يابنات انا تعبت من امي ذبحتني ، كل يوم نفس الكلام ونفس الاسلوب ونفس الطريقة ،، ماعرف شسوي معاها ، اول مرة اشوف في حياتي ام جي ، والله تعبت منها ، سمعوا واحكموا؟؟:'(
قبل لا اتخرج من الجامعه يمكن تقدمولي 3 وكلهم ناس مانعرفهم ومش اماراتييين مع العلم اني اماراتيه بس من اصل ثاني ، وطبعا كان باقيلي على التخرج يمكن 3 شهور ، المهم في كل مرة تيي تقولي متقدملج واحد عمره جي ويشتغل جي ومن مدينه ثانيه يعني مثلا انا فابوظبي هو من دبي والي يقهر اكثر تقول انهم ناس طيبين وهي اصلا ماتعرفهم ولا تكلف على عمرها تسال عن الريال ومايهمها الاشيا الثانيه ، مثلا اني جامعيه ، اهم شي عندها انه ريال:|
والمشكله ماتتعلم من اخطائها اختي الي قبلي خطبها واحد وعطول وافقوا عليه بدون مايسالون عنه زين مع انه كان عنده اعدادية واختي جامعيه وكانت اكبر منه بسنه ، بس وافقوا من الضغط عليها لنه عمرها كان 25 وهي بعد شكلها خافت مااييها حد بعده ، المهم اخر شي طلع يدخن وبعد 3 شهور صارت مشاكل بينهم وصلت للطلاق ، وبعد كل هذا توفى بعد مايابت اول ولد وكانت حامل بالثاني ، ادري مكتوب عليها بس الحين يالسة تعاني لوحدها ومايقولون هم السبب ويوم تبا تشتغل امي ماتحب تمسك عيالها مب عايبنها :(
وانا ماحب ارمي نفسي بايدي لنفس المصير ، المهم هالثلاثة كانوا خاطبيني لسبب واحد اني اماراتيه وتعرفون الدولة ماتقصر كله بالمجان وهم يبون يخففون حمل عنهم ، وانا عادي ماتفرق وياي بس مابا ايي اليوم الي يطردونه من شغله وهو ماعنده شهادة يقدر يضمن نفسه فيها ، الحياة صعبه ووتزداد صعوبه ، المهم اني رفضتهم من دون مااخليهم اييون عندنا لني رافضة المبدا اساسا وكنت مابا حد يختارني عشان جوازي بس ، وامي كانت زعلانه مني لني ماوافقت بس انا استخرت ربي وكنت مرتاحة من قراري
المهم بعد ماتخرجت باقل من شهر كان عمري 23 ونص تقدملي واحد جامعي وعمره وشغله كان يناسبني وطبعا كالعادة مش اماراتي ، المهم انا وافقت عالمبدا وتعرفنا عليهم ودخلوا قلبي ومن اول مااتصلوا وانا استخير طبعا ، لين يا يوم الشوفة ، يوم شفته ماعيبني ابدا ماتخيلت اني اقدر اربط نفسي مع شخص مثله طول حياتي ، هو ماكان سيء بس اقل من عادي ، بس على طول ياني ضيق فصدري والي زاد الطين بلة حسيته مستحي بدرجة فظيعة وانا ماحب الريال الخجول بتقولون ظلمتيه يمكن مرتبك بس اقولكم لا حتى مع اخواني تم ساعه يالس لين ينطق اول كلمة وهو الولد الوحيد بين 4 بنات ، المهم اني من شفته حسيت حد يالس عصدري وبعد ماراحوا سالتني امي شو رايج قلتلها ماباه ، طبعا كنت اصلي طول الاسبوع بس قالولي بعدج استخيري واستخرت على قراري هذا وارتحت وماصار نصيب ، المهم تم ابوي كل ماشافني يقولي رديتي الريال ومادري شو ، عفكرة كل ماايني حد جي يسوون يعورون راسي ، وانا قلتلهم من قبل لو ماعيبني بقول ، مثل ماالريال له الحق يقول ماعيبته انا بعد لي الحق فهالشي ، ولا حلال عالريال وحرام عالحرمة ، قتله خلاص لو ياني حد لاتيلس عند الرييال اذا انت متقفط اني رديته ، المهم مر شهرين وانا مرتاحة من قراري وماحسيت بندم ابدا :)
وبعد شهرين ونص من تخرجي لقيت وظيفة في شركة خاصة وصارلي اسبوعين فيها بس بعدهم ماثبتوني ، المهم نحن نعرف حرمة قبل انها ادور حق عيالها بنت اماراتيه واهم شي تشتغل ومش مهم تكون حلوة يعني الجمال مب شرط اساسي اهم شي هالشرطين ، ياجماعه قولولي ليش الناس صارت جي قولولي L ، ونحن نعرفهم ناس طيبين وبناتها حبوبات ، المهم امس امي قالتلي انها تباني حق ولدها قالتلي شو رايج قلتلها مادري ، سالتها شو تعرفين عنه قالت يشتغل فابوظبي وعمره كالعاده ، يعني هالشي يخليني اوافق ليش ماسالتيها شو يشتغل ؟ قالت انا مابسال حد تبينه قولي هيه ماتبينه قولي لا ، ياجماعة قوليلي شو الحل معاها ، تبا تفتك مني وخلاص مش مهم اكون سعيده تعيسة اهم شي اتزوج وخلاص ، قلتلها انزين انا ابا اشوفه قبل لايصير شي ، مابا احط نفسي واحط الناس في موقف يعني من البداية مابخليهم اييون اذا انا ماارتحتله ، قالتلي هو ماطلب صورتي ، قلتلها هو طلب شيئين ومااهتم بشكلي والحمدالله الي يباه فيني ، من حقي اشوف الشي الي اباه فيه ، قالت انا مابتكلم ولابسال ولابسوي شي تبينه قولي هيه ماتبينه قولي لا ،،:'(
يابنات بالذمة هذي حالة والله تعبت منها ، عمري مابتزوج جي ، مابا حد اييني البيت وعقب اقول لا ، والله الناس تتكلم وانا مابا حد يقول عني اييونها لين البيت ورفضت والله مش حلوة فحقي ولا فحق اهلي
ادعولي الله يسهل اموري ويزرقني الزوج الصالح ،،،،، :'(:'(