&التجمع السادس لحوامل شهر يناير 2012&

السلام عليكم يابنات

جمعة مباركة عليكم جميعا

ليا كذا يوم كل ما أدخل وعلى ما أقرأ الواجب أكون تعبت ومش قادرة أقعد أكتر على اللاب

فما أقدرش أكتب أسلم عليكم أو أرد حتى عليكم

مع إنى عندى أخبار جديدة من يوم الثلاثاء

اخيرا يوم الثلاثاء إستلمت إقامتى وورق التأمين بتاعى

ورحت المستشفى اللى كنت متابعة فيها قبل ما أسافر ولقيت الدكتورة اللى كنت متابعة معاها

سافرت

فحولت ملفى لدكتورة سورية فى المستشفى

المهم حكيت لها على كل اللى مر بيا من أول الحمل لغاية ما زرتها

وإشتكيت لها من الإفرازات الكتير اللى عندى المهم

قاست نبض الجنين وسمعته ربنا يحفظه :adore:

وقالت لى ماشاء الله اللهم بارك تمام

وكشفت عليا من تحت وقالت لى دى فطريات وكتبت لى على تحاميل لمدة 3 ايام

وطلبت منى تحليل السكر أبو عصير:hysterical:

وحولتنى أعمل سونار 3دى :D

طبعا لانى ما كنتش صايمة يومها فأجلت تحليل السكر لأمس

وعملت يومها بس السونار

قالت لى إن وزنه ماشاء الله اللهم بارك دلوقتى 1500 جم قلتها هو كده وزنه كويس قالت لى أه كويس

وقالت لى إنى يوم الأربعاء اللى فات أدخل الأسبوع 31

استغربت لانى المفروض حسب موعد الدورة كنت يوم الاربعاء أدخل الأسبوع ال30 مش ال31

المفروض موعد ولادتى يوم 28 /12حسب الدورة

وسالتها تانى علشان افهم واكدت لى إنى هأدخل الأسبوع ال31 يوم الاربعاء اللى فات

طبعا أنا بقيت كده:biggrin:

الواحد فى عرض يوم يقدمه وهى قدمتنى أسبوع كامل

قلت الحمد لله

وقالت لى كل شىء تماما واكدت لى إنه إن شاء الله عمار

وكان نفسى اشوف وشه كويس لكن حبيب ماما كان نايم وحاطط إيده على وشه

وحاولت بكل الطرق تخليه يغير وضعيته مش عايز فين فى الآخر خاااالص لما حضرته صحى من

الإزعاج :lol:

ورفسنى كام رفسة كده واخيرا شفت وشه شوية كان قريب لشكل البيبى اللى فى توقيع ورودة

:adore:

بأقول لزوجى أنا حامل فى وحش السونار مطلع شكله صعب قوى الإيد وارمة والعينين منفخة

والخدود وارمة وحاجة صعبة خالص بس برضه باحبه:p

على ما خلصت السونار كنت هأصرخ من ظهرى ما كانش مصبرنى على نومة الظهر دى كلها غير

إنه كان واحشنى قوى وكان نفسى أشوفه كويس

الحمد لله إتطمنت عليه

وامس رحت الصبح على الساعة 9 عملت تحليل السكر

أعوذ بالله العصير مسكر قووووى وإلا لازم أشربه قدامها كله وتقول لزوجى فيه 75 جم سكر :-o

المهم بعدها طلعت فوق فى المستشفى أشوف بقى نظام الولادة هيكون إزاى وأتفرج على الغرف

وأستفسر

المهم دخلنا الاول مكتب إدارة تبع المستشفى قالوا لنا الولادة الطبيعية فى مستشفى المملكة ب

7500 ريال يومين والقيصرية ب16 ألف أربع أيام طبعا الأسعار نااااااار

والراجل اللى فى الإدارة قال لنا إن الدكتورة اللى باتابع معاها هى اللى هتولدنى إن شاء الله أنا

إستبشرت خير

المهم بقى طلعت علشان أتفرج على الغرف واعرف النظام

ماشاء الله الدنيا هاديييييييية فى الدور بتاع النساء والولادة

والغرف كلها مسكرة

المهم رحت للممرضات فى الإستقبال قالوا لنا إن الغرف كلها فل :-o

قلت ماشاء الله اللهم بارك قالوا إطلعوا الدور اللى فوق زى الدور ده بالظبط ممكن نلاقى غرف فاضية

فوق

المهم طلعنا وسالنا لقينا نفس الأمر الغرف كلها فل ومافيش غير غرفة واحدة هى اللى فاضية

وبيعملوا فيها توضيبات أو تحديثات والممرضة بالعافية رضيت تدخلنا نتفرج عليها لقيناها كويسة

بالنسبة لانها عادية فيها سرير وكنبة ومكتبة فيها تليفزيون وحمام خاص واسع

وستار بعرض الحيط بس ما خدتش بالى فى ثلاجة ولا لا بس اصلا المفروض إنى مش هأحتاجها

لان النفساء مش بتشرب حاجات باردة

المهم كنا عايزين نعرف بقى إيه اللى هيعطوه ليا فى المستشفى علشان اعرف هاجهز الشنطة

بتاعة المستشفى بإيه سالنا الممرضات قالوا لنا ما نعرفش إسألوا فى الدور اللى تحت نزلنا قالوا لنا

إسألوا فى مكتب مش عارفة إيه فى نفس الدور

المهم قعدنا ندور فى الدور على المكتب ولقينا نفسنا وصلنا للحضانات بتاعة البيبهات

ماشاء الله اللهم بارك أطفال كتير كلهم تقريبا نفس العمر

وماشاء الله منهم اللى نايم ومنهم اللى بيغيروا له ومنهم اللى بيرضعوه

وماشاء الله لافين البيبهات بنوعين من اللفات لفة بيضاء ولفة بينك

قلت أكيد الولاد بالأبيض والبنات بالبينك :)

المهم لقينا دكتورة خارجة من قسم التوليد تقريبا فسألتها على أساس إنها العربية الوحيدة اللى

قابلتها فى القسم ده كله المهم قالت إنهم بيلبسوا البيبى لبس المستشفى أول يوم بس وبعدين الأم بتلبسه غياراته الخاصة

والام نفسها بتجيب اغراضها كلها معاها

حسيت إنها بتتكلم بشكل عام

لانى من خلال النت عرفت إن غالب المستشفيات بتصرف حاجات للبيبى والام خلال فترة إقامة الام

فى المستشفى

زوجى قالى خلاص ياستى مش مشكلة خدى حاجتك كلها على أساس إنهم مش هيعطوكى

حاجة

واللى مش هتحتاجيه إركنيه فى الشنطة ما تستخدميهوش

كده بقى أنا مش عارفة أنا دخلت الثامن ولا لا

المفروض حسب السونار انا بدأت الأسبوع ال31 يوم الأربعاء

اللى تعرف الثامن يبدأ إمتى بالظبط تقولى جزاها الله كل خير مقدما

معلش الخط صغير النهاردة علشان اللاب باعمل له أبديت ولسه مش متظبط ومش راضى يفتح

معايا أيقونة حجم الخط

كان نفسى أرد عليكم كلكم بس للأسف حصل لى فقدان للذاكرة لأنى كل يوم أدخل أقرأ

وماألحقش أرد اكون تعبت والنهاردة على ما جيت ارد كنت نسيت كل الردود

وياكتب الرد يا اراجع الواجب