ابي القاسي الحآجر ضد سعـآدتي ..

السلام عليكم خوآتي
شخـبـآركم ,,؟


السـآلفة الي صـآرت لي تعبت نفسيتي وآيد .. و محتـآجة اني اسمع نصيحتكم و آخذ مشورتكم .. لأني واثقة اني مابطلع خائبة ..!

انا فتآة .. اعيش بين اسرة .. الأم فيها حنونه و طيبة و مثالية و شايله همنآ كلنا .. و ابو ما يدري عنـآ لا انا ولا اخواني ولا امي .. احسه مو قادر يتحمل مسؤوليتنا .. مخلي العبء الأكبر كله على أمي ..
فيه وايد اشياء مو زينه .. اول شي ما احسه حنون ويانه كلش .. عمرنا ما طلبنا منه شي ونفذه .. واذا ينفذه مو من قلبه و يقعد يعايرنا .. ما يحب يجوفنا نروح مكان ولا احد ايينا البيت .. عايش في البيت ويانه و كأنه غريب .. طول الوقت بعيد عنا .. يصير خـآطرنا نجوفه قاعد معانه و يسولف و يمزح مثل باقي الناس .. احسه قاسي و ساعات احسه ما يحبنا ..
ما يكلم امي مثل ما كل الازواج يكلمون زوجاتهم ,, ولا يعاملنا مثل ما كل الأبوة يعاملون بناتهم ..
حتى اتخيلو ! دخلت الجامعة و هو يسألني بتروحين اي صف ؟ ننجح و نتفوق و اهو ابدا ما يشاركنا لا في فرحتنا ولا في ضيقتنا ,, ما احسه مهتم فيني ولا في اي في حياتي ..

كنت احلم اني اتزوج بـ انسان ما يحمل ولا صفة من صفاة ابوي .. وكنت دائما اقول هالكلام لأمي ..
كنت احلم اتزوج بأنسان يعطيني من الحنان الي ما عطآني اياه ابوي ..

وفي يوم من الأيام ..
دخلت مرة بيتنا .. و قالت لأمي انها ياية تخطبني الى ولدها .. و ان ولدها كان يجوفني اذا ارد من المدرسة و اذا اروح المدرسة .. و اتعلق فيني .. و كآن يجوف فيني انسانه مؤدبة و محترمة ,,
قالت امي بتشاور ابوي وبترد عليها ..
طلع هاذا الولد يشتغل مع ابوي في نفس المكان .. ابوي بدون سبب رفض ! و رفض بقوة ! وكآن مصر على رايه
لما امي اتصلت في ام الصبي وقالت لهم انه ابوها رفض .. الصبي جن جنونه .. واتصل في امي قال لها يا آخذ بنتج او ما اعيش .. و بين لها شكثر اهو متعلق فيني و يبيني .. و حسس امي انه يبيني من كل قلبه .. و انه يحبني و مشتريني ..
امي دخل في بالها الولد .. و قالت ما بتضيع علي فرصة الانسان الي بيسعدني .. و مافي ام توقف في طريق سعادة بنتها ..,, قررت امي تسأل عن الولد .. و كفلت خيلاني يسألون عنه وكل هاذا كان من ورى ابوي ,, سألو عنه الولد و الحمدلله ماقالو الا كل خير .. انسان محترم وخلوق و مرتبي في احسن بيئه و احسن تربية واهله خوش ناس ..
امي زاد تمسكها في الولد .. وخصوصا انه كان يتصل فيها من فترة لفترة يسأل عن اخباري .. وكان أول بأول يتصل في امي يسألها عن امتحاناتي .. الشي الي ابوي ماكان يسويه .. ولما تخرجت اهو اول واحد قدم لي هدية التخرج .. حسيت بحنانه و طيبته و انا للحين ما ارتبط فيه ولا كلمته .. حسيته مهتم فيني .. و بشهادة امي !

وفي هالفترة اتقدمو لي ثلاثه .. و امي ترفضهم لانها ماتبي تكسر قلبه ..
امي واثقة اني بعيش معاه بسعادة
وابوي رافض ! بس مو راضي يقول سبب الرفض .. ما يبيني آخذ واحد يشتغل معاه في نفس المكـآن ..
وانا بصرآحة مابي هالفرصة تضيع من ايدي .. و اتمنى من الله يكتبه من نصيبي ..
امي كلمت ابوي كذا مرة بس للأسف ما يعرف يتفاهم و يقعد يصارخ و يفشلها ..

تعبت من العيشة مع قسوة ابوي .. ما ابي اتزوج هروب .. بس ابي اعيش بسعادة .. ابي انسان يحبني و يحترمني وكل هالمواصفات في هالشاب .. ومافي شي يعيبه ..
وآخر جملة قالها ابوي .. اذا وافقتون عليه ما بتجوفوني معاكم في البيت !!

شورو علي يا خواتي .. اعطوني حل .. هد حيلي التفكير ..