قصة ولادتي لبنوتي العسل سالي

السلام عليكم بنات ان شاء الله تكونون بخير ويتمم حملكم بسلامه وولادات سهله باذن الله
ندخل في القصه
لما وصلت لنهايات الشهر التاسع بديت اقلق لان مافي اي بوادر للولاده وبالبيت يكولولي امشي وصعدي ونزلي عالدرج حتى تتسهل الولاده ويحصل توسع ولكن كلما اروح للدكتوره تكولي مافي توسع بس راس الطفله نازل في حوض الولاده المهم بقيت امشي في البيت واصعد الدرج لحد اخر يوم قبل لا يخلص الشهر التاسع في يوم 17 مايو اتصلت بيه خالتي وكالتلي اكعدي بمي حار حتى يصير عندج توسع وبالفعل دخلت بالمي الحار تقريبا ساعه ونص وطلعت كانت الساعه ب12 بالليل ولما طلعت حسيت بمي ينزل مني وكل شويه يزيد خبرت امي لاني حاليا عندهم علشان الولاده لاني ساكنه باربيل واهلي ببغداد فاجيت عدهم حتى تكون مواليد البنت بغداد مثلنه اني وابوهه المهم اتصلت بدكتورتي وكالتلي هذا مي الراس نزل اذا كميته كبيره روحي للمستشفى وبالفعل بسرعة الصاروخ ماما وبابا الله يحفظهم اخذوني للمستشفى وهناك الدكتوره المقيمه كالتلي حالا تدخلين صالة العمليات لان مي الراس نزل وماعندج توسع بس اصبع واحد اني متت من الخوف لاني مقرره اولد طبيعي ولكن لان المستشفى خاص يريدون يربحون اكثر فدائما يكولون للحامل انك محتاجه عمليه المهم اتصلت بدكتورتي وهي تشتغل بنفس المستشفى ولكنها رفضت اني ادخل للعمليه وكالتلي اطلعي ورجعي للبيت ولما تزيد الالام تعالي واني اولدج طبيعي ومافي داعي للقيصريه ابدا بس حكت مع بابا كالتله اريدك تقيس نبض الجنين كل شويه لان بابا دكتور ايضا لكن ما وافق كالي مااكدر اتحمل اشوفهه كاعده تتالم كدامي واني اقيس نبض الجنين راح اوديهه لغير مستشفى واخليهه تحت المراقبه وطبعا رحنه لمستشفى العلويه وهي مستشفى حكومي لان المستشفيات الخاصه ميقبلون يصبرون على المريض يريدون يدخلوني عمليه المهم رحنه المستشفى وكانت قمه بالجمال والنظافه والمعامله الحلوه وكالتلي الدكتوره لتخافي حتى لو نزل مي الراس الج فرصه 24 ساعه انك تولدين طبيعي كلتلها بس لحد الان مافي توسع كالت اوكي راح نخليلج مغذي ونعملج ولاده صناعيه يعني يسوولي طلق صناعه علشان يصير توسع وبالفعل خلولي المغذي ونمت بالفراش وكلتلي كل ساعه تجين افحصج حتى اشوف التوسع وكانت الساعه الثانيه ليلا وامي بقت بايته عندي وبدت الام الطلق تبدي عندي كل شويع بس كنت لما تجيني الالام ا نفخ يعني اعمل زفير بصوره سريعه وقويه وكانت الالام تخف بشكل كبييييييير ولكن مع الوقت بدت تزيد وميفيد معاهه التنفس لحد الساعه الخمسه الفجر رحت للكتوره بالغرفه الثانيه حتى تفحص التوسع وكنت امشي بصعوبه لان الالم زاد عليه كثير وكانت امي تمشيني وتخليني ارتاح كل كم خطوه ورحت للكتوره وبدت تجيني اوجاع تخليني اصرخ بدون وعي وجع غريب كانه يدفع لتحت يجي ويروح بسرعه وبصوره متتاليه ولما الدكتوره فحصتني كلتلي امشي نروح واني كل ضني انها تقصد نروح للغرفه نكمل المغذي لان مافي توسع طلعت هي تقصد امشي لغرفة الولاده وحسيت وقتهه بشعور غريب مزيج من الفرح والاستغراب والدهشه والحماااااااس وبدت تولدني وتكولي ادفعي حتى يطلع النونو واني ادفع بس مو الدفع الي هي تريده لان هي تريد دفع قوي واني بكريه ومااعرف طبيعة الولاده شلون تصير المهم هي لما شافتني دفعي قليل سوتلي شق تحت بدون بنج وبصراحه وجعتني كثييييييير وصرخت صرخه هزت المستشفى هههههههههههه ودفعت بقوه وطلعت الطفله وكان شعور رااااااائع لما خرجت مني وبعدهه ارتاحيييت كثييييييييير وبقيت نايمه انتظر الدكتوره تجي تخيط الشق واجتي الدكتوره خيطتني واذتني الخياط كثيييير لان بدون بنج وبعدهه رجعت لغرفتي وكانت امي تنتظرني هي والطفله سالي وكنا جدااااااا فرحانين وطول الليل كانت الدنيا تمطر واستمرت للصبح واجه بابا اخذنه للبيت والمطر ينزل وكان يوم حلووووووووووو كثير واتصلت بزوجي وبشرته وكان متفاجئ جداااا وفرحااااااان وميعرف شيكول وراح للمدير يطلب اجازه حتى يجي يشوفني اني وسالي وفعلا اجه سياقه بالسياره من اربيل لبغداد يسوق ست ساعات حياتي حتى يشوفنه والحمد لله حاليا سالي ماليه حياتنه وبابا وماما طايرين بيهه كانما اول مره يشوفون طفل هههههههه وحاليا صحتي زينه الحمد لله بس شويه وجود الام تحت بسبب الجرح والخياط بس كلشي يهون لما اشوف القمر الي جالسه بحظني ويارب يسهل على كل حامل وسهل ولادتهم ويكومون بالسلامه ياااااااااارب