الفلم الهندي لـسنة 2011.. قصة ولادتي

السلام عليكم ورحمة الله
شلونكم خواتي ان شاء الله الكل بخير ورحمة من رب العالمين
طبعا اني بعد يومين رح يصير عمر بنتي شهر الحمد لله ربي يحفظها بس ما فضيت الا هسا وكتبتلكم قصة ولادتي الطويله بكل افراحها واحزانها .... اني كنت كثير اقره قصص الي ولدوا وكثير استفدت من قصصكم خواتي الغاليات ولهل السبب قررت انزل قصة ولادتي ان شاء الله يارب ما تملون وانتوا تقرون وان شاء الله البنات البكريات الي مثلي يستفادون كم شغلة

موعد ولادتي بحساب السونار كان يوم 28-03 وبحساب الدكتوره كان 1-04 طبعا اني مشيت على كلام الدكتوره واصلا ما كنت حابه اولد بشهر مارس وانضميت لخواتي بتجمع شهر ابريل

وفعلا اجه يوم 28 مارس وما كان في اي بوادر ولاده و يوم الاربعاء المصادف 30-03 كنت اصلي صلاة الظهر وفجأه حسيت شي نزل علي ركضت على الحمام وكان ماي بس ما كان كثير خبرت زوجي واتصلت لاختي الكبيره قالت ابقي بالبيت وما تطلعي يمكن يكون ماي الجنين وفعلا بقيت بالبيت بس ما كان في لا الم ولا شي,, ثاني يوم الخميس كنت اكلم اختي قالت اتصلي لقسم الولاده اسئليهم عن الماي الي نزل البارحه بس لحتى تطمني,, بلاول قلت ماكو داعي بعدين العصر قلت اتصل ما خسرانه شي وفعلا اتصلت وقالوا تعالي عالساعه 9 ونص بالليل لحتى نتاكد,, اتصلت لزوجي واجه ياخذني وامي واختي الصغيره يدعولي واني اضحك اقلهم مافي الم ولا حاسه بشي يعني اطمنوا راجعتلكم.. وصلنا المستشفى وطبعا بالطريق زوجي سوه بروفه على اساس اني بولد ويحسب الطريق شكثر ياخذ وقت وسوينه اكشن وضحكنا وانبسطنا تقول رايحين رحله هههه وصرت اقول لزوجي مو طويله المسافه لو كنت اطلق رح اقدر اتحملها>>> مسكينه عايشه بلاحلام الورديه

المهم وصلنا المستشفى ورحنا قسم الاستقبال رحبت فيني الممرضه وقالت شوي وتجيكي القابله وفعلا بعد شوي اجت القابله وكانت صغيره عمرها بداية الثلاثينات وطيوبه كثير,,, دخلتني غرفة الفحص وقالت لازم فحص نسائي اني هنا اجاني كف على وجهي واتجمعت الدموع بعيني لاني كثير اكره الفحص النسائي وزوجي يعرفني اكره هل شي قالها لازم هل فحص ماكو طريقه ثانيه قالت لاا هذا اضمن شي لحتى نتاكد اذا الي نزل ماي الجنين سلمت امري لرب العالمين وفحصتني,, توجعت من الفحص بس كنت متحمله وحابسه دموعي,, بس خلصت قالت ما اضن الي نزل ماي الجنين بس انتي مفتوحه واحد سانتي,, طبعا اني طرت من الفرح قلت يارحمة الله ,, المهم قالت تقدري ترجعي للبيت واتمنى ولادتك تكون يوم الاحد لان انا شفتي يكون بهل يوم قلتلها واني اتمنى هل شي لان عنجد حبيتها على كثر ما طيوبه,,
المهم رجعنا للبيت وبس وصلت دخلت الحمام وانتو بكرامه ولا الاقي نازل علي دم,, تجمدت بمكاني وخفت ورجعت اتصلت بقسم الولاده قالوا شي عادي ينزل دم بعد الفحص وخصوصا انو هذي ايام ولادتك بس راقبي الدم اذا كثر او ما وقف لبكره رجعي اتصلي,, بقيت طول اليوم مانمت ودخلت خبرت خواتي من تجمع شهر ابريل وكل شوي اروح الحمام اشيك والحمد لله الدم ما كثر بس بقه مستمر ليوم الجمعه الصبح بعدين اتحممت وصليت وكلشي كان اوكي,, يوم الجمعه بالليل اجت اختي الكبيره تنام عند اهلي وسهرنه اني وخواتي سهره حلوه ويومها كنت مشتهيه بطيخ وجابلي زوجي