بصوا انا مش عايزة حاجه غير انى اتكلم و بس و حد يدينى راى او حل

السلام عليكم و رحمه الله و بركاته
اولا انا فعلا مشتركه فى المنتدى من فترة طويله و حصلت لى مشكله انا مش قدرة اشيلها او اتحملها فعملت الاكونت دة بصراحه علشان اعرف اتكلم و علشان اسمع ارائكم يمكن تلاقولى حل
انا واحدة شايله حمل على قلبى و نفسي افضفض
هبتدى الحكايه من الاول انا عندى دلوقتى 31 سنه لما كان عندى 19 سنه والدى خسر كل حاجه بشغله و كنت مضايقه اوى من الخانقه بتاعت قله الفلوس و انا كنت واخدة بالى اوى من نفسي خادتنى واحدة صحبتى و اشتغلنا شغل مش كويس ابتدت بجمله منها و انا من عبطى صدقتها ان الرجاله هبل ممكن تاخدى منهم اللى انتى عايزاه من غير ما تديهم حاجه دة كان غلط طبعا المهم فضلنا كدة فترة و كمان كان اللى ماسكين المكان دة بياخدوا مننا شيكات على بياض علشان يضمنوا حاجتين اولا اننا مش هنسيبهم ثانيا مش نبلغ عنهم
المهم انا سيبتهم لما حسيت ايه القرف دة ايه اللى بعمله دة يعنى بخاف من بابا و ماما و انزل بمليون حجه و مش خايفه من اللى شايفنى على طول و مش عارفه استخبه منه سبت الناس دى خالص الحمد لله و الشكر لله و اتبدل حالى تماما كنت بصلى لربنا ليل و نهار و ابتديت اروح احفظ القران و ابتديت كمان اقوم الليل بصراحه عملت الحاجات دى بالتدريج علشان مش ارجع فيها و كنت بحلم احلام و اشوف رؤى ( جمع روؤيه ) و الله الناس كانت تحسدنى عليها و رحت للشيخ طنطاوى الله يرحمه و كان فعلا مبسوط بيه وقعد يقولى ادعيلى لان دعوة التائب لا ترد و قالى يا بختك انتى عندك حسنات اكتر منى الله تبارك وتعالى بقول إِلَّا مَنْ تَابَ وَآمَنَ وَعَمِلَ عَمَلاً صَالِحاً فَأُولَئِكَ يُبَدِّلُ اللَّهُ سَيِّئَاتِهِمْ حَسَنَاتٍ
و اتجوزت من 7 سنين زوج صالح و رائع و عندى بنت وولد وللعلم انا سالت مليون شيخ عن انى اقول لزوجى الحاجات دى ولا لا بالاجماع قالولى لا و من 3 سنين اترفعت عليا قضيه من الناس دى بالشيكات اللى معاهم و الحمد لله استلفت الفلوس من اصدقائى طبعا دول اصدقاء تانين و محترمين و سددت قيمه الشيكات الحمد لله و القضيه خلصت و ابتديت اسدد لاصدقائي جزء فى جزء انا دلوقتى بقى هموت هموت و الله من الخوف و القلق اولا انا اصحابى بعد الثورة و الازمه الاقتصاديه دى كلهم كلمونى علشان الفلوس و الله لو ناس متفقه مع بعضها مش هيكون بنفس الترتيب دة واحدة الصبح وواحدة الظهر و التانيه بالليل الى عايزة تسافر لبنتها الكويت و التانيه عايزة تدفع فلوس مدرسه بنتها و اللى مش عارفه ايه عارفين اناا بقيت ببص للتليفون و اعيط مستنيه مين تانى هيتكلم و يعملى مصيبه تانى و طبعا لازم افصل علشان جوزى مش يعرف حاجه فتلاقينى الصبح منتهى الاكتئاب و اول ما جوزى يجى احاول على قد ما اقدر ادارى و هو بقى حاسس و بيسالنى طبعا كتير مالك؟ في ايه؟ و ليه اصحابك بيكلموكى كتير اوى كدة . كمان واحدة فيهم تقولى لو مش عارفه تتصرفى قولى لجوزك و لو خايفه منه انا اقوله
انا تعبت بجد بجد تعبت مش عارفه اكيد ربنا ليه حكمه بس يا ترى الحكمه دى ان جوزى يعرف ولا ايه انا مش عارفه ؟ حولت كتير احل الموضوع و لفيت كتير جدا لحد ما تعبت و كان نفسي افضفض و اتكلم علشان انا خلاص هطق و ازيح دة من على قلبى
اللهم انى توكلت عليك وسلمت امرى اليك لا ملجا ولا منجى منك الا اليك . ربى اشرح لى صدرى ويسر لى امرى واحلل عقدة من لسانى يفقهو قولى
انا مش عايزة اى حاجه غير انكو تدعولى ربنا يفك كربى وييسر امرى و حبيت اقول للناس تتعظ من ان الحرام بياخد الحلال فى طريقه
و السلام عليكم و رحمه الله