ساعتين زمان وبنتك بتكون بحضنك وهون طرت من الفرحة، اخيرا رح اشوفها :D..
رجعت ع الساعة 5 فحصتني وقالت لي انت هسا جاهزة للولادة، بعطيك نص ساعة نامي وارتاحي وبرجعلك.
صحيت جوزي اللي كان نايم وماخذ راحته هههه! وقلتله يتصل لامي وامه لحتى يجوا! لانهم كانوا مروحين بسبب انه فش تقدم بالولادة!
ع الساعة 5:35 رجعت المولدة، وقلتلي خلص ! بدنا نبلش شد.. وهون فاتت امي ع الغرفة والحمدلله انها وصلت ع الوقت واني ولدت بحضورها!

بدات المولدة تقولي شدّي، وانا، لاني ما توجعت وما تعبت من الوجع ، وكنت بين فترة والثانية انام.. معاي قوة اشد مشان هيك ما كان صعب عليّ...
مسكت رجليّ وبديت اشد.. وسبحان الله، رغم قوة المخدر الا اني حسيت انه في اشي بدفع جوا.. فقالت لي المولدة كل ما تحسي بالدفعة شدّي...
ربع ساعة شدّ، خلالهن شجعوني كثير مشان ادفع وحلا صارت بحضني :D..

يعني: 12 ونصف، مجمل وجودي في غرفة الميلاد
41 اسبوع مجمل حملي
درجة الالم والشعور بالطلق كانت صفر بسبب ابرة الظهر ولله الحمد :)...

بالنهاية، بتمنى لكل الحوامل يقوموا بالسلامة، وبقولهن ما تخافوا لانه كل جسم بختلف عن الاخر وكل تجربة بتختلف!