بطيخه صغيره جلست واني سهرانه معا خواتي اكلت تقريبا نص البطيخه وجبت جيبس وشوكولا وحضرت فلم وخواتي يضحكون يقولولي ابد شكلج مو شكل وحده على وجه ولاده.. بعدين ناموا خواتي واني مو جايني نوم جلست اقره بتجمعنا تجمع شهر ابريل شي ساعه وبعدين قلت انام شوي.. صحيت لصلاة الفجر صليت ودعيت يومها من قلبي انو ربي يسهل امري وامر كل حامل ورجعت انام بس ما عرفت كل شوي اروح للحمام وانتوا بكرامه,, عالساعه 7 ونص الصبح غطيت بالنوم وفجأة فتحت عيوني مثل الرجل الالي شفت الساعه كانت الساعه 9 الصبح.. قمت من السرير بس ما اعرف ليش قمت ههههه ما كان في الم ولا حاسه نزل علي شي بس من حالي قمت وقفت وبس وقفت حسيت شلال يصب تحتي واني طرت عالحمام والحمد لله الحمام ابيت اهلي قريب على غرفة نومي يعني خطوتين,, بقيت واقفه واني مصدومه بعدين ناديت اختي الكبيره اجت تركض قلتلها شوفي صارت تقول يا الله اللهم سهل هذا ماي الجنين جابتلي الموبايل واتصلت على قسم الولاده قالوا تعالي عالساعه 11 ونص,, غسلت وغيرت ملابسي واتصلت لزوجي واجه المسكين طاير وعيونه حمر ههههه طبعا بهل لحظه احنه الثنين احساسنه ملخبط,, فرحانين انو بنتنا رح تجي بعد تعب 9 شهور وخايفين لان اول طفل النا ومتحمسين بنفس الوقت..
طبعا البيت كله صحه معاي الي يسويلي ريوق والي يدعيلي,, انا رحت اتوضيت وقريت دعاء تسهيل الولاده وصرت امشي بالبيت واكل تمر بعدين فطرت بسكوت وشاي لان ما ردت اكثر بلاكل ودخلت خبرت خواتي بالتجمع وطلبت منهم يدعولي وعلساعه 11 اخذ زوجي شنطتي وشنطه البيبي وتوكلنا على الله واجت معاي اختي الكبيره,, ما استغنه عنها اختي حبيبتي
وصلنا المستشفى وركبولي جهاز الطلق ونبض الجنين وقالت القابله ابقى من نص ساعه لساعه وبعدين ترجعلي وجلسنا اني واختي وزوجي نصور ونضحك وكان عندي طلوق يوصل للميه ساعه احس فيه وساعه ولا كانو في شي وبعد ساعه رجعت القابله وشافت التخطيط وقالت في طلق قوي شوي ومنتظم تقريبا رح افحصك واشوف اذا الرحم مفتوح وكان تقريبا مفتوح 3 سانتي قالت رح افتح كيس الماي لحتى يزيد الطلق قلتلها ليش والي نزل علي شنو قالت ماي الجنين بس الكيس مفتوح من فوق وفي ماي باقي تحت وهذا رح ياخر الولاده قلت اوكي وجابت شي بلاستك طويل وفتحت الكيس بالمره ما حسيت ولا توجعت بس صار فيضان عارم,, صرت اقول لاختي شكلها بنتي فاتحه شاليه داخل بطني ومتحضره للصيف هههه
المهم بعد ما فتحت الكيس قالت روحي اتمشي حوالين المستشفى واكلي زين لحتى يكون عندك قوه وقت الولاده واشربي سوائل,, رحنا اني واختي نتمشى وزوجي رح يجيب اكل وبقيت اتمشى قريب الساعتين والطلق كان ساعه يجي قوي وساعه عادي بعدين صار خفيف واجه زوجي واكلنا وشربنا بعدين قلتلهم خلوني اروح اسئلها اذا اقدر ارجع البيت لان ما احس في ولاده,, رحت سئلت القابله قالت تسئل الدكتور وقالهه الدكتور اوكي خلوها ترجع البيت بس ترجع بكره يعني يوم الاحد الصبح الساعه 8 ونص لان ممنوع تتاخر ولادتي اكثر من 24 ساعه بعد نزول ماي الجنين,, اني بهل وقت اتكئبت وحسيت بعد وقت طويل بعدين حسيت البيبي حركته خفت كثير قلت للقابله قالت تعالي نشوف النبض ونتمطن قبل ما تروحي للبيت,, وقالت يمكن قاعد البيبي يجمع طاقه للولاده ههههه
