السلام عليكم ورحمة الله وبركاته ...
عندي مشكلة ومحتاره ومو عارفه شسوي وحاسه بشوي خوف !
عمــري 20 سنة ...
طبعــاً محد يتقدم لي واايد في السنة حسنـــة مثل ما يقولون !
بس تقدموا لـي مرتين !
اول مره ماعجبت الخوات ورفضوني !
وثاني مره ماعجبني الشخص ورفضته !
وتقدم لي من يومين رجـــال عمره 34 سنة
بقولكم مواصفات او الايجابيات الي فيه لانه صديق خالي ولاني قعدت معاه في المقابلة
وسألنا بعد ناس من انسابه ويعرفونه :
1- اجتماعي
2-بشوش
3-خلوق
4-دائما في المسجد مايترك ولا صلاة
5-جامعي ومثقف
6-حالته المادية جيدة
7-عنده مكان مستقل
السلبيات:
1-كثير الكلام الى درجة الثرثرة او بعض الاشخاص يضحكون عليه وعلى كلامه الكثير
2-كثير الضحك
3-جريء نوعاً ما !
طبعا انا جلست معاه
وهو قالي كل شي عن حياته ووضعه وانا ارتحت شووي
بس حسيته يطالع فيني واايد وقالي انتي جميلة ماشاء الله وانا استحيت وخفت في نفس الوقت !
وحتى لما وقف بيمشي طالعني وقالي والله حورية مالي خاطر اروح !!!
وراح للاهل ولامي ويقولهم بحطها في عيوني وفلوس كلها لها وكل شي تبيه انا حاضر
وهذا مو بس كلام كله راح نكتبه في العقد وانا تحت امركم وامرها !!
طبعاً احنا سألنا عنه
وقالوا لنا كل خير
وانه خوش رجال وولد ناس ونوافق واحنا مطمنين ..
بس انا احاتي شي
اخاف من العمر ونظرة الناس لي
وخصوصا ان وحده من خالاتي اليوم تطنز وتتكلم وتضحك وتقول شايب وويع ومن هالكلام !
طبعا هو الي مايعرف عمره يقول 28 او 27
مو مبين العمر عليه ماشاء الله وشكله مقبول !
محتاجة رأيكم ومساعدتكم لي !
خايفه ما اتفاهم وياه
او تصير مشاكل
:(