بماذا تنصحوني( مسافرة بالطائرة مع بنتي الصغيرة 8 شهور )

شكرا فوفا ،،،، منتظرة خبرات العرايس

اولا ان شاء الله توصلون بالسلامة,,,
بالنسبة للعرباية خليها معاج لاخر لحظة ياخذوها منج على باب الطيارة,, وخبريهم عنو عندج ترانزيت مابيشحنوها يخلوها معاهم وينزلولك اياها على الترانزيت عادي,, عشان فعلا صعب تظلي شايلة الصغيرة الله يحميها,,و وبالنسبة للسوائل خلي معاج ترمس صغير,,, بشنطة البيبي,, والباقي لو نقص عليج اطلبي منهم بالطيارة المضيفات يجبولك ماي دافي اكيد متوفر عندهم حق الشاي والقهوة,, وان شاء الله بالسلامة

اسعدك الله في الدنيا و الاخرة يابنة الرافدين و جعله في ميزان حسناتك.
بالنسبة للترمس الصغير هل أضع فيها الماء؟
ما أعرفه حتى الان انهم لن يسمحوا لي بالمطار بادخال اي سوائل معي بالطائرة؟

الله سلمك حبيبتي,, والله بالنسبة للترمس انا مرة كنت مسافرة وكان معا عصاشر وحليب صغير لابني بالشنطة,, مااعرف مكن الخطوط حقكم غير انا كنت مسافرة من ابوظبي للاردن... وماقالوا لي شي

احسن شي ياانك تتصلي المكتب حق السفر وتتاكيدين عن تعليمات الامان للسفر بالطائرة او توكلي على الله وخذي معاج الترمس ماي صغير ولو طلع ممنوع فضي الماي باقرب حمام .. خخخخ وبس


واي خدمة انا جاهزة ربنا معاكم

والله مشكلة بس احسن شي اختي تتصلين بالمكتب وتستفسرين

فوتونات;15214946:
السلام عليكم
كيف حالكم يا عرايس ؟
حابة تفيدوني بتجاربكم
مسافرة بعد اسبوعين بالطيارة لمدة ثمانية ساعات هذا غير الترانزيت اول مانوصل لمدة ثلاث ساعات
بنتي الصغيرة عمرها ثمانية اشهر وللأسف ترضع صناعي
سمعت انهم يمنعوا اني أشيل موية عشان الحليب بالطيارة
طيب اجهز الرضعات بالبيت ولا السوائل أصلا ممنوعة؟؟؟
و بالنسبة لعربيتها يسمحولي ادخله الطيارة ؟
ولا لازم اشحنه، ظهري يوجعني وماقدر اشيل بنتي بالمطار
نصايحكم يا عرايس.

======

سؤال آخر : خايفة على بنوتتي تسمر من الشمس
ينفع استخدم كريم واقي للشمس وهي بعمر 8 أشهر ؟
و إذا نعم ما نوع الكريم المفضل وفين ألاقيه ،،، شكرا حبايبي .

و عليكم السلام و رحمة الله و بركاته...

بحاول أفيدج قد ما أقدر من تجربتي في السفر مع أطفالي... أول مرة سافرت رحلة طويلة ولدي كان عمره 10 شهور، فبحثت كثير في النت و استفدت الحمد لله و ما تعبت أبداً معاه...

البداية من حجز الطيارة... انتي فكرتي وين بيصير البيبي طول ال 8 ساعات؟ الرحلة طويلة و مستحيل بيكون في حضنج طول الوقت لأنه جداً متعب لج... فالطيارات الكبيرة يكون متوفر فيها سرير صغير للبيبي يسمونه Airplane baby bassinet أو Bassinet bed... لكن هذا السرير ما تقدرين تستخدمينه إلا إذا كنتوا جالسين في نص الطيارة و مقابل الحاجز الفاصل بين درجات الطيارة... الكراسي اللي مقابل هذا الحاجز يسمونها Bulkhead seats، و في نفس هذا الحاجز يثبتون السرير... مثل هذي الصورة...





و هذا شكل السرير...







فانتي كلمي الخطوط و أكدي عليهم إن تكون مقاعدكم مقابل هذا الحاجز عشان تستفيدين منه و تثبتين عليه السرير و ترتاحين... طبعاً أول ما تركبين الطيارة و تجلسين في الكرسي أكدي على المضيفات إنج تبين هذا السرير، و هم بعد الإقلاع راح يثبتونه لج... يمكن راح يسألونج عن وزن البيبي، لأنه له وزن معين و كل شركة طيران لها وزن معين!

