صديقتي و قلة ادبها معنا

السلام عليكم بنات

انا ما احب اتكلم عن مشاكلي واجد..بس هذي المشكلة صارت مزعجة بحيث مو قادرة افكر بحل..و قلت خلاص ما لي الا بنات عروس يعينوني بحل او اقتراح

انا عندي رفيجتين مقربات حييييل ما شاء الله و الحمدلله...كثر ما احنا مع بعض حتى الناس يسمونا الثلاثي...و اذا وحدة فينا ما فيه..بيسألون وينها فيه لاننا دااائما مع بعض...حابة بس اعطيكم نبذة بسيطة عن علاقتي برفيجاتي...

المهم...

وحده من هالرفيجتين خل نسميها (ش)...فضاضتها و قلة ادبها مع الغير صايرين شي مزعج و مستفز وااااااااجد

انا من اول ما تعرفت عليها في ناس قالوا لي بتتعبين معها..قلت من اي ناحية..قالوا الايام بتوريج...انا وقتها ما خليت الكلام فبالي..لاني ما احب احكم على حد قبل ما اعاشره...

فالبداية ككككلللل شي كان اوكي...انا و هي و صديقتي الثانية..نروح للمسجد مع بعض و نحضر دروس و حلقات الحمدلله...و هي تحب تصلي بالمسجد و تحب تتعلم عن الدين و تحاول تحسن من نفسها (او كما كان يبدو لي و لرفيجتي الثانية خل نسميها س)...و فبعض الاحيان كانت تتصرف تصرفات تصدمني..لانها بقمة قلة الذوق و الفضاضة...لكن كنت اقول سبحان الله يمكن هي مضغوطة او شي من جذي تطلع عنها هذي الحركات غصب

لكن اللي صار انها بالفترة الاخيرة صارت حييييييييل تزودها و تتصرف بشكل دائم بأسلوب مو حلو اببببدددااا...بالذااااات لبنت صايمة مصلية...المفروض تعرف اخلاق الدين...

يعني بعطيكم امثلة...

مثلا...لو امها او ابوها كلموها...بترفع صوتها عليهم جدام الناس...او اذا سألوها سؤال عااااادي...تكلمهم بدونية و احتقار..بحيث اللي حواليهم ينحرجون بقوووة...

رفيجتي (س) معها بكلاس يدرسون فيه لغة...قالت لي يا فلانة انا افتشلت اكبر فشلة ذاك اليوم...المعلمة حقنا كثر ما انزعجت من قلة ادب (ش) مع امها بنص الحصة قالت لها...احترمي امج و خليها فحالها.....لانها تعلق على كل شي امها تقوله او تسويه بالاسلوب اللي ذكرته...و انا و (س)...متربين تربية شدييييدة بخصوص احترام اللي اكبر مننا...يعني و الله لو انا اتجرأ و ارفع صوتي على امي او ابوي بالذات جدام الناس...بيفرون راسي بكف حتى لو انا عمري 25 سنة!!!!!..ما ادري هي شلون تسوي جذي

او مثلا...(س)...هي اللي تربي بنت اخوها..لسبب خاص شوي...و البنت عمرها 14 سنة...و مثل العسل على القلب..حبووووووبة واااااجد و مؤدبة حييييلللل..صح عندها تصرفات طفولية شوي...بس هي بالنهاية مراهقة يعني معذورة...و عندها صديقة عمرها 15...مثلها تقريبا..و اثنينهم يحبون يقعدون معنا..و احنا ما نمانع هذا الشي..لان احسن لهم يقعدون معنا مو مع ناس ما نعرف لهم...المهم...(ش) حاطة دووووووووووبها من دوب هالبنتين...تصارخ عليهم...و تستحقرهم بالكلام...و تهزئهم تهزيء يفطر القلب...كم مرة بعد ما تروح اضطر اسأل البنات اذا كل شي اوكي...و اخلق لها اعذار و اعتذر لهم عنها...لانهم بعمر حسااااس....و البنت اللي عمرها 14 شايفة اشياء بحياتها مرة...يعني وضعها دقيق شوي!!!...وصل الحد انه البنت اللي عمرها 15 سنة قايلة للي عمرها 14...انا اخاف لما (ش) تدش المكان اللي انا فيه..احس حتى انفاسي بتحاسب عليها معها..لو اني اقدر ما اشوفها اببببببد بحاول احقق هالشي..و صديقتي (س) لما عرفت هالشي كلمتها و هدتها شوي

