مشكلة طفلي .. أتمنى المساعدة !

السلام عليكم ورحمة الله وبركاته

كيف حالكم ..

انا صار لي أقل من اسبوع والدة
طبعا كنت والدة بطلق صناعي والسبب يرجع الى ان كان معاي الضغط بالاسبوع الـ 36 فكان خطر علي وعلى الجنين اني اكمل للموعد اللي عطوني اياه عشان اولد .. فقالوا ان لازم اولد بالاسبوع الـ 38 ..
المهم
رحت المستشفى وحطوا علي الطلق الصناعي وبعد 12 ساعة تقريبا ولدت ..
صادتني مشكلة في الولادة اني كنت تعبانة وايد
فكان الدفع عندي ياخذ وقت بين الفترة والثانية
فلما ولدت .. طفلي ما صاح وبعدين عرفت ان كان عنده نقص في الاكسجين

صار عندهم في الحضانة وهذا اول مولود لي وبصراحة خايفة
لأن امس رحت قالوا لي مافيه شئ صحته اوكي وعلى اساس ان اليوم ابدي رضاعة
بس اليوم رحت وقالوا ان بعد ما طلعت امس صاده نقص في الاكسجين مرة ثانية وصاده تشنج بس عقب عطوه دوا ورجع طبيعي ..
وباجر ببدي رضاعه ..

انا خايفة من اللي قاعد يصير
وكل ما اروح اشوفه ودي اصيح بس امسك نفسي لأني مو قادرة
والدكتور حده نفسيه وما يعطيني جواب يطمن
يعني اقول له بيصير زين ..؟
بدل لا يقول لي انشالله .. يقول والله هذا بعلم الغيب !!
يبط الجبببد
بعكس الدكتورة اللي كلمتني اول مرة كان حدها طيوووبة وحليوة وتطمني
حتى الممرضة اللي هناك تقول لا تخافين عليه دامه يصيح ويتحرك يعني مافيه شئ .. وقالت لي ان الالترا ساوند مافيها شئ يعني مثل المشاكل اللي يعانون منها في مثل الحالات في الدماغ .. قالت ليها الاشعة كلها سليمة ومافيه شئ ..
بس من عرفت ان صاده تشنج وانا مو عارفة اقعد في البيت ودي كل شوي اروح اشوفه

تعرفون قلب الام بعد ..

اذا في احد منكم صاده هالمشكلة .. خبروني وقولوا لي شسوي واذا حالة طفلي طبيعية والا لا ..

طبعا انا قرأت في الانترنت حالات وايد
ما اتوقع ان طفلي كان ناقصه الاكسجين وايد
لأن لونه طبيعي وحركته طبيعي .. يعني بالنسبة لايده وريله .. مرتخيين يعني مو مشدودين
لأن قرأت ان في بعضهم يصير لونهم ازرق .. بس انا كان لونه وردي على احمر يعني اللون الطبيعي ..

اللي عنده معلومات او يعرف احد صادته هالحالة يعلمني .. لأن وايد افكر وحدي قلقاانة عليه ..

وادعوا له يا رب يقومه بالسلامة هاليومين

ومشكورين :)