_+_ متضايقة من وضعي في بيت عمي ساعدوني _+_

مريمتي;14997210:

هلااااا اختي هذي وايد ناس اتمر فيها تقبل اول وبعدين تتأسف

الحين ما لج الا انج تقنعين زوجج لو يبني لج مطبخ حتى لووووو مؤقت وريحي بالج

واختي اتوقع انتي عندي بالايميل بس مدري ناسيه انا او لا ؟؟

اتمنى لج التوفيق

um issa;14997238:

سلام حبيبتي ..

- اول شي قبل كلشي حطي في بالش إنش لازم تتحملين هالشيء لانش قبلتين عليه من البدايه ومثل ما قالو المفروض ماتقبلين لان الشي اذا تأجل الواحد يتماطى فيه بس هالكلام منتهي صلاحيته الحين حاولي تتحملين قد ماتقدرين مرده هاليوم بيصير ذكرى تذكرينه في المستقبل، وبعدين حاولي تكسبين بيت عمش سولفي وياهم وصيري عاديه مع حبتين خجل يعني لاتطيحينها كلش و مره سوي لهم طبخه مره سوي حلاوه تقربي منهم بس لاتزيدين التقرّب يعني خلي في حدود بعد صيري وياهم مثل بنتهم والله بتكسبينهم وبتصيرين سمن على عسل، حتى حق عقب ما تسوين مطبخ وتتباعدين خلي علاقتش تكون طيبه وياهم لان سعادة أهل زوجش من سعادته.

- ثاني شي كلمي زوجش وحتى لو ماعنده حالياً عشان يبني على طول ذكريه عشان يحط في باله ان لازم يعجل على الموضوع وماينساه حتى لو سكتين عنه، ولا تبينين ليه ان انتين مستاءه من الوضع مع اهله او مع امه، قوليه ان بروحي أريّح واحسن جذي ما كأني قاعده في بيتي طول الوقت لابسه أي وقت يمكن احد يدخل و و و .. طلعي اسباب ما تمس اهله.

- بالنسبه لعمتش تحسين انش تثقلين عليها، لاتدخلين تطبخين مدام اهي تطبخ داخل، بس سوي اشياء بدون ماتدخلين في الي تطبخه مثلا سوي سلطه سوي عصير وهالاشياء واهم شي اذا طلعتون تشترون اغراض ولاشي تشترون لهم شي تدخلينه المطبخ حتى لو كنتون تعطونهم مبلغ، وعشان تكسبينها اشتري لها هدايا بين الفتره والثانيه قوليها حصلت هالشي قلت بيعجبش جفت هذا يناسبش .. إلخ.

- وعندي نقطه بالنسبه لأختش سوري بس اهي قد ما قالت هالكلام لانها تحبش بس المفروض ماتقوله، لان الي فيش مو ناقصش ولو عندش حل جان سويتينه وماخليتين روحش، يعني لازم تهدأش وتحسسش ان الشي فتره بس وبيروح مو طول عمرش بتقعدين مع بيت عمش، ان شاء الله بتسوين لش بيت مو بس مطبخ.

- وآخر بوينت، أكبر خطأ اكثر البنات يسوونه ان لما ينخطبون او يتزوجون يقطعون علاقاتهم بكل شي ويغيرون حياتهم 180 درجه، ليش؟ انتي مو كان عندش فراغ عاطفي في ايام كنتي عزباء خلاص هالفراغ انملى بخطيبش او زوجش، شدخل الناس والاصدقاء والمعارف؟
نصيحه مني لش كوني علاقات جديده او ردي علاقاتش مع ربعش، اطلعي معاهم ونسي روحش وانسي الهم ياعمري ترى الحياه مو دايمه، اشتركي في نادي رياضه اذا كنتي سمينه عشان اتضعفين واذا كنتي ضعيفه عشان تمتنين طبعاً في تمارين للنوعين، سوي لش برامج كورسات دراسات، اذا دارسه حاولي تدورين شغل وتشتغلين ترى يسلي وايد.

الله يوفقش يارب ويسعدش :)

حنين للماضي;14997281:
انتي تقولين عندج غرفتين يعني بإمكانش الغرفة الثانية تسوينها بالنص وتحطين ليش فرن وثلاجة صغيرة وكان الله غفوراً رحيما
اما عن الفراغ كلنا في الهوى سوى
اني بعد من تخرجت تزوجت والحين ماعندي شيء بس الحمدلله رب العالمين ربي رزقني بطفل اتسلى معاه واقضي وقت فراغي معاه
ربي يسر امورش ولاتكبرين الموضوع وشيلي كلام اختش من بالش اهم شيء سعادتش مع زوجش والسعادة الزوجية انتي اللي تخلقينها بنفسش وبتصرفاتش واذا كله نكدتي على عمرش وحطيتي سالفة هالمطبخ في بالش على طول بجوفين حياتش راح تتحول لحزن بسبب تضخمش للامور