قصه معاناتي..في الحمل او الولاده او بعد الولاده..

السلام عليكم والرحمه..

شخباركم..امهات..وكروشات..وكل شي..؟؟
اليوم حبيت انزل لكم قصه حملي وولادتي وبعد ولادتي..

انه كنت في تجمع حوامل شهر 7/2011
وكان موعد ولادتي 9/7/2011
او ولدت في تاريخ13/7/2011

انه صار لي من تزوجت 5 سنوات .. والحمدلله الله رزقني ببنوته قمر..بعد اجهاض مرتين..
في المره الاولى كان سبب الاجهاض إني ماكنت عارفه إني حامل وماحاسبت حق روحي
اروح واجي ودرج وكعب وحاله واجهضت .. والثاني كان في رمضان وخبركم رمضان شغل البيت
وتعب وانه في بيت زوجي مايحاسبون لي يعني اذا ماسويت شي اروح فيها فكنت اشتغل وياهم وعقب اجهضت وبعدها جاتني الدوره ومن بعدها تاخرت في الشهر الثاني يومين جذي ورحت المستشفى وكلش ماكان في بالي اكون حامل بس طلعت حامل والحمدلله..ورحت البيت واخذت اغراضي ورحت قعدت عند امي اريح لي .. وصادني الوحام ااخ شنو لعوزني صرت ماكل بالمره وكله ترجيع او لوعه وكله بالمستشفى يحطون لي مغذي لمده اربعه شهور وبعدها الحمدلله راح الوحام وارتحت منه والاشهر الباقيه كله تصيدني دوره يغمى علي في كل مكان لي الشهر التاسع المهم عدت على خير وقرب موعد الولاده وانه ماكنت حاسه بشي غير الم خفيف في بطني مثل الدوره وافرازات عاديه وجى تاريخ 9 وعدى وانه انطر انطر متى بولد ولمى جى تاريخ 13 الصبح الساعه 8 قعدت من النوم وكنت لابسه كوتكس ورحت الحمام عزكم الله وجفت فيه مثل الدم بس فاتح كلش وعلى طول قعدت زوجي وقالي اروح اقول حق عمتي الا اهي امه وقلت لها وسوت لي بخور وتبخرت فيه وشوي الا احس بألم خفيف يروح ويجي ظليت جذي الى الظهر وتغديت وزاد الالم اكثر واتصلت حق اختي قلت لها وقالت لي من تروحين المستشفى خبرينا وانه حاسه بخوف مو طبيعي من الولاده والعصر رحت مع اخت زوجي الصالون وحفيت وانه هناك اتعصر من الالم كل مايجي والمغرب زااد اكثر ورحت المستشفى وكل شوي يزيد وانه في السياره خاطري اصرخ بس اخت زوجي الي اخذتني عالمستشفى لو زوجي جان صرخت او وصلنا المستشفى واخذوني على غرفه الفحص وانه هذا الي خوفني اكثر من جفت النرس لبست القفاز وقالت لي بطلي ريولج مت من الخوف وتوها بدخل صبعها الا جاني الالم قلت لها لحظه وماجوفها الا تصارخ علي تقولي ماتبين روحي مستشفى ثاني لا تدلعين وانقهرت انه شنو ادلع الم يذبح تقولي ادلع المهم فحصتني بعنف وقالت لي مفتوحه بس 1 سم وانه اقول كل هالالم وبس 1 عيل بعدين شبصير فيني..قالت لي اكلي وتمشي شوي تو الناس..وتمشيت شوي في المستشفى وكل مايجي الالم اقعد عقب زااد وايد ماقدرت اتحمل رحت لهم وحطو لي التخطيط وكل مايفحصوني 1 سم ماتغير وزوجه اخوي جابت لي حليب ويا قرفه وشربت شوي وعقب جى زوجي وجفته شوي وراح وظليت بروحي بالمستشفى والالم فضييع ذبحني وظليت اقرأ آيات وادعيه وعقبها ماقدرت اتحمل وقمت اصرخ وقالو بياخذوني على غرفه الولاده وفصخت ملابسي وعطيتهم كل اغراضي ودخلوني وانسدحت على السرير الي يخوف وانه بردانه قلت لهم بندو المكيف وفحصوني وبعدي 1 سم قلت لهم عطوني شي يخفف الالم بموت ومحد مفتكر فيني وقاعدين في الممر ضحك وسوالف وانه اناديهم ولا كأنهم يسمعوني ولا مفتكرين او سمعت وحده مسكينه تولد تناديهم ومحد راح لها وهي تصارخ من الالم تقولهم الياهل بيطلع يقولون لها معلي دفعي بس واخذي نفس واهمه قاعدين ولا يدرون عنها وعقب راحو لها بعد ملو من صرخها الا الياهل طلع راسه والمسكينه بروحها تعاني وانه زاد خوفي اكثر واكثر واناديهم ويجون يفحصوني ومثل الشي ماتغيرت وجت الساعه 2 و3 و4 وطافت 5 وانه مثل الشي بس صراخ والم اااااخ ماقدر اوصفه وبعدها نزل الماي وناديتهم وفحصوني وبعد مثل الشي 1 سم ماتغيرت قلت لهم بموت من الالم عطوني ابره الظهر يقولون ماعندنا وكل شوي يطقوني ابره في فخدي مادري حق شنو وبعدها جاتني نيرس هنديه وفحصتني الا انه مفتوحه 10 سم ونادت الدكتوره وقالت ماشاءالله مره وحده 10 سم تقولي يلا احين من يجي الالم ادفعي وانه