عندي استفسارات كثيييرة بخصوص ديكور والوان شقتي ممكن تساعدوني ... توجد صور بالداخل

بسم الله الرحمن الرحيم
السلام عليكم ورحمة الله وبركاته

انا ساكنة ببيت اهل زوجي صار لي فوق 5 سنين جناح
غرفتين وحمام وانتو بكرامة
عمي ابو زوجي عنده عمارة
وتوها تفضى شقة (تخيلو من اول ما تزوجت قبل 5 سنين الى الان توها تفضى شقة )
عالعموم الشقة حلوة وحجمها حلو لنا
طبعا المؤجر اللي قبلنا مو مسوي فيها شي عدل ولا معدل فيها
لأن كان يحط فلوسه على بيته الجديد اللي سكنه

والان الشقة يبي لها ترميم وتعديل وما بنسكنها الا على العيد ان شاء الله

ادري قرقرتي كثيرة بس احب اسرد كل التفاصيل ههههههه

عالعموم هذا مخطط سويته بنفسي حق الشقة

طبعا بتلاحظو ان الصالة صغييييرة جدا بس المجلس هو اكبر شي بالشقة

الخطوط الحمرا هذي الابواب والخطوط الخضرا هذي نوافذ

انا ابي اقتراحاتكم من ديكور والوان للشقة كامل واستحملوني شوية

قبل كل شي الرجال اللي كان ساكن الشقة مسوي سيراميك لونه برتقالي فاقع (واللي باط كبدي) ومبين ان السيراميك جديد ما صار له سنة
يبتدي من باب الشقة الى الصالة كلها ويمتد الى الممر اللي يودي للغرف ولمطبخ والحمام

وهذا اللي بيخليني احتار ايش اصبغ جدار الصالة والممرات
وايش الوان الكنبات اللي استخدمها بالصالة

طبعا بما ان الصالة صغيرة
قلت بحط فيها طاولة طعام لأربع اشخاص بالزاوية
والكنبات بحط 3
الكنب اللي يجي صغار ومودرن احلى وبكذا ما يسوي مكان وزحمة بالصالة مثل اللي بهالصورة اللي لونهم اسود جنب النافذة (بس طبعا ابي لون مناسب للسيراميك البرتقالي ما ابي نفس اللون اسود)
في البعض اقترح علي احط كنب زاوية بس ما ينفع لأن طاولة الطعام مهمة عندي والمطبخ صغير مرررة وبيكون نصه دواليب ولفرن والغسالة والثلاجة فمافي مجال الا الصالة
والصالة بتكون مكان جلسة لنا يعني جلسة تلفزيون بس
لكن استقبال الضيوف بالمجلس

بس لون الكنبات مادري اي لون اشتري واي لون اصبغ الصالة والستارة اي لون ما ادري
وحتى شكل الستارة محتارة فيه شوفي هالشكلين وابي تصويتكم
وطبعا التصويت مع اللون اي لون اسويها

طبعا في ناس اقترحو علي التالي
بما انه السيرميك غامق احط سجادة لون بيج على ذهبي فاتح شوية
والكنبات لون بني
والستارة لون بيج والجدران اوف وايت وجدار واحد اللي يكون ورا التلفزيون اورانج

--------------------------------------------------------------------------------------

الحين نجي للمجلس
قلت بصبغ الجدران رصاصي غامق شوي نفس اللي بالصورة
والكنبات نفس اللي عندي بالاول بس بغير لونهم لنفس لون الكنب اللي بالصورة
ومخدات اورانج والديكورات تكون اورانج مع اوف وايت

طبعا البعض بيقول لي
ان الكنب بسرعة يتوسخ
بس المجلس بيكون مسكر طول الوقت وبفتحه للضيوف وحتى احافظ على لون الكنب ابي اغطيها الكنبات بشراشف نوع ثقيل للمحافظة عليهاا

والستارة محتارة بين هالثنتين

هو المجلس بالعادة ما ينحط فيه تلفزيون
بس انا بحط لأن اهلي ساكنين بالاحساء واحيانا خواتي يجون فبيصير انيمهم عندي بالشقة علشان كذا قلت بنيمهم بالمجلس اريح لهم ولزوجي
حتى عماتي وعيال عمي لما درو بسكن لوحدي قالولي لو جينا للدمام نجي ننام عندك
بيتي بيصير لهم فندق هههههههههههه
وهذي الحركة قلت بسويها بالمجلس

اي صحيح والارضية بسويها خشب
شنو انواع الخشب اللي تكون حلوة وما تخرب وبنفس الوقت رخيصة
ووين ارخص الخشب ولا السيراميك؟
وبما اني بسوي الارض خشب واجهة التلفزيون الرفوف بتكون خشب نفس اللون

--------------------------------------------------------------------------------

الحين نجي لغرفة النوم الرئيسية

طبعا الاثاث نفس اللي عندي حاليا اثاث غرفة نومي مودرن
ولون الاثاث بني محروق
والكمدينو والتسريحة عليها سيراميك درجات البني

الصبغ قلت بيكون بنفسجي نفس هالدرجة

3 جدران نفس اللون اللي فوق الا جدرا واحد بيكون نفس هذا



اللي هي الجدار اللي فيها المربعات الملونة موف وبنفسجي
حتى الثريا قلت بسويها وهذي شفت زيها في ايكيا وكانت عاجبتني حيييل ولما شفتها هنا عجبتني اكثر واكثر

طبعا ابي رايكم هل اصبغ الاربع جدران بنفس اللون بنفسجي
ولا اصبغ 3 جدران بنفسجي وجدار واحد ملون

الستارة لونها اوف وايت بس محتارة بالموديل

شوفو حركة الرفوف هذي لقيتها في احد المنتديات لأحد العضوات ومرررة عجبتني للميك اب والعطور قلت لو في مجال بسويها

---------------------------------------------------------------------------

نجي الان لغرفة نوم الاطفال
طبعا عندي بنت وحدة وانا الان حامل وعلى شهر ذو الحجة بولد ان شاء الله
والى مادري بنت ولا ولد (ان شاء الله ولد يا رب)
سواء جاني ولد او بنت بسوي لهم نفس الالوان ونفس الحركة

طبعا نفسه بالضبط ابي افصل بس قلت بزود بعدد الدواليب 3 او اربع بيبان وبعدين حركة الرفوف
لأن بنتي لوحدها ملابسها كثيرة ما شاء الله

طبعا غرفة الاطفال هذي بنسويها لهم بعدين
بعد ما اولد بالسلامة
لأن بنتي الى الان تستخدم السرير اللي من انولدت للان تنام فيه
لكن لو ولدت بنسوي لها هالغرفة وسريرها القديم يصير لاخوها او اختها

-----------------------------------------------------------------------------------------

الحين نجي للمطبخ
المطبخ عمي هو اللي بيسويه لنا والحمامات بعد
فقلت لو سألوني ايش تبين الوان بقول لهم
ولو سووه من على كيفهم ما بقول لا
احمد ربي بيسوونه على حسابهم حتى يخففون عن زوجي مصاريف
ما بصير طرارة واتشرط بعد هههههه

بس لو سألوني مادري اي لون اختار للجدران والدواليب وكذا
ابي اقتراحات للالوان

طبعا ابي اسوي موديل مودرن حددده زي الايطالي

----------------------------------------------------------------------------

الحمامات محتارة باللون كثييييير

مفكرة حمام المجلس اسويه بنفس الوان المجلس حتى يكون في تناسق

وبالنسبة للحمام الثاني نفس الشي نفس لون الصالة

----------------------------------------------------------------------

بالنهاية حابة اشكر لكم تعاونكم مقدما واتمنى الرد حتى لو اقتراح بشي واحد