قصة عذابي " قصة ولادتي"

السلام عليكم ورحمة الله وبركاته
مثل ماوعدت بنات تجمعنا بقصة ولادتي "العذاب":badly:
اليوم بكتبها لكم
وادعو بالسهالة لباقي الصامدات في تجمعنا
بسم الله نبدا
كان موعد ولادتي على حسب السونار 7-6 وعدى هالتاريخ بدون اي بوادر ولادة
مجرد ريح الاستقبال اللي يروح ويجي:struggle:
وكان موعدي على حساب الدورة 14-6 يوم الثلاثاء بس قبل هالتاريخ يوم السبت
كان التاريخ 11-6 كنت تعبانة ورحت قبلها بيومين المستشفى وقالت لي ان الرحم مفتوح 1سم بس الراس بعيد مانزل الحوض لازم اكثر مشي
رحت بيوم السبت البحر مع اخوي ومشيت على رمل البحر ورجعت البيت وحسيت الالم زاد
بس حاولت انام ومانمت الا الفجر من الارهاق وجلست 8 الصبح وحسيت الطلق صار منتظم كل 7دقايق بس كان بارد وبطيء وماكان فيه احد جنبي بيت اهلي وجوالي فاضي الا اخوي دخل اخذت جواله ودقيت على زوجي يجيني من الدوام قلت خليني اروح المستشفى القريب اكشف كم سم وارجع
قالت لي انه 3سم ووقعت على مسئوليتي وطلعت على اساس بروح مستشفى الحرس وبيوصل 5سم ويقبلوني .
طلعت وكان الطلق يزيد وانا اقرا الزلزلة واون واذا راحت الطلقة اسولف مع زوجي رحت الحرس وقالت اني لسه 2سم ولازم اروح مستشفى الولادة انا حسيت انها تصرفني لاني طلعت من الحرس ورحت النساء الولادة وكان 6سم
وكان زحمة كثير وانا اول مرة اروح هالمستشفى كل ولادتي بالحرس الوطني
عند الكشف تقريبا 15 حرمة وداخل على سرير الانتظار تقريبا كل غرفة 7 حريم وكل وحدة تصارخ من جهة والله خفت حيل انا متعودة الحرس لحالي بغرفة ظليت اطلق بهدوء وادعي من الساعة 1 الظهر الساعة 4 جات الدكتورة وقالت تبغين تسرعين الولادة افتح لك الموية قلت افتحيها بس ارتاح وفتحتها وزاد الطلق بشكل مو طبيعي قمت اصارخ وكل ماجات تكشف قالت لي شدي عشان الراس ينزل بالحوض لانه بعيد وكانت تذبحني الف مرة اول مرة اجرب كشف كذا مع شد ودفع مت مليون مرة كل شوي تقول زاد نص سم بس وانا ميتة من الطلق
بالاخر حسيت اني خلاص بدفع واقولها وانا اصارخ خلاص بيطلع الراس وهي تقول انتي لسه 7ونص سم وانا اقول لا خلاص وبالموت جات ولما شافت قالت خلاص خلاص ولادة وتسكر رجولي وتدفعني على نفس السرير لغرفة الولادة بالممرات وهي تصدم فيني بالجدران ولما وصلتني غرفة الولادة تقول لي نقلي على سرير الولادة لحالك يعني ماعندهم رحمة حالة ولادة وبدفع خلاص وتبغاني انقل نفسي لحالي والله نقلت وصرت ادفع لحالي
وتبدا تصارخ لا لا وتدخل يدها وتسحب الراس بيدها احس اني خلاص عظمي انكسر للحين ما اقدر امشي كانها مسوية لي جراحة
وتطلع البنت وتروح تنظفها وتتركني لحالي بدون ماتطلع المشيمة ورجوليله مرفوعة على جوانب السرير والهواء يضرب فيني حتى المشيمة حسيت انها بتطلع لحالي دفعتها لحالي بالارض وجلست تصارخ عليا نست اني اتالم وبعدها جات تنظفني مت مليون مرة تدخل يدها وتطلعها وتضغط على بطني كانها تنظف مكان وتمسح فيه وانا اتالم وجابت البنت اشوفها تقولي بنت وودني غرفة الملاحظة وعلى طول جابوها لي وانا ميتة تعب مو قادرة اتحرك
للحين اصلا ما اقدر ارفع رجلي ولا امشي عدل بسبب اسلوبهم الخشن
اول مرة اجرب مستشفى كذا من الزحمة يعذبون مرضاهم صرت كاني والدة لاول مرة
....................................

توتة توتة خلصت حتوتة العذاب الله لايبلي احد بمثلها ربي ييسر عليكم ويسهل:)