السلام عليكم ,,
أخباركم يا بنات عروس البنوتات و العرايس والحوامل "امهات المستقبل"
اليوم بنزل لكم الجزء الثاني من ايام عرسي , ونزلت من "تقرير مصور عن حنتي" وكانت الليلة الأولى واليوم بنزل لكم الليلة الثانية اللي هي "الجلوة" , وهي عبارة عن موروث إنشهر اكثر شي في البحرين , هي ليلة تراثية تدخل فيها العروس وهي متغطية وتقعد على كرسي او مسرح بسيط وتكون هناك وحدة تغني عليها 7 اغاني شعبية تراثية مثل "أمينة في أمانيها مليحة في معانيها" وكل اغنية يلبسون العروس "مشمر" رادء لون غير ويكونون من الالوان الزاهية مثل الوان ثوب النشل لين ما يصيرون 7 الوان , وتلتم حوالينها البنات العزابيات والاهل والاصدقاء والكل يصفق ويردد وراء اللي تغني صراحة من احلى ليالي العرس ..
وقبل ما أبتدي الصور , شـكر خاص لوالدتي العزيزة ,, اللي جهزت سفرة جلوتي والستار اللي ورا , يدويا بنفسها شهرين متكاملين وهي تشتغل عليهم فعلا تعبت على كل قطعة من السفرة , وانا استعرض أجزاء من صور السفرة دمعت عيني , وهذا اقل شي اني اشكرها وانا افيد كل بنت تستعرض تقرير , واتمنى من كل بنت تشوف التقرير ما تبخل علي بردها وتقييمها لي :oF:
نجي لتفاصيل هذا اليوم ,,
قعدت الضحى على الساعة 11 , وقشرت الحنة وخذت شاور بس ما غسلت شعري لانه كانت مستشور حلو وقلت بخليه مرة وحدة للتسريحة عشان اخلص بسرعة, والحنة كنت مسويتها في بيت يدتي في الرفاع , يدتي الله يطول بعمرها كان خاطرها ابات عندها قبل لا أعرس "خاصة إني اول حفيدة من الطرفين أتزوج" F:
صليت الظهر , وبعدها ودتني خالتي بيتنا عشان آخذ فستان الجلوة والذهب والتوابع, ومن الخسبقة خذت صندل العرس بدل صندل الجلوة واللونين طبعا مختلفين واحد ذهبي وواحد فضي , بس يالله عدت وبعدها رجعت الرفاع تغديت
كنت حاجزة الميكب عند شريفة فولاذ عالساعة 5 العصر , وطبعا هالانسانة ما يحتاج اقولكم اشكثر ذوق وطيبة , وكانت ياية وحدة شكلها عروس مع امها تبي تشوف الميكب وسئلتها هاي مكياج عروس قالت لها لا مكياج سهرة بس البنت عروس, طلعتني قمر بشهادة الجميع وعلى قولتها القالب غالب :lol::o
وعالساعة 7 كانت موعدي عند فوزية للشعر فديتها حبوبة وروحها مفرفشة دوووم , وشعر كان وااااايد حلو ومناسب الجلوة وما شاء الله عليها سريعة وحطت لي اكسسوار من عندها وما حسبته علي , و يوم ثاني طرشت لي مسج تتطمن علي , وهي اللي سوت شعر خالتي وامي في زواجي والميكب كان شريفة وطلعوا رووعة وراقيين
عالساعة 8 كنت في البيت , لبست وتعطرت وتبخرت وقرت خالتي علي المعوذات , واتصلوا لنا عالساعة 9 عشان أروح الصالة , وأنا سويت جلوتي في قاعة عايشة المؤيد
ذكــــــــــــــــروا الله و صلـــــــــــــــــوا عالنبي محمد
وطبــعا ما أحلل بتــاتا انه اي وحدة تنقل اي صورة أو تسيفها عندها
والآن اتـــــــــــــــــــــرككم مع الصور وان شاء تعجبكم ..
هذي صورة السفرة و هي تتكون من 9طاولات مع الستار اللي ورا بس خسارة الصورة مب موضحة كل الطاولات , السفرة بصراحة كانت واااايد كبيرة وكان الكل منبهر فيها
وهذي أجزاء من السفرة , وأمي الله يحفظها هي موزعتها بنفسها وحتى ترتيب التوزيعات والفواكه والمكسرات
وهذي أجزاء من السفرة اللي فيها التوزيعات وهي عبارة عن مخدة مخمل مع شرايط وتور وداخلها بخور الدوائر الكبار من اجمل , وطبعا امي هي اللي سوت لي الثيم وودت القماش للخياط عشان المخاد اما الباقي كله هي سوتهم بالبيت وعبتهم بعدين بالبخور " لاحظوا التفاصيل"
وهذي انا أول ما دخلت :) , كنت حدي متخسبقة :o , لاحظوا الصندوق اللي يمي المزين وداخله المشموم , هاي بعد أمي فديتها مزينته
وهني اول ما كانوا بيبتدون فيني الجلوة وخالتي فديتها كانت تفصخني الصندل "عزكم الله" عشان احط ريلي في الماي ورد وكان بارد :D
وهني وهم يغنون علي , وهاذي صورة حنتي بعد ما صبغت وماشاء الله انا من النوع ما تصبغ فيني الحنة وكنت خايفة لكن الصورة تشهد وانا الليلة اللي قبلها بس كنت متحنية
وبعد الجلوة قعدت أصور , وهاي صورة لفستاني من الأمام
وهاي من الخلف لانه فيه ذيل ومثل ما أنتو ملاحظين انه موديل "الفش كت"
وطبعا آخر شي بعد التصوير دخل زوجي عشان يسوون لنا "واتريمبو واليومي" :)