والحمد لله النبض كان تمام ولله الحمد ورجعت لبيت اهلي عالساعه 5 العصر و تيتي تيتي مثل ما رحتي مثل ما جيتي بس رجعنا تعبانين وبس نريد ننام,, كل واحد نام بمكان من التعب ونمت حوالي الساعه ونص
صحيت من النوم تعبانه بس عندي وجع خفيف يروح ويجي وبقيت على هل حال لحد ما صارت الساعه سبعه المغرب بعدين بلش طلق كل 10 دقايق بس كان محتمل وبعدين صار كل 7 دقايق اتصلت على قسم الولاده قالوا بس يصير كل 5 دقايق رجعي اتصلي,, نزلت للصاله قعدت مع اهلي وسوتلي اختي دارسين وبس شربت الدارسين زاد الوجع ورجعت سوتلي كوب ثاني وزاد الوجع اكثر وصار كل 6 دقايق رجعت كلمت قسم الولاده قالوا تعالي لبست عالسريع وسلمت على اهلي وابوي حضني وامي تدعي من قلبها ساعتها حسيت احساس غريب وطلع اخوي الكبير وصلني للسياره وصار يقولي صيري قويه ولا تخافي... توكلنا على الله وقعدت بالسياره واختي الكبيره قاعده يمي وصار الوجع يقوه واحاول امسك نفسي بس دموعي تنزل من الوجع وصرت ادعي لخواتي من تجمع شهر ابريل ولكل حامل ولكل محرومه,, زوجي يشوفني بالمرايه ويسرع واختي تقله لا تسرع ما بيها شي هذا طلق خفيف واني اشوف اختي واريد اخنقها لان الوجع ذابحني وهي تقول وجع خفيف هههههه بس هي كانت تحاول تهدئ زوجي لحتى ما يسرع وفجأه حسيت طريق المستشفى الي كنت اقول قريب صار كانه بعد سنه وما يخلص ولما وصلنا طرت على قسم الولاده واستقبلتني القابله الي كانت متابعه فتره حملي وفرحت لما شفتها لانها كانت توصيني شنو اسوي وقت الولاده وضحكت لما شافتني لان كان عندي موعد عندها يوم الاثنين,, فحصتني قالت مفتوحه 3 ونص واني اتحطمت قلت من الصبح لليل وبعدني 3 المهم قالت رح ندخلك غرفة الولاده ولاول مره بحياتي ادخل هل غرفه الي ياما سمعت عنها وكان الضوه خافت فيها لان كان الوقت نص الليل ولبسوني لبس الولاده وصارت تكتب على الكمبيوتر وتسولف معاي ومعا زوجي واختي واني احس الوجع يقوه ويرجع يخف بس كنت اقدر اتحمله بعدين صرت اسمع وحده تصرخ بالغرفه الي جنب غرفتي وارتعبت صرت اقول للقابله صوتها يخوف ليش تصرخ وهي صارت تهديني وقالت اني رح اروح لان عندي حالة ولاده ورح تتابع معاكي قابله ثانيه واجت القابله الثانيه وكانت عسوله وطيوبه كثيييير وشغلت الراديو موسيقى خفيفه لحتى ما اسمع صوت الي جنبي واني اقول لزوجي اريد اسمع قران ما اريد موسيقى وزوجي يقولي من وين اشغلك قران هههههههه وبقيت على هل حال لحد ما صارت الساعه 2 ونص بالليل رجعت فحصتني قالت صرتي 5 سانتي بس رح احطلك طلق صناعي لان طلوقك خفيف ورح تتاخري اني بس سمعت طلق صناعي صرت ارجف واقولها يعني اقوى من هل طلق اصير اصرخ مثل الي جنبي قالت لا مو شرط قلتلها اريد ابرة الظهر قالت اوكي بس خلينا ننتظر ساعه,, بهل ساعه صرت احس الطلق سريع وره بعض بس كنت اتحمله يعني كل ماتجي الطلقه اسوي شهيق زفير وخلاص تروح بس صرت ارجع كل ربع ساعه تقريبا وارجع بس ماي ساعه لونه اصفر ساعه اخضر ساعه ازرق وزوجي يقول لاختي هي شنو شاربه هههههه.. بعدين القابله حكتلي عن سائل لتنظيف الامعاء قلتلها اني اصلا بطني فاضيه قالت بس انصحك تاخذيه وفعلا اخذته وريحني شوي
بعد الساعه ركبتلي طلق صناعي كنت اريد اقولها تفحصني قبل ما تركب الطلق الصناعي بس اجتني طلقه وسكتت سبحان الله وبعد ما اخذت الطلق الصناعي ب5 دقايق اجه الي يخدر وانطاني ابرة الظهر وبعد 15 دقيقه تقريبا اختفى اللالم وبطلت احس بشي بهل وقت قالت القابله خليني افحصك اشوف اذا صار جديد ولما فحصتني صارت تضحك وتصرخ واااااو انتي مفتوحه 8 سانتي ساعتها كنت رح اخنقها يعني ركبتلي الطلق الصناعي عالفاضي,,, سبحان الله طلوقي ما كان قوي بس الرحم انفتح بسرعه ومن هنا بلشت معاناتي,, بس انفتح الرحم 8 سانتي بلشت حرارتي ترتفع لدرجة اني صرت اهذي والقابله خافت وصرت اشوف ممرضات يجون ويرحون والابر ملت ايدي واختي وزوجي شكلهم حزين وبس اسئلهم يقولون لا تخافي ماكو شي بس حرارتك عاليه ونبض البيبي صار قوي واجه لعندي ابوي واخوي واختي الصغيره واشوفهم واقفين عند الباب ويبتسمون والدموع بعينهم... يا الله عنجد كانت اصعب لحضات حياتي... اني كنت اسمع كلمه وعشره لاا من شدة الحراره بعدين سمعت القابله تقول لاختي احنا كلمنا الدكتور وقال نسوي تحاليل للجنين اذا كان ضغطه مرتفع او شي رح ندخلهم غرفة العمليات بس رح نفقد واحد منهم يا الام يا الجنين,, اني سمعتها بس فكرت حالي احلم بعدين فتحت عيوني شفت الدموع بعيون اختي وزوجي وكل شوي واحد منهم يدخل الحمام ويطلع عيونه حمر وسمعت زوجي يقول لاختي رايح اصلي الفجر وادعي انو ربي ينجيهم اني هنا قلت سلمت امري لرب العالمين الي كاتبه رح يصير... عالساعه 4 الفجر كان الرحم مفتوح 10 سانتي وكنت جاهزه للولاده بس ما يقدرون يولدوني لان نبض الجنين كان بعده مرتفع وكل شوي يجون ممرضات والقابله تقولي سوي بوش قوي وكنت افكر اني رح اولد لما اسئلها كانت تحضني وتقولي لا تخافي ماكو شي بس تحاليل وكانت تقولي شفت شعر البيبي لونه اسود وكثير وتحاول تفرحني,,, الي صار انهم كانو يخاذون دم من راس بنتي بس ما كانوا يخبروني لحتى ما اخاف ويأثر هل شي على ولادتي وبقيت على هل حال لحد ما صارت الساعه 6 الفجر واني كل شوي اشوف الساعه واقول يارب سهلي وكنت اريد اولد قبل الساعه 8 لان اختي الصغيره كان موعد سفرها بهل وقت ومرت الساعات ببطئ وبلش مفعول المخدر يروح والقابله قالت انو دوامها خلص ورح تجي وحده ثانيه تستلم عنها واالمفاجئه كانت انو القابله الجديده كانت نفسها الي فحصتني يوم الخميس وقالت اتمنى تولدين يوم الاحد,, سبحان الله كتبلي ولادتي يوم الاحد تكون على ايدها اول شي سوته زودت جرعة الطلق الصناعي وخفضت درجة التخدير ونيمتني على بطني مثل السجود وصارت تقولي اسوي بووووش وكنت اضل على هل حال شي نص ساعه بعدين ترجعني على ظهري وبعدين ترجع توقفني وتخليني اسوي بوش وصارت تفحصني كل شوي.. طبعا الالم ذبحني غير الحراره الي هدت حيلي بعدين قالت انو لازم ننتظر البيبي ينزل بالحوض قلتلها البيبي نازل من شهر الثامن قالت صح نازل بس مو بالحوض باقي 2 سانتي ويكون بالحوض,,, والوقت يمر وانا على نفس الحال صرت ابكي اقولها انتي تضحكين علي قالت ليش قلتلها كل شوي تقولين 2 سانتي وماكو شي وصارت تهدئني وتقولي ما ضل شي رح تولدي وعالساعه 10 الصبح صار الدفع قوي وصرت احس اريد اسوي بووش وقفتني على رجليني وصرت اقولها رح ينزل حاسه شي رح ينزل مني قالت لا تخافي اني اديني تحتك وجاهزين نستقبل البيبي بعدين قلتلها ما اقدر اريد ارجع انام على ظهري وبسرعه ساعدني زوجي وصعدت على سرير الولاده مره ثانيه وصار الدفع اقوى وصرت ادفع واصرخ ولاول مره اصرخ من بداية ولادتي,,, اختي صارت تقولي ادفعي طلع الراس واني طبعا بعالم ثاني بعدين القابله صارت تقول لزوجي احضن راسها وزوجي المسكين يرجف من الخوف وهي تصرخ تقوله احضنها بنتك رح تجي لازم تساعد زوجتك وحضني بقوه وسويت بوووووش واغمى علي بعد لحضات فتحت عيوني لقيت بنتي على صدري.. باخر بوش طلعت بنتي حبيبتي واجت للدنيا الساعه 10 و 32 دقيقه ... كنت مرعوبه وفرحانه واضحك وابكي بنفس الوقت بس بنتي كانت ساكته ولونها كان اسود صرت اقلهم ليش ما تبكي والقابله تقولي لا تخافي لا تخافي وفجئه لقيت دكتور داخل واخذ بنتي مني وصار يحطلها اوكسجين والقابله تقولي ركزي اخر بوش لحتى تنزل المشيمه وفعلا سويت بوش صغير وطلع شي مني بعدين اخذوا بنتي وبقيت مع القابله تفحصني وتشوف اذا اكو جرح او احتاج خياط وصار ينزل علي دم كثير وكل ما تضغط على بطني احس كانها تدخل سكين ما تحملت الوجع راحت نادت ممرضه ركبتي ابر صينيه بجبيني واذني واختفى الالم سبحان الله وفحصتني منغير ما احس بشي وبس خلصت الفحص شالوا الابر عني بعدين خلوني ارتاح وقالتلي القابله بعد شوي رح اجي وتحاولين تدخلين الحمام لحتى اتاكد انو كلشي اوكي وبعدين تقدرين ترحين تشوفي بنتك,, زوجي راح عند بنتي قسم الاطفال وكل شوي يجي يطمني عنها وهو طاير من الفرح وصرنا نحمد رب العالمين انو احنه الثنين طلعنا سالمين
وجابولي ريوق وقالت الممرضه لازم اشرب سوائل قد ما اقدر لان ينزل علي دم كثير,, بعد شي ثلث ساعه اجتني القابله وجابتلي ملف خاص لبنتي وعن التحاليل الي لازم تسويها بالمستقبل والتطعيم وكل شي وتصورت مع القابله واعتذرت منها اذا قلت شي منغير قصد وقت الولاده وصارت تضحك قالت اني الي اعتذر اذا قسيت عليكي شوي بس كان لازم هل شي لحتى اسرع ولادتك... بعدين رحت شفت بنتي لقيتها منغير ملابس والابر ماليه ايدها ويشربوها حليب من خشمها حزنت كثير بعدين قالت الممرضه انهم رح يسون تحليل دم الي ولبنتي ويشوفون سبب ارتفاع الحراره,, بالليل رحت عالحمام لقيت الدكتوره طالعه من غرفة الاطفال قالتلي انو نتيجة التحليل وصلت وطلع عندي بكتريه وهل شي وصل لبنتي وهذا كان سبب ارتفاع حرارتي وسبب البكتريه هو تاخر ولادتي بعد نزول الماي وممكن يكون السبب الفحص ونزول الدم.. كان لازم نبقى بالمستشفى نتعالج وبقينا اني وبنتي بالمستشفى كنت كل يوم ابكي وادعي,, وكل يوم اسئلهم يقولون يمكن العلاج يطول وكنت ادخل اطمن على خواتي من تجمع شهر ابريل وكانت سوالفهم تخفف وحدتي بالمستشفى وكنت انام الليل ودموعي على خدي من معاملة الممرضات,, كانوا قاسين وما يقبلون زوجي يبقى عندي وكل وحده فيهم تجي تتفلسف براسي بشي,, حتى زيارة اهلي انحرمت منها وزوجي تعب كثير,,, وبعد اسبوع ربي استجاب دعائي وقرر الدكتور انو نقدر نطلع والحمد لله رب العالمين طلعت واجيت بيت اهلي وخلصت قصة ولادتي وبلشت حياتي معا بنتي زهراء

واخير حبيت انصحكم خواتي لحتى ما يصير بيكم مثلي اذا نزل ماي الجنين وكان الرحم مفتوح لا تطلعوا من المستشفى لان جدا سهل يصير التهاب وتدخل بكتريا لجسم الام والجنين

دعواتكم انو ربي يحفظلي بنتي وزوجي وربي يرزق كل محرومه يارب

في حفظ الله