احس بالنقص

احس روحي انسانه ما ليها قيمه في المجتمع انسانه تافهه ما عندي اسلوب ما عندي اهداف في حياتي ولو عندي اهداف ما قاعده تتحقق حتى اسلوبي مع الناس ماعندي واسلوبي عادي وكلامي بسيط والثقة في نفسي معدومه اني عمري 22 سنه ومتزوجه اذا اقول عمري استحي احس روحي اصغر من عمري بتصرفاتي يعني لو اصير مع ناس اظل ساكته وبس اتبسم لاني اذا ما ابتسم ابين وكاني امعصبه ومتضايقه واني فعلا يبين عليي اذا كنت امعصبه وشيء مو عاجبني من شكلي, اتزوجت واني عمري 19 سنه وبعد الزواج قال ليي زوجي اول ما شافني كنت اتبسم اليه واني المفروض استحي وقال يبين عليي ناقصة عقل يعني هذا صار في المقابله واني احس بهذا الشيء لا اراديا اسوي حركات ما احس عندي توازن او اتزان احس روحي ناقصه وغير عن البنات اللي في سني البنات ارزن مني الثقة معدومه عندي ولا اعرف ارد على الناس واجادلهم حتى لو كانوا هم الغلطانين واعرف هالشيء بعد اسكت لاني ما اعرف ارد عليهم يعني اني في بيت عمي ( اهل زوجي) دايما يجرحوني واني اسكت ويتلفظون بارذى الالفاظ واني ما اقدر ارد عليهم واخاف ارد في الحقيقه وقالوا ليي اني ناقصه وسببوا ليي مشاكل وقلبوا السالفه عليي كله بسبب سكوتي ولا اعرف ادافع عن نفسي رحت الجامعة وطلعت ولا كملت دراستي الجامعيه وابويي دايما يقول ليي اني فاشله حتى قدام زوجي وصار زوجي يقول ليي انتين فاشله , وانا عندي اختي اكبر مني استشيرها في اموري واحس روحي مو قادرة ادير حياتي بنفسي وكنت اتمنى ادير حياتي بنفسي واتصير عندي خصوصيه لكن ما اقدر حتى زوجي دايما تصير مشاكل معاه ويتركني ويروح الى اهله ما اقدر اسايرة واكسبه احس زوجي مو مرتاح معاي ويمكن في المستقبل يتزوج عليي واللحين هو مسافر عني وانا اقول لو كنت انسانه قويه ما تركني زوجي وسافر ولا استغنى عني اني تعبانه نفسيا وامبي انقذ روحي لكن شسوي يمكن اللي مثلي المفروض ما يتزوجون لانهم مو كاملين وساعات اقول بيني وبين نفسي زوجي ما ينلام اذا قصر معاي لاني استحق اللي يصير لي , اني ما اقدر ادