الممبار المصري بالصور
اولا بتشتري الممبار من عند الجزار وهو بينضفه انا بعيد عليه في البيت بس
بقلبه تاني واغسله كويس بملح وخل وارجع اعدله تاني واشطفه كويس من الخل والملح لغايه ما يكون لونه فاتح ونضيف
خلاص كده نضيف حطيته في مصفي عشان ينزل كل الميه اللي فيه وطبعا بنقطعه حسب الطول اللي عاوزينه لانه بيجي علي بعضه حبل طويل
بعد كده نيجي لخلطه المحشي
بتكون بصل وتوم وطماطم وصلصه طماطم وفلفل حامي والملح والفلفل وكل البهارات اللي نحبها وبحط كمان نعناع ناشف عليه وبنغسل الخضار ونقطعه ونضيفه للصلصه دي والخضره دي هي بقدونس وكسبره وشبت
بعد كده نغسل الرز ونصفيه ونضيفه للخلطه اللي فاتت
هنحشي الممبار بفتح ناحيه من الممبار باصبعين وهما السبابه والابهام ونفتحها ونحشي
هنا حشيته ولازم نخلي الممبار مش محشي اوووي عشان الرز حجمه هيزيد لما يستوي وكده ممكن الممبار يتفتح وكله يخرب
هنا خلصت كل الكميه
وفي حله كبيره فيها ميه وملح وفلفل وبصل وورق غار وهيل ونخليها تغلي الاول كويس
ولما تغلي علي طول نحط الممبار المحشي ومحدش يقلق انه مفتوح من الناحيتين لانه اول ما بينزل الميه المغليه بيقفل فورا لوحده حتي صورت لكم واحده اول ما نزلتها الميه وقفلت
بعد كده نسيبه يغلي شويه صغيرين ونوطي النار عليه جداا زي ما بنسوي الرز العادي عشان النار العاليه بتخلي الممبار يتفتح وحوالي تلت او نص ساعه ونطلعه من الميه في مصفي
بعد كده وقبل الاكل علي طول عشان يبقي سخن نقليه في زيت
ياسلام علي جماله انا بموووت فيه
وكنت عامله جنبه يومها لحمه مسلوقه وحمرتها ومحشي طماطم وفلفل
ودي سفرتنا كانت قبل الافطار مباشرة مع العلم كان لسه فاضل الشوربه بس انا صورت بسرعه قبل الفطار لان انا بغرف الشوربه اااخر حااجه عشان تفضل سخنه
ويارب فطارنا يعجبكم
وبالهنا والشفا