ادفع ادفع وميته وربي من الالم تقولي يلا بعد ادفعي ومن يروح الالم انام من غير احساس ويقعدوني بصراااخ قوومي انتي في ولاده لاتنااامين وانه اصيح من قلبي واصارخ يقولون لي لاتصارخين ولا تعضين شفايفج بس ادفعي اقولهم ماقدر الم قوي يقولون لازم هذي ولاده وبعدها ماحسيت بروحي مادري شسويت من الالم والياهله تنزل وحسيت فيهم لما جرحوني حسيت بحرقه وطلع راس الياهله او وصل لي الرقبه او وقف الطلق وماسمع الا يصارخون علي ادفععععععي بتختنق بتختنق وانه ادلفع بقووه وطلعت وركضو فيها بسررعه لانها مخنوقه وعقب يابوها لي وقالت لي جوفيها بنت وانه مو حاسه وعقب قالت لي يلا ادفعي عشان ا المشيمه وطلعت المشيمه وونظفت الرحم وانه اصارخ لانها دخت يدها كلها وتضغط على بطني بقوه وهي تصارخ علي كانت معاملتها كلش مو اوكي وبعدها نمت وجات دكتوره وبنجو لي الجرح علشان الخياط وخيطوني وماحسيت بشي وتاخرو وايد في الخياط لان الجرح لي وره وبعدها حطو لي انبوب حق البول مادري ليش ورحت على سرير ثاني وكلش كنت تعبانه واتصلو حق زوجي وزوجي اتصل حق امي وجاتني امي واختي ومن جافوني بهالحاله ظلو يبجون علي وعقب طلعوني حق زوجي ورجعوني مكاني الى الظهر وشالو مني الانبوب وقالو لي بعد شوي بنوديج فوق الغرفه او ولا قالو لي بولي او اي شي وانه بكريه وماعرف ورحت فوق ولا احس ان فيني بوله الى يوم ثاني خبرتهم قالو شربي ماي وقالو لي عندي اللتهاب في البول وعطوني مضاد او انه احس بالم في بطني ومنتفخ ومابلت ورخصوني ورحت البيت ونفس الحاله مابلت وبطني ينتفخ اكثر واكثر وظليت على هالحاله 3 ايام تخيلو مابلت وبطني صار حجر كاني حامل ورحت المستشفى وسوو لي اشعه بالاترساوند وقالت لي الدكتوره شنو هذا المثانه مليانه بول وحطو لي انبوب مره ثانيه عاد اتحمل شنو وله شنو الم الجرح لو الانبوب وطلعو لترين من البول وارتحت وايد ورجعت البيت ونفس الحاله مابول ينتفخ بطني ويصيدني الم كانه طلق ولاده ورحت مستشفى خاص ونفس الحاله طلعو مني لترين بول ورجعت البيت مثل الشي تعذبت وايد مادري عن بنتي وكنت الحمدلله ان انه عطيتها حليب صناعي لان كل بين يومين اروح المستشفى يعني لو ماتشرب صناعي جان واا عليه شتسوي من العطش وبعدها صرت ابول بس خفيف وشلون عاد لازم اعصر روحي بقوه وبالموت يطلع مني شوي واتالم عدل من الجرح وانه اضغط على روحي اظل بالساعات في الحمام ورجعت مثل قبل ورحت مستشفى ثاني ومثل الحاله وبعدها حسيت روحي احسن شوي وكل مستشفى اروح له يسئلوني في وين ولدت مستغربين من حالتي .. المهم بعد فتره الا احس بظالم قوي ويا البول وصرت ابول بكره بس اطلع من الحمام امشي شوي للغرفه وارد ارجع وصرت حتى اتبول في ثيابي صرت ماقدر اتحكم في البول ينزل لا اراديا" ورحت المستشفى او رقدوني وحطو لي انبوب الى يوم ثاني واصيح من الالم .. جرح الولاده.. الم لما ينزل البول..والانبوب..صج صج عانيت وتعذبت او يوم ثاني شالو الانبوب ورحت البيت وكنت اشرب ماي بكثره وكل مستشفى اروحه مايعرفون شنو علتي بس يقولون اللتهاب المهم بعد فتره رجعت نفس الحاله ورحت المستشفى وفحصوني وقالو لي عظله المثانه تعبانه وايد من الولاده صارت ماتتحكم في البول يا انها ماتقدر تدفع او تنزل البول من غير احساس فيه .. وعطوني ادويه الحمدلله فادتني وايد ومضادات ووانه للحين مواعيد كل مره في المستشفى وللحين فيه آلام ويا البول بس الحمدلله على كل حال..

احين صار لي شهر وشوي من ولدت وخياط الولاده الي داخل للحين ماوجود واتالم عدل ماقدر اقعد منه..


بصراحه الولاده موت موت موت مادري شلون يقولون انها سهلات ومافيها شي صج صج تعب ..
بس الحمدلله رب العالمين على كل حال..مثل مايقولون الله اذا حب عبد ابتلاه..

طولت عليكم بالكلام وايد;) ترى انه اختصرت بعد ماقلت كل شي:p

نسيت اقولكم ولدت الساعه 8 الصبح يعني الطلق ظل عندي يوم كامل..وجبت بنوته اسمها ملاك..الله يحفظها انشاءالله..


والله يرزق كل محرومه..ويسهل على كل حامل ولادتها انشاءالله..