و عندها اخت من امها...و الله تكلمها كأن عمرها 5 سنين!!!..رغم انها 7 سنين اكبر منها و متزوجة و عندها بنت...اذا تكلمت تقعد (ش) تطنز عليها و تسفلها انوااااااع التسفيل...و المسكينة اختها تسكت ما ترد لانها طيوبة حيييييييل...و انا امووووووووت قهر عليها بس اخاف اتدخل لان هي نفسها ساكتة و ما تقول شي

و مرة قالت لي كلام ما معناه اني منافقة و مغتابة للناس بس لاني نبهتها على موقف قللت احترامها فيه نحوي انا بالذات...و مرة قالت لصديقتي (س) انت جذابة..جدام مجموعة ناس و صديقتي كانت شوي و بتموت قهر...و دائما تتكلم عن بلدي و اهل بلدي...توصفهم بالجهل و التخلف...و اذا احد سوى شي مو من الايتيكيت و الخ...تقول له يع تلبس او تاكل او تشرب او تتكلم مثل ال........ (و تذكر جنسية ديرتي)..و تطنز على لهجة ديرتي لما اكلم اهلي او اكلم عرب...و اذا احد يقول سالفة صار له فيها موقف بايخ او سيئ مع حد فوووورا تقول اي اكييييد كنت تكلم او تتعامل مع ....... و تذكر جنسية بلدي..ما ادري ليش!!!!..و تسوي هالشي جدااااااامي..يعني كللللش ما تفكر شنو وقع الكلام هذا علي...و انا مو من النوع اللي يبيع وطنيات او احب وطني بعمى..حتى لا تقولون اني اتحسس مثلا..بهالموضوع انا حقااااانية...اذكر الزين و الشين و الله شاهد علي..لاني اعتز بأسلامي و عروبتي قبل كل شي...بس انقهههرررر لما تقول مثل هالكلام لان مهما كان بلدي فيه شر..بعد فيه خير...لا بل الشيخ اللي يدرسنا دين من ديرتي!!!..فما ادري ليش هي شايفة نفسها من هالناحية

و الحين طالعة لنا بموضة جديدة...اذا تزعل من شي..حتى اذا احنا ما لنا دخل فيه...اطنشنا...يعني كلللللللش...حتى اذا احنا جنبها و نكلمها ما ترد علينا...و تعطينا طاااااااف اذا اتصلنا فيها او راسلناها بالفون او الايميل او الفيس بوك...و عادة ما يكون هالشي للضرورة لان مثل ما ذكرت احنا نحضر حلقات و دروس دين مع بعض فنضطر نسأل بعض عن الهوموورك و جذي...و صايرة اذا حد سوى شي او زل..تقعد تستغفر و تقول لا حول و لا قوة الا بالله..بطريقة مذلة...يعني لو هي تقولها لانها تبي تذكر ربها و تكظم الغيظ او تذكرنا احنا بربنا...و الله اني بقول جزاها الله الفردوس...لكن انها تقولها بتعالي و اذلال...و فوقها تقعد تتفلسف بالدين...و هي يا دووووووووووووووووووووووووووووووووب حفضت 9 احاديث بس و عندها درس اسبوعي تتعلم فيه *رؤوس اقلام* من الشريعة (انا معها بنفس الدرس يعني اعرف بالضبط شنو تدرس)...فتخيلوا بس...هذا غير الوعض اللي يجينا...و انا و الله ما اقول هالكلام حتى انزه نفسي او حتى غيري...بس سبحان الله...اللي يدرس الدين يشوف شكثر هو مقصصصر و يصير يتحذر يوعض الآخرين قبل ما يصلح نفسه حتى لا ينحسب الشي هذا ضده امام الله...لكن هي ما شاء الله...توعض وعض كأنها معمرة من زمن الصحابة...و هالشي بالذات بدا ينرفزني بقوووووووووووووووووووووة

