أنا مجروحة كتير شو أعمل

مرحبا
أنا خاطبة صرلي سنة وشهر وعرسي المفروض بشهر 9 الجاي
خطيبي كان يحبني من قبل 6 سنين لما كنت بالمدرسة
بس ما حكينا مع بعض ولا كنت أعرف وهو ابن جيرانا بس ما عمري حسيت هاد الشي
قبل سنة وشهر إجا حكى لبابا إنه طلعله عقد عمل بالسعودية (نحنا بالأردن) وإنه بحبني من زمان ومراقبني وبعرف كل شي عن حياتي بس ما قرب علي لأنه بده ياني اكون مرته واعيش معه العمر كله واذا بابا ما قبل هو ما رح يوقع العقد عشان يضل بالاردن يشوفني

بابا وكل عيلتي قدروا هاد الشب كتير لأنه محترم وقعد سنين وهو يراقبني بدون ما يجرب يحكي معي
ولأنه بحبني بجد وهاد شي نادر هالأيام
وأنا كمان حبيته بس عرفت القصة وهو وسيم وحباب ومحترم وعيلته ناس طيبين

هلأ انا كتير متعلقه فيه فوق ما بتتخيلوا،، بعزه أكتر من حالي
أنا المفروض أخلص جامعة قبل فصل بس ما زبط معي وما حكيت لأهلي لأنه ماما بتروح بتحكي لكل العالم وما بدي حد يعرف
وهو كان بالاردن لما صار هيك بإجازة يعني فلما رجع على سعودية خفت احكيله ويحكيلي بتخبي علي
خبيت عليه بس ما قدرت أنام ولا ليله وضليت أدعي ربنا يحلها
قبل يومين صار يحكيلي انه حاسس اني مخبية عليه إشي فقلتله آه بس خايفة أحكيلك
حكالي إلك الأمان ووعد ما بصير إشي وما بعمل إشي وحط إيده على شواربه
حسيت بالأمان وحكيتله وحكيتله ليه خبيت عليه
قاطعني يومين ومبارح إجا يحكيلي إنه خلص ما بده ياني ما بده يعيش مع وحده كزبت عليه
ضليت أترجاه واعتزله واحكيله طب فرصة،، مو مشاني مشان الحلم اللي بنيناه مشان أهلك مشان أهلي
المهم ضليت ارن عليه واترجاه وعالنت اترجاه بالاخر حكالي إني لأني قلتله انه ابن اصول وهو هيك رح يعطيني هالفرصة واقسم يمين إذا بحياتي بغلط غلطة لو بينا مييييت ولد إلا يسيبني

خلصت القصة بس انا هلأ كتير مجروحة رجع يحكي معي متل زمان بس ما بقدر اسدق حبه خلص
مرة حكالي لو بتجيبي سكين بتقتليني فيه ما بتركك وعلى أول مفترق طرق سابني
لسه الحياه قدامنا ما حد ما بيغلط عم بيستنى مني غلط يتركني

كتير قلبي مجروح من مبارح وانا ببكي
واوقات بحكي يا ريتني تركته يروح شو بدي بواحد رح يسيبني عند اول غلطة؟؟؟

أمانة احكولي شو اعمل؟؟؟