انتي معي والا مع الوقت ضدي

انتي معي والا مع الوقت ضدّي
.................يا جارحه قلبي جروحٍ جديده
اتعبنـي المشوار قيدك بيـدّي
............وش لون افكّه وانتي عني بعيده
تمضي سنين العمر ترفض تهدّي
..................وانا كما التايه بصحرا عتيده
مدري عـلامك مستمره بصدّي
.................ان كان لي ذنبٍ ذنوبك عديده
لـو ما احبّـك ليه بيّحت سدّي
..........واكشف لك الخافي واكرر واعيده
ياعـايشه بالـوهم ما كان ودّي
................اجرح شعورك او نزيفك ازيده
اغراك من اهداك فستان وردي
................والبسمة الصفرا وحلو النشيده
وخلاّك فوق الشمس نور ٍ وبعدي
..............وصدقتي الكذبه ولو هي بليده
ياحـالمه ..والوقت جزرٍ ومدّي
....................النـوم طول والحلم ما يفيده
مدري متى تصحي وتدرين ودّي
.................توحي ضميرٍ فيه مثل الوقيده
حبّـك سكن قلبي ولا هو بيدّي
...............مقدرعلى هجرك لو انك شديده
نبضي .. عروق القلب تنزف بجدّي
................الى متى تنزف وانتي شهيده
لاتتركيني للزمن صعب وحدي
................يا ما دهاني بالغـدر والمكيده
من شان حبك ساكنه وسط نجدي
................اموت وأحيا في عيون العنيده
ردي عليّ الصـوت بالله ردي
............وان ما تردي الروح بعدك شهيده