بالنسبة للسوائل في الطيارة، سفراتي كانت لأوروبا و كنت آخذ معاي ترمس صغير فيه ماي مغلي و علبة ماي صحة... و الحمد لله ما قالوا شي! انتي ممكن تسألين الخطوط لما تكلمينهم عن قوانينهم، و إذا متخوفة اكتفي بماي الصحة، أو ممكن في الطيارة تطلبين من المضيفات يجيبون لج ماي دافي لرضعة البيبي..

و العربية مثل ما قالت وحدة من الأخوات تخلينها معاج طول الوقت في المطار و انتي عند باب الطيارة ياخذونها منج و تستلمينها مع العفش لما توصلين إن شاء الله...

بالنسبة لواقي الشمس، ممكن تروحين للدكتور و تقولين له يكتب لج نوع يناسب الأطفال، أو تروحين للصيدلية و تسألين الصيدلي... و على فكرة واقي الشمس ما يمنع إن البشرة تسمرّ، هو بس يقي البشرة من الأشعة الفوق بنفسجية :)

خذي معاج لعبة جديدة أو كتاب للبيبي، لأن الأطفال عادةً يمللون من الجلسة لفترات طويلة، فعشان تلهينها و تلفتين إنتباهها بشي جديد عطيها اللعبة الجديدة... أنا آخذ معاي لعبتين جدد، وحدة في الروحة و الثانية في الرجعة!
و خذي بسكوت شاي أو بسكوت أصابع الخاص بالأطفال، يعني شي يقرمش فيه البيبي :)


و في كم غرض ضروري تاخذينهم معاج بشكل عام مو ضروري في الطيارة...

مفرش تغيرين للبيبي عليه، و يكون هذا المفرش يكون مبطن ببلاستيك... تصيرين نفرشينه على طاولة التغيير أو في أي مكان تكونين مضطرة إنج تغيرين له...

علبة فازلين صغيرة و مرهم لإلتهاب منطقة الحفاظ...

خافض حرارة شراب و تحاميل، دوا للإسهال، هذا قولي للدكتور يكتبه و يكون على شكل بودرة في ظروف و انتي تذوبينها بالماي، للضرورة لا سمح الله إذا صاب البيبي إسهال!

أنا أكثر شي كان شاغلني، شلون أعقم الرضعات، خصوصاً أننا بنسكن فندق! فلما بحثت لقيت في معقم خاص للرضعات، شي يكون أقراص، تحطين داخل كل رضاعة قرص و يتعقم، و في شي سائل مثل الصابون بس أخف... اسألي في الصيدلية عن المتوفر... أنا ما لقيت إلا المعقم السائل من شيكو، فربطته بكيس و لزقته عدل عشان ما ينكب على الملابس لما أحطه في الشنطة...

موفقة إن شاء الله و رحلة ممتعة F:

تسلمون حبايبي ماقصرتو كفيتو ووفيتو
والنعم والله بعرايسنا والله يخليلكم عيالكم ويرزقكم برهم و يوفقهم.

انا سافرت مع ولدي كان عمره 6 اشهر ويرضع صناعي واخذت معاه في الطائره ماي وحليب عادي

مرحبا , بالنسبة للترانزيت , يبي لج تاخذين عربانة مريحه سهل الفتح والإغلاق , وعادي

تاخذينه معاج للطائره بس في الطائره ياخذونها منج مع الطلعه من الطائره يرجعهونها لج

لأن فعلا حتى لو ما كنتي تعبانه ضروري وجود عربة طفل عشان تقدرين تأكلينها , بالنسبة

للماي تقدرين تطلبينه من الموظيفات عادي , متى ما جيه موعد بنتج للرضاعه اطلبي ماء

ساخن , بيوفرونه لج , او حتى ممكن تصنعين لها سيرلاك , سواء في الطيارة او ترانزيت في

المطار .

انشودة القمر + اشواك الورد
شكرا لكما
سألت عن عربة الطفل بالنسبة للخطوط الماليزية ، واخبروني انهم يأخذونها من باب الطائرة ويردوها لي عند الوصول
و كل طائرة لها سياستها فالخطوط السعودية تأخذ العربة و تعيدها مع العبش بالمطار وليس عند باب الطائرة.

حفايض بامبرز بماليزيا سيئة جدا ،،، هذا ما أخبروني به من سافر الى ماليزيا و معه أطفال
وبالتالي سأضطر الى شراء حفائض من السعودية :(