اهلي و الشقة

سلام بنات
انا في كل مرة اعرض اي موضوع في هالقسم بصراحة ما تقصرون معاي
و انشالله ما تقصرون معاي في سالفتي الحين

بنات هي مو مشكله بس موضوع حابة استشيركم فيه

اهلي قاعدين يدورون لي شقة قريبة من بيتهم و ما قرروا يدورون الا احين و انا على وشك ولادة يعني باقي لي اسبوع عن موعدي ..((انا صحيح افكر بالانتقال بس مو حاليا على الاقل بعد سنة او كم شهر)).. حتى الحين مالي مزاج لا اشوف شقق و لا انتقل و بعدين انا ما طلبت منهم يدورون و هم مصرين يدورون و هالسالفة مسببة لي مشكله مع زوجي و اذا قلت لهم لا تدورون بيزعلون!! كفاية كل ما يودوني شقة و ما تعجبني او ما تعجب زوجي يزعلون!! يا ربي مو عارفة شسوي و حدي متضايقة و احس روحي بنفجر

و انا احس زوجي من حقه يتضايق لانه لو اهله كانوا جذي مصرين يدورون لنا شقة و احنا مو طالبين منهم اكيد انا بزعل و بتضايق من التصرف

هي بالضبط السالفة بدأت جذي.. ياتني الوالدة قبل شهر يعني و انا في الثامن و قالت لي سمعي يا بنتي ابوج شايف لج شقة ما تتفوت و انتوا بس روحوا و شوفها اذا ما عجبتكم عادي و هي وايد قريبة لبيتنا ..
عاد انا استانست بس قلت لها افضل اتكلموا مع زوجي عشان ما تصيدني مشكله معاه(( لانه انا من قبل مكلمة زوجي عن شقة قريبة لبيتنا و رفض و انا هم رفضت اخذ شقة قريبة لبيتهم فخذينا شقة بالنص لا قريب بيتهم و لا قريب بيتنا))

فقالت ما عليج سوي روحج ما تدرين بالسالفة و ابوج بكلمه.. و كلمه ابوي و قال زوجي اوكي بنروح نشوفها ما بنخسر شي و رحنا و شفناها و دخلت خاطرنا و قلنا اوكي نبيها و عقب اتصل فينا راعي الشقة و قال ما صار نصيب:!!:

المهم و سكتنا عن السالفة و بعدين قمت اشوف امي و ابوي يدورون بروحهم شقق و يخبروني و يبوني اخبر زوجي و انا قمت اتضايق .. انا ما ابي افتح لي مواضيع و يا زوجي انا عارفة انها بتسبب مشاكل و فوق هالشي عشان خاطرهم اكلمه و اقوله حصلوا بيتنا هالشقة الفلانية و نروح نطالع و لما ما تعجب زوجي او ما تعجبني بيتنا يزعلووووون حيل:'(

و غير انه قرب موعد ولادتي و خبرتهم.. قلت لهم انا مو مستعدة حاليا لا نفسيا و لا ماديا خلوها لبعد النفاس.. و قالوا ما عليج احنا بنتصرف بنقل الاغراض انتي ما عليج الا تدخلينها و تشوفينها عاد انا صكيت بوزي:-# و انا صايرة خلاص نفسيتي زيرو من تفكير الولادة و خصوصاا اني بجر و هم ما زالوا يدورون مع انه عارفين وجهة نظري و كله يفهموني انه هم بيتصرفون!!

و زوجي يقول شفيهم بيتكم يبونج تمشين كلمتج علي غصب.. انا مو رافض حاليا انه نسكن قريب لبيتكم بس عقب ما تخلصين نفاس انشالله .. فليش هم يبون يتصرفون بروحهم كأنه انا مو موجود و لا لي كلمة!!

بنات شوروا علي شلون اتصرف.. ما ابي ازعلهم و لا ابي ازعل زوجي و لا انا ابي اتضايق:!!:

و سامحوني طولت عليكم