اللهم لك الحمد من قبل ومن بعد .. قصة ولادتي بالغالي كرومي .. بالتفصيل الممل

أ

أم كرومي

مشرفة سابقة

16-07-2011 | 04:51 PM

السلام عليكم ورحمة الله وبركاته

اللهم لك الحمد كما ينبغي لجلال وجهك وعظيم سلطانك

واخيرا اجى هاليوم اللي تحقق الحلم واجى ابني للدنيا بالسلامة ..

خواتي بعد ماكتبلكم قصة حملي اذا تتذكرونها ..
قصة حملي

مشت شهور حملي ووصلت للشهر السابع

وفتحت ملف ولادة هني بالسويد والقابله اكتشفت اني اخذ حبوب وصفها الي الدكتور بتركيا

اسمهم جلوكوفاج هم لمرضى السكري بس انا لان فيني تكيس قال اخذيهم بالحمل يثبتونه

كنت اخذهم وماادري لين مالقابله لمن اكتشفت اتصلت علي ومن يومها بدت المعااااناة النفسية

اتصلت وقالتلي بالحرف يومها انتي شلون تاخذينهم هالحبوب تسوي تشوهات للجنين او اسم الله عليه يتوفى لمن ينولد

تخيوا حامل وتسمع هالكلام هذا ااااخ يومها حسيت روحي طلعت من مكانها ومن يومها وانا بهم مايعلمه غير رب العالمين

طبعا وقفت الحبوب بس كلام القابله مو قادره انساه نهائيا مع اني مسويه سونار والحمدلله وضع الجنين كان بخير بس كلامها كبيييير

والله ياخواتي عيوني حسيتها راح تبيض من البجي علما خلصت شهور حملي الباقيه مااتهنيت حتى بتجهيزاته اشتري وقلبي يعورني

ولمن دخلت شهري التاسع نفسيتي صارت سيئه اكثرررر كانت كل ماتقرب موعد الولاده احس نهايتي قربت ...

حتى اثرت الحالة النفسيه على صحتي بالحمل صار فيني ارتفاع بالسكري والضغط وحساسية حمل وزلال ..

وليوم الولادة انا اطلق وابكي من كل قلبي اقول ياربي لا تفجع قلبي فيه ولا تحرمني منه ولا تضيع تعبي فيه ياللهي

المهم نجي لقصة ولادتي .. خلصت التاسع وماكانت عندي اي بوادر ولادة ولا طلق ولا اي شي .. واجى موعد ولادتي وراح وانا ماولدت

عاد بديت اكثر مشي وصديقاتي نصحوني بتمرين القرفصاء فعلا سويت هالشغلتين وبتاريخ 8 يوليو بديت احس بالم خفيف بظهري يجي ويروح بس مو منتظم ومو قوي

المهم طنشت ثاني يوم وهو يوم 9 يوليو دحلت تكرمون للتواليت الصبح ولا اشوف شي مثل الجيلاتين بالضبط شكله شفاف وجامد نزل علي عرفت يومها انها هذي هي سدادة الرحم

طبعا من شفتها قعدت ابجي ههههه واتصلت بامي قلتلها مااريد اولد خلاص بطلت حبيبي خايفة عليه قوليله لا يجي الحين وابكييي وامي تضحك علي قالتلي راح اجي عندج اليوم

سكرت منها وقلت لزوجي امشي نطلع شوي نتمشى وكنت احس قبها بالم دورة بظهري بس اقووى ويجي كل ربع ساعه .. المهم طلعنا للسنتر نتمشى وكل شوي احس بطلق صار اقوى

يجي يمسكني شوي ويروح بس كان يعووور .. كنت امشي ولمن احس فيه اوقف علما يروح ارجع امشي .. مشيت تقريبا ربع ساعه بس وقلت لزوجي خلااااص مو قادره اكثر

طلعنا واحنا بالسياره قلت لزوجي اتصل بالمستشفى وقوللهم .. اتصل فيهم قالوله اذا مو نازل عليها ماي او دم لا تجون الا لمن يصير الطلق كل 3 دقايق او ان ينزل عليها شي