هذا غير الانانية الواااااااااضحة بتصرفاتها...يعني بحيث لو تعرف احد احتاج شي و هي تعرف من وين يقدر يحصله..ما تقول لووووو شنو يصير...حتى لو تكرر الطلب الوووواضح لهالشي...بكل فضاضة تقول "ما لكم دخل"...و اذا تعرف بشي يفيد حد..تروح تاخذه او تسويه و ما تقول لحد و نعرف بعد ما يفوت الاوان او ما يبقى شي يسوى...عكس لما هي تحتاج شي او تبي شي بيفيدها...بتقعد تتصل و تراسل و تسأل و تحقق الييييييييييييين تحصله...يعني حتى لو تصدعنا بعد عااااادي...المهم تحصل اللي تبيه..

و في غيره و غيره و غيره من امور...من ضمنها تبين لي انها مصلحجية بعد..لانها ما تكلمني الا اذا محتاجة شي..غيره ما تعطيني اهمية خير شر

و على فكرة هي مو صغيرة...عمرها 20 سنة و تدرس بالجامعة...يعني اببببددداااا لا هي صغيرة و لا هي جاهلة الحمدلله!!!

الحين بتفكرون ما حاولنا معاها...و الله حاولنا...حاولنا..ندخل اختها تكلمها..اختها رفضت..قالت ماااااااا لي دخل...لسانها طويل و ما ابيها تقول لي كلام يقهرني..و الحين حتى اختها هذي علاقتها معها مش و لا بد و السبة لسان و قلة ادب (ش)...و بما انه رفيجتنا (س) تعطي الحلقة الاسبوعية للحريم...كلمتها و عطت عدة حلقات عن الاخلاق و معاملة الام و الاب..و يوم ما شفت نتيجة..طلبت منها تكلم زوجها و تقول له هو بعد يعطي كم حلقة بالمسجد عن هالمواضيع...و فعلا صار..و نفس الشي ما في تحسن...و بالدرس الاسبوعي..اسأل الشيخ اسألة من باب "الكلام لك و اسمعي يا جارة"...لان هالنمط من النصح يجوز شرعا...و بعد و لاااااا في فايدة...رغم ان الشيخ بحكم اللي ندرسه لاااااااا بد و يتكلم عن الاداب و المعاملة...بس بعد ما في اييي تغير...هذا عدى التنبيهات المباشرة لها..بالذات بخصوص الوالدين و البنوتين اللي ذكرتهم...لان سنهم حرج و لازم نعاملهم بطيب حتى يتقربون مننا و يرتاحون معنا...و و لا شي تغير..اما امها و ابوها...ما فكرنا ندخلهم اصصصلا...لان ندري عاااااااااااادي تمسح فيهم الارض اذا تكلموا بكلمة!!!

و انا قبل كم يوم اقترحت على (س) اننا نقعد مع (ش) و نكلمها بصراااااااااحة عن تصرفاتها و ما نمشي الا و احنا ماخذين منها وعد تحسن نفسها...بس (س) حسيتها انرعبت من الفكرة..لان عااااااااااادي (ش) تقلب السالفة علينا و تطلعنا احنا المذنبين و المنافقين...و يجوز بعد تقول علينا مرتدين او شي...فقلت خلاص...ماااااااا لي الا ادش هني و اكتب السالفة و اشوف شنو ممكن نسويه معها..و شلون ممكن اتصرف معها لاني حتى بلحظة زعل فكرت انهي علاقتي فيها تمااااااما

و اعتذر على الاطالة...بس حبيت انكم تفهمون الموضوع بدقة حتى تعطوني الحلول المناسبة

و جزاكم الله كل خير على مساعدتكم مقدما حبيباتي