دبابيس الدجاج المقرمشة على طريقتى البسيطة

السلام عليكم ورحمة الله وبركاتة

كل سنة وانتو طيبين جميعا وعيد سعيد علينا كلنا يارب

النهارده جبتلكوا طرقتى البسيطه لعمايل دبابيش الدجاج المقرمشه زى كنتاكى كده

انا عشان بنتى بتحب كنتاكى قولت احاول انا كده اعمل محاوله اعملها انا فى البيت
بس الحمد لله طلعه محاولة نجاحة وطعمها لذيذ جدا فقلت اكتبها لبنات عروس لو حد عايز يجربها
المقادير


دبابيس دجاج الكمية الى انتى عايزها
ملح
بصل
فلفل اسود
فلفل احمر
جنزبيل
جوزة الطيب حسب الرغبة
معلقه خل
وربع كوب لبن
بياض بيضه للتحمير
بقسماط للتحمير
وزيت للقلى


الطريقة



نجيب الدبابيس ونغسلها كويس بالماء والملح وفلفل اسود

بعد كده نجيب الدبابيس ونشق كل دبوسة بالسكينه اربع شقات نفتهحا بالسكينه عشان نسمح للتتبيله تدخل جوهاتشقيها بالسكين لحد متوصلى للعضمة
وكمان عشان لما تتحمر تستوى كويس
ميبقاش فيها دم

نجيب البصل والملح والفلفل الاحمر والاسود وجوزه الطيب والجنزبيل ونخلطهم فى الكبة
ونظيف عليهم معلقه الخل وربع كوب اللبن

نجيب الدبابيس بعد منكون شقنها بالسكينة ونقلبها فى التتبيله الى عملنها ونسيبها فى التلاجه من بليل للصبح بقى
وكل ما تفضل فى تتبيلتها اكتر كل ما تستوى ويبقى طعمها احلى

وبعد ما تتبل كويس نجيب بيضه ناخد بس البياض منها ونحطه على الدبابيس ونقلب كويس وبعد كده نحط الدبابيس فى البقسماط
عشان تتجهز للقلى


وللقلى بقى نجيب كسروالة صغيره عميقه عشان نحط فيها زيت عشان بتحتاج الزيت يبقى مغطيها من فوقها لتحتها عشان تستوى كويس

بس كده يا بنات وبالف هنا وشفا
معلش انا قولتلكوا الطريقه بالتفصيل الملل بس هى سهله جدا وجميلة ويارب تعجبكوا ان شاء الله

والله ياريت كلنا نستعين بالله ونتجمع كده ونعمل حمله نتشارك فيها كلنا على اكل المطاعم والى عارفة اى طريقه لاكل مطاعم مشهور تكتبها وكلنا نستفيد ونفيد بعض

وكل سنه وانتو طيبين وعيد سعيد علينا جميعايارب

والسلام عليكم ورحمة الله وبركاتة