مساء الخير لكل الصبايا
اليوم عملت ايس كريم كيك لأول مرة وطلع بجنن فحبيت اشاركم فيه خاصة انو كتير سهل .
المقادير;;;;
بكيت خليط كيك شوكولا جاهز
علبة ايس كريم بنكهة الفراولة
علبة ايس كريم بنكهة الشوكولا
علبة كراميل صوص
علبة ويب كريم
اول شي بنجهز الكيك متل مو مكتوب على البكيت.
بتحطو الكيك مكس بالصينية وبنخبزوا والصينية نفسها رح نرجع نستعملها اغسلوها ونشفوها وخلوها على جنب.
هلأ بعد ما بردت الكيكة بنطلع الآيس كريم من الفريزر وبنغلف الصينية بالنايلون بعدين بنقسم الكيكه قسمين بنحط اول طبقة كيك بالصينية فوق البلاستيك وبنشربو بصوص الكراميل بعدين طبقة ايس كريم الفراولة وبنشربهم كراميل صوص بعدين الطبقة التانية من الكيك ونشربها كراميل صوص واخر شي ايس كريم الشوكولا وبنلفها منيح بالبلاستيك وبندخكها الفريزر لمدة لا تقل عن ٤ الى ٦ ساعات.
بعد مرور شي ٤ او ٥ ساعات بنطلع الصينية من الفريزر وبنحطها في صحن التقديم وبنغطيها بالويبينغ كريم والكراميل او اي زينة بدك اياها.
بنرجعها على الفريزر كمان ساعتين وبعدين استمتعي بالطعم.
انا اخدت تلات ارباعها لبيت صاحبتي وخليت ربعها النا انا وزوجي لانو الكمية كبيرة.
لازم تقدميها على طول مشان ما تسيح بس الطعم كان خيييييالي.
بليز ذكر المصدر عند النقل لأني تعبت في الموضوع وما تنسو تقيموني.صحة وهنا.