عاد قلت الله يستر مااولد بالبيت شنو كل 3 دقايق .. بس قلت خلاص اتوكل على الله وقعدت احسب للطلق مسكني يومها للعصر وهو كل ربع ساعه .. امي وصلت عندي العصر

ورحنا استقبلناها ..طبعا انصدددمت من شكلي لان ورم فيني مو طبيعي المهم انشغلت معاها والتهيت معاها سوالف لان كان صارلي شهور مو شايفتها وكان الطلق مستمر والمدة صارت تتقارب والالم يقوى .. اجى الليل والطلق ادعي الله ان يحميه ويجي كل 3 دقايق لان هلكت ومحتاجة خلاص اروح للمستشفى

يومها اول يوم بحياتي اسويها وماانام ابدا من الالممم طبعا طول الليل حاطه دفتر وقلم واسجل المدة بين الطلقات وادعي الله يسهل علي .. وساعه ابكي وساعه ادعي ليلتها ماادري شلون مرت ...

عاد على الساعه 5 الفجر قعدت زوجي قلتله خلااااااص مو قادره اتحمل الالم صار كل 5 دقايق مااقدر اصبر اكثر .. المهم اتصل فيهم قالوا لا تجي بس اذا هي حابة تطمن على الجنين

تعالوا نجيك نبضة خاصتا هو حركته كانت بالفتره الاخيره قليييييلة ومشاكلي الصحية صاروا خايفين عليه .. المهم قلتله يالله دخلت سبحت ولبست على السريع

وقلت لامي انتي لا تجين معانا تتبهذلين نروح بس اطمن عليه ونرجع ان شاء الله .. وصلنا المستشفى الساعه 6 الصبح دخلتني الممرضة غرفة الفحص وركبتلي جهاز النبض وقياس الضغط

كان الطلق مبين عندها بالجهاز المهم بعد ماخصلت وتطمنت عليه قالت راح افحصك فحص داخلي نشوف كم متوسعه .. انا على هالالم والطلق المستمر بهالساعات بس قلت مستحيل مفتوحة اكثر من 2 سانتي وبصراحة من كثر مااقرا ان الفحص يالم كنت خايفه منه

ولا اجت فحصت وماحسيت بالم ولا قالت انتي شلون تحملتي هالطلق والالم انتي مفتوحة 5 سانتي يالله لغرفة الولادة ... طبعا كنت بصدمة مو متوقعه .. اجت جابتلي ملابس المستشفى وقالت يالله معاي ..

وانا وزوجي مو مستوعبين المهم دخلت للغرفه عاد قعدت ابجي مره ثانيه قلت ياربي بهالمكان هذا راح اولد يارب حققلي حلمي ولا تحرمني من وليدي يارب العالمين

المهم قالتلي القابله الافضل تتمشين بالممر احسن من القعدة بالغرفة لان هذا اول ولادة الج وراح تطولين .. والله سمعت الكلام وصرت اروح وارجع بالممر والطلق مستمر بس كل كم دقيقه مو متواصل وحار..

بعد تقريبا 4 ساعات خلاااص هني حسيت المسالة صارت جد لان الالم صار لا يحتمل اجتني وقتها الممرضة قالت شنو مفكرة تاخذين مسكن للولادة قلتلها الكمام لان ابرة الظهر خايفة منها قالت اوكي بس انا انصحج بابرة الظهر لان ولادتج ممكن تتاخر وماي الجنين للحين مانزل عليج لمن ينزل ماراح تتحملين الالم راح يصير متواصل واقوى ..

طبعا كنت مترردة انا,, وامي وزوجي خلوني اتردد زياده قالوا ان شاء الله تتسهل بدونها اخذي بس كمام .. وياريتني ماسمعت كلامهم لان الكمام ماسوى اييي شي بس خلاني ادوخ وخلاني انعس خاصتا انا كنت مو نايمة ولا ساعه بالليلة اللي قبلها فصرت اطلق وفيني النومة ومافيني طاقة لا اكل ولا نوم ..

