مشكلتي مع خطيبة أبوي

السلام عليكم ورحمة الله وبركاته


كيفكم بنات؟؟


بنات عندي مشكله وبليز أبيكم تساعدني .. حاسه نفسي ضايعه .. ما أعرف لمن أشكي .. ما عندي خوات أنا وحيدة أبوي ..


انا يتيمه أمي متوفيه وكنت بالصف الاول .. ابوي بعد امي ما تزوج عشان يربيني وما يدخل شخص ثاني بينا ويضيع علينا علاقتنا .. أبوي مثل صديقي واخوي وكل شيء مش بس أبوي .. مثل ما هو يبحث عن مصلحتي وراحتي أنا أبحث عن راحته ومصلحته .. وما اتخيل ابدا أن في أحد ثاني يدخل بينا ..


كانت جدتي تعيش معنا وحياتنا ماشيه عادي يعني ما كنا حاسين ان البيت ما فيه روح منظمه للبيت .. لكن من ثلاث سنوات تقريبا جدتي توفت(الله ييرحمها) .. وبدت حياتنا شوي تتلخبط وخاصه ان العائل كلها كانت تعاملين على اني صغير .. هم كانوا راحميني ويريدوا يعوضوني عن الحنان اللي فقدته ... وانا ما أعرف كيف اتعامل مع الشغالات وهالشغلات .. المهم ثلاث سنوات الحمد لله عرفت أدير البيت صح .. وقدرت لو راحت الشغاله اني أمشي امور البيت على أتم وجه الحمدلله .. طبعا بمساعدتي ابوي الله يخليه ..


المهم بنات .. عماتي كانن كثير يحنوا على أبوي انه يتزوج .. بس انا كنت ارفض وكنت ازعل اذا تكلموا .. أحس بقهر ان في وحده ثانيه بتدخل حياتنا وممكن تاخذ ابوي مني .. وغير كذا بنات .. صح انا ما أذكر أمي كثير بس ما ادري من أنا وصغيره ما أحب أحد يحل محل امي .. حتى كلمة ماما ما كنت أرضى اقولها لاي احد لان احسها حق امي وبس .. ومره جاتني عمتي وابوي كان بالعمل .. قالتلي لا تكوني أنانيه وكذا .. كلمتني اني أنا كبرت واكيد بتزوج وبعدها ابوي بيظل لحاله وانا بروح عند زوجي .. عماتي يحبوني كثيييير كثيير وابدا ما مقصرين معاي .. ما ادري حسيت بخنقه .. وحيت أن صح أنا كنت انانيه اني منعت ابوي من انه يكمل حياته وخاصه ان امي توفت وهو كان بعده بعز شبابه .. وضغط على قلبي وخبرت أبوي انه يتزوج .. بس ابوي رفض قال بعد امك مالي زوجه .. بس انا أصرت وكان زواجه راح يكون من صالحي أنا .. واني محتاجه لاحد يظل معاي دوم بالبيت مش يجي فتره ويروح عشان احس بالاسقرار .. بعد طلاع الروح أبوي وافق .. صح انا كنت اقنعه بس والله بنات قلبي يبكي دم .. حاسه الوحده بشعور لما زوجها يتزوج عليها أنا كنت كذا .. لان أبوي الانسان الوحيد اللي بحياتي ..


عمتي كانت مخليه فــ بالها بنت هي كبيره بس ما تزوجت .. هي تقريبا أصغر من ابوي بخمس سنين .. يعني كانت عانس .. بس انا قررت أني احبها والله يا بنات خليت فــ بالي ان انا وهي بنكون صديقات ... بنروح ونجي مع بعض .. وكنت اتخيل كيف اننا نكون على ابوي ونخبي علىيه اشياء ونضحك وكذا .. وصار عندي امل بعدها ان حياتنا بتكون حلوه .. وتحمس كثييير بعدها للموضوع ... وخاصه اني بعد ما رحت مع عمي نشوفها حسيتها كثير حبوبه .. لكن يا بنات الحرمه طلعت عكس ما توقعت أبدا ..


هي الحين مخطوبه لابوي يعني لا صارت ملكه ولا شيء .. وابوي صار كثير يوديني معهم بيتهم ... وحسيته هو بعد تحمس للموضوع .. بنات اذا رحت بيتهم تتفردبي اهي وخواتها .. يتمسخرن علي ويضحكن .. وغير كذا يتغامز .. لا تقولي انتي متحسسه لان ابوك بيتزوج انا كنت متحمسه للموضوع .. مره قالتلي (انتي لما يكون يوم الام تاخذي منوم عشان ما تحسي بهذك اليوم؟!) والله يا بنات جرحتني .. حبست دمعتي بالغصب .. وغير كذا اخواتها كانوا يضحكوا ولا وحده قالتها ما زين ولا شيء كذا .. ومره قالتلي ( انتي كيف قدرتي تعيشي بدون أم؟) في وحده تسال بنت انحرمت من أمها هالسؤال؟؟!!!!! ... ومره كان تسالني انتي مخطوبه ولا شيء قلتلها لا وانا على نياتي .. قالت متى بتتزوجي .. قلتلها ما ادري لما يجي فارس الأحلام .. قالت لها اختها .. يعني لو ما جاء وعنستي وين بتجلسي في بيت اختي؟؟؟ يعني شو هالسؤال .. وين بجلس ؟؟ وغير كذا عاد صار البيت بيت أختها .. المهم انا استغبيت وخليت نفسي ما فاهمه شو تقصد .. قلتلها لا ما بجلس بيت أختك بجلس بيت أبوي طبعا .. ولا لي طلعه منها ابدا .. واصلا حتى لو تزوج كل يوم انط مع باباتي حبيبي مستحيل اتركه بروحه .. والله بنات شكلها تغير كثير قالت انا بروح تو بجي(هذي خطيبة أبوي) .. ومره امها تقولي عاد هي مثل أمك لا تعذبيها بدلعك وتفتني بينها وبين ابوك وتضيعني حياتها .. قلتلها خالتي أنا لو ما اريد ابوي يتروج كان اصلا ما خطبتله ولا وافقت .. قالت انتي صغيره اكيد ما بياخذ رايك .. هذيلا الناس مستلميني من الحين .. والله حاسه بخوف .. ابي اخبر ابوي لكن حسيته متحمس للموضوع وما ابي اضيع عليه فرحته ... لكن فــ نفس الوقت يا بنات والله كثير يجرحوني .. ومخليني اضحوكه معهم ...




بليز بنات نصحوني اخبر ابوي ولا لا؟؟؟؟

انا كثير خايفه ان من تجي يبدأ عذابي ؟؟؟