اجوا فحصوني قالت وصلتي 7 سانتي قلت الحمدلله مابقى شي على الولادة خليني اتحمل وقعدت وراها الطلق كل ماله يزيييييييد وحااااار ومع الفحص طلع الرحم مو فاتح اكثر من 7 سانتي

قالتلي القابله راح اطق ماي الراس علشان الطلق يحمى لان اذا تظلين جذي راح تطولين اكثر وتتعبين قلتلها انا الحين مو متحمله الالم خلاااص مو قادره اكثر قالت انصحج بابرة الظهر قلتلها اذا يصير الحين اخذها انقذيني فيها خلاااص مو قادره قالت بس دكتور التخدير يطول علما يجي قالت لان بس دكتور تخدير واحد بكل المستشفى !!

المهم راحت وقالت بس يجي احنا راح نجي معاه ونعطيج الابرة وقعدت انتظر ساعه وساعتين علما اجى طلع روحي والله المهم حظر الابرة الحين ابي بس الطلق يخف شوي علشان مااتحرك لان اي حركة مو زينة ومو لصالحي .. ويحاولون فيني بالكمام يخدروني علشان اقدر مافي فايده اخر شي اجت القابله حضنتني وقالت ضغطي على ايدي شكثر ماتقدرين بس لا تتحركين بصراحة القابله جد كانت حنونة الحمدلله

انا ماقصرت ههههههه كل مااجتني الطلقه صرت مااضغط على ايدها لا اقرص بخاصرتها ههههههههههههههههه وهيه مسكينة تضحك وماادري شنو قالت للممرضة هههه بس والله ماكنت حاسة بنفسي ..

اخذت الابره وبصراحة جد تندمت صح سكنت الالم بس ماراح بس صرت اقدر اتحمله .. تقريبا هم اخذت كم ساعه اجوا فحصوني قالوا وصلتي 9 سانتي وتركوني قلتلهم يعني اولد قالوا بعدج مطوله !!

قلت بقلبي خلاص مدام قاعده اتحمل الالم اصبر مابقى شي .. ولا يبدي معاي الم ثاني واحس اسفة على الشرح الم بمؤخرتي موووووووتني انا لان اصلا مسويه عملية بواسير فالالم يضرب بمكان العملية

الم الطلق ارحم منه واحس عندي رغبة ادفع وبدا صراخي ناديناهم اجتني ممرضة الله لا يوريكم نفسيتها قالت مااقدر اسويلج شي لا تصرخين وتحملي قلتلها احس شي راح يطلع مني فحصوني الله يخليكم

قالت لا انتي مطولة ونفسيتها خاااايسه زوجي والله ماقصر قاللها هذا مو اسلوب تتعاملين فيه زوجتي هذي اول ولادة الها وكل شي جديد عليها قاللها رجاءا خلي وحده ثانية تجي مكانك .. برد قلبي فيها ..

واستمر الالم والرغبة بالدفع و القابله ما اجت ولا احد وانا صراخي متواصل وبس ادعي ماخليت احد موصيني بالدعاء مادعيتله صرت اقول لامي دخيلج ساعديني روحي راح تطلع وهم يقولون عادي شنو العادي ياربي ..

قمت عاد خلاص كل مايجيني الالم اعصر واضغط لان احس يخفف علي واعصر وادفع اخر شي تذكروني واجت القابله على اساس تفحصني ولا تنصدم تقولي انتي شاطره شوفوا هذا راس البيبي وشعره قالت انا مااجيتج لان توقعت ولادتج بعد كم ساعه ماتوقعت راح تدفعين والراس راح يطلع مابقى شي يالله دفعي بعد دفعت ولا طلع كرووووومي نور عيووووني صرت احرك برجليني وابجي وليدي حبيبي يمه لا تبجي ياقلبي وادور عليه ابيهم يحطونه قدام عيوني امي تقول زين مادستي عليه برجلج وفعصتيه هههههه شالوا وحطوه على صدري وهو يبكي وانا ابكي واقول لامي يمه هذا ولدي هذا ولدي

امي تقولي اللي يشوفج يقول راح اخطفه منج ههههه .. سبحان الله مشاعري كانت ماادري شلون اوصفها بجي وفرحة واحساس غريب ماخليته ياخذونه مني قلتلهم لحظه قعدت اقوله ياماما واخيرا سمعت صوتك ياعمري تعرف شكثر انتظرتك يارب لك الحمد كما ينبغي لجلال وجهك وعظيم سلطانك يارب لا تحرم هالفرحة لاحد يارب ارزق كل محرومة ومنتظره ياااااااااااارب ياكريم ... بعدين قالتلي دفعي نطلع المشيمة طلعتها توريها النا انا اعرف شكل المشيمة لان شايفتها من قبل حسيت شكل المشيمة ناقص حتى امي حست بهالشي ان المشيمة مو كاملة بس سكتنا .. راح اقوللكم سالفة المشيمة بعد شوي ..

خلوه لكرومي حبيبي على صدري بدون ملابس ولا حتى حفاظة قالوا خليه يحس بحنانك قعد كم ساعه واخذوه وزنوه ولا انا بهالاثناء احس شي يصب مني ولا دممم يكمية غرقت الفراش اجوني قالوا ها هذا عادي توج والده وقعدوا يضغطون على بطني والدم يصب صب من تحت ... حطولي قطن وراحوا قالوا نرجع بعد شوي نصعدج القسم الثاني فوق .. قلتلهم اوكي

واجوا ياخذوني اجت الممرضة تساعدني اقوم ولا بنات مثل احد ذابح شي تحتي دممم يصب كانه حنفية ماي مفتوحة غرقت الغرفه ... وهم اجوا ضغطوا ضغط على بطني وقالوا عادي !!

المهم حطوني على الكرسي المتحرك انا وحبيبي وامي اجت معانا وصعدنا فوق لغرفتي وتوني ابي اقوم من الكرسي للسرير ونفس الحالة نزييييييييف وحسيت راح يغمى علي ودووووخة

اجوا حطولي تحاميل وهم ضغطوا على بطني والله موتوني .. قالوا راح ننزلج مره ثانيه لقسم الولادة قلتلهم ليش شنو فيني انا قالوا ماندري ... كرومي خليته عند امي ورحت على اساس بس فحص ويرجعوني

ولا يدخلوني غرفه ويتجمعون على راسي 4 ممرضات ودكتورتين ويسولي سونار والمفاجئة ان القابله تاركه ربع المشيمة برحمي وهو اللي قاعد يسوي النزيف .... قالوا جسمج خسر اكثر من لترين دم الحين نفوتج للعمليات .. والممرضات كل وحده تسحب ايد يركبولي ابر ومغذي قلتلهم شنو عمليات وليش لا مااروح وابني قالوا هو عند امج وراح نودي ممرضة تظل معاهم ... قلتلهم بس روحوا نادوا امي خليها تجي قبل ماادخل

حابوها الي قلتلها يمه وليدي امانة برقبتج اذا صار فيني شي لا تتركينه قالت اسم الله عليج لا تخافين ان شاء الله تقومين بالسلامة قرت علي اية الكرسي وراحت

ودخلوني للعميات ودموعي تصب مافي قدامي غير ولدي وتذكرت اني ماخذه ابرة الظهر هم عبارة عن مخدر وراح يخدروني تخدير كامل وانا نازفة وفيني فقر دم قلت الله يستر مايصير فيني شي ..

وحدة من الممرضات تقولي ليش تبجين لا تخافين العملية ماتطول بس ننظفج ونخيطج وتطلعين 4 ساعات وتكونين بغرفتج قلتلها مو خايفة من العملية بس ابني ...

خدروني وماحسيت بنفسي غير ناقليني لغرفه ويقعدوني قالوا خلصتي العملية شنو تحسين قلتلهم مااحس بس الم ببلعومي واحس بكحه وجسمي ثلج .. قالت عادي احنا دخلنا انبوب تنفس ومنه تحسين بالم بالبلعوم بس احنا خلصنا العملية ونظفنا رحمج سوولي كشط للرحم وخيطوني .. قالت بس ننطر عليج بعد ساعه ونوديج لغرفتج ..

الساعه حسيتها سنة علما رجعت للغرفة .. امي جابتلي كرومي بس ماقدرت طبعا اشيله لان جسمي كان بعد احسه متخدر وابرتين كانوا بايدييني وحدة مغذي ووحدة مضاد حيوي ..

والحمدلله نمت كم ساعه وقعدت شوي احسن واحمد ربي واشكره اجت فيني ولا فيه هوه وعلى هذي ولا اكثر الحمدلله يارب والشكر لك ...

قعدنا 3 ايام بالمستشفى وطلعنا بالسلامة ..

الحين اجي لاسم اكرم انا كنت ناوية اسميه يوسف او ليث ,, اسم اكرم ماكان على بالي اصلااااا بس ام زوجي وانا حامل حلمت حلم وكان البيبي طالب نسمية اكرم ..

فتوكلت على الله وسميناه اكرم لان ربي اكرمني فيه ويارب يكرمه بالصحة والعافية وطول العمر واشوفة يكبر قدامي واشوفه عريس وماانحرم منه يارب ياكريم ..

واشكر كل خواتي بتجمع المغتربات خاصتا ام عبوووودي بعد عمري ماتركتني لا بحملي ولا حتى بالمستشفى والله اخت واكثر .. وام ياسر حبيبتي ماقصرت معاي بعد لا بحملي ولا بولادتي وفرحتها الي

وكل البنات وريم وريحانة القدس وكل البنات اللي كاتوا يسالون عني بشكل دائم عبر الرسائل الخاصه ..

وكل اللي دعولي عسى الله يحقق لكل وحده اللي تتمناه ياربي ويرزق كل وحدة منتظره حملها واولهم اختي نور الامل وسكر ناعم وملاذ الطير وكل المتاخرات يارب ياكريم ..

دعواتكم الله يحفظلي ابني من كل سوء ويجعله من الذرية الصالحة ومن حفظة وحملة القران يارب العالمين .. ومايحرمني منه يارب العالمين ..

والله يهديه ويرضع مني ..:L:

&

㋡ام عبودي وعموري㋡

عروس ماسية

16-07-2011 | 05:12 PM

ياااااابعد عمري يا ام كروووووومي والله وانا اقره التفاصيل عيوني دمعت وتذكرت يوم ولادتي

الف الحمد الله على سلامتج وسلامه كرووووووومي والحمد الله اجه هل يوم وشفت كرومي وقريت قصه ولادتج الف الحمد الله يارب

والله يخلى الج وتشوفينه عريس يارب
وانتي اعتبرج وحدده من خواتي الله عوضني فيج بالغربه والله فعلا اخت اخت الله لا يغير عليناا ويخلينااا طول العمر مع بعض يارب والله يرزق ويفرح قلب كل محرومه يارب
ويحفظلج اكرم ويحرسه من كل شر يارب

Z

Z A H R A

عروس رائعة

16-07-2011 | 05:21 PM

الحمدلله على السلامة و اهم شي صحة أكرم وسلامته وماتشوفي شر :)

ر

رونق الحياة 2008

عروس فضية

16-07-2011 | 05:43 PM

الف الحمد لله على السلامة
جربتي كل شي ههههههه بعد هاي الولادة
بس كلة يهووووووووووون لشوفة كرومة الله يخلية لكم

ل

لوليكي

عروس ركن الأزياء

16-07-2011 | 05:58 PM

:'(:'(:'(
ذكرتيني بولادتي وأنا لحالي بالغربة:'(
ألف الحمد لله على سلامتكم ياااااااارب
والله يخليلك كروومي حبيبي ويحفظه من كل شر يهديه ويرضع منك
يتربى بعزكم ان شاء الله
بوسيلي الحلو الصغير:adore:

m

maysoona

عروس مشاركة

16-07-2011 | 06:24 PM

حبيبتي الف الحمد لله على سلامتك وان شاء الله يتربى بعزكم يا رب
الله يخليلك اكرم ويحميه يا رب وتفرحي فيه يا رب

الحمد لله انك هلا احسن واكرم بحضنك الله يحليكم لبعض يا رب ويربى بعزكم انتي وزوجك حبيبتي

ا

احن ام

عروس برونزية

16-07-2011 | 07:11 PM

الف الحمد لله على سلامتك و يتربى الحلو في عزكم و دلالكم
لكن اختي انتي لازم ترفعي دعوى على الممرضة

A

Arch L0L

عروس نشيطة

16-07-2011 | 07:27 PM

الحمدلله على سلامتك ومبروك البيبي يارب بكتيني كمان بقصة ولادتك الله يخليك ابنك وزوجك يارب ويرزق كل محرومه ان شا الله

ا

ام نيلا

مشرفة سابقة

16-07-2011 | 08:00 PM

ماشاء الله

مبروك يا ام اكرم وتستاهلين السلامة

ويتربى في عزكم

ا

ام فاطمه الحلوه

عروس برونزية

16-07-2011 | 08:10 PM

مبرووووووك وتستاهلين السلامه والله يخليه لج ان شاء الله وتشوفينه عريس ياارب ..

(

((حلاوتي بشقاوتي))

عروس ماسية

16-07-2011 | 08:16 PM

ياعمري وانا اقراء كلامك وربي دمعت عيوني

عسى ربي يسعدك

ويحفظ لك كرومي وابوه

وكل غالي على قلبك

والحمدلله على سلامتك حبيبتي

x

xxRosexx

عروس جديدة

16-07-2011 | 08:37 PM

والله قصتك تخوف وتعور القلب

الحمد لله على سلااامتك وان شاء الله تفرحين باكرم وتشوفينه عريس

o

om lucas

عروس برونزية

16-07-2011 | 09:10 PM

الف الف الف مبرووووووووك والحمدلله على سلامتكم والله يخلي الج ويوم اللي تفرحين بي وتشوفين جهال جهالة

ش

شجن الشجون

عروس ماسية

16-07-2011 | 09:19 PM

مبروك
والحمد لله على سلامه
والله دمعت عيوني من قرأت قصتك
حسيت بخوف مو طبيعي يارب سهلها عليا
الله يحفظلك كروم وتشوفيه احلى معرس

ا

ام هدواي القلب

مشرفة سابقة

16-07-2011 | 09:33 PM

الحمد للهـ علي سلامتكـ خيتو وربي يباركـ لكـ فيهـ...

R

ROSE3ROOS

مشرفة سابقة

16-07-2011 | 11:06 PM

بعد عمري الحمدالله على سلامتك ياقلبي واهم شي انه اكرم وانتي بصحه وسلامه ربي يحميه الكم يارب من كل عين ومن كل شر يالله

مادري شقولك غير اني ابجي وانا اقرى القصه ربي يجعل كل ايامك فرح وسعاده يارب

ر

ريحانة القدس

مشرفة سابقة

16-07-2011 | 11:37 PM

ما شاء الله ..لا قوة الا بالله ..
ألف مبروك نوارة الحمدلله على سلامتك وسلامة أكرم ..الله يحميه ويحفظه ويفرحك فيه ..ويرزقك توأم كمان مرة ..قولي امين ..

ح

حبيبة زين

عروس ماسية

17-07-2011 | 01:53 AM

الف الف حمدلله على السلامه
وربي يحفظلك كرومي ويجعله من عيال الحفظ والسلامه
والله انا اقراء كلامك وجسمي ينتفض
عيني علييييك حبيبتي والله تعبت من جد
الف حمد وشكر على سلامتك
خلي بالك من نفسك ومن ولدك
ربي يحفظكم

ر

رور

عروس رائعة

17-07-2011 | 02:17 AM

الحمد لله على سلامتك و باذن الله ماجورة على عذابك قبل الحمل و بالحمل و بالولادة وربى يرزقك بر اكرم و يكون عوضك باذن الله عن عذابك الى شفتية

ا

ام لنوني

عروس رائعة

17-07-2011 | 02:29 AM

الحمدالله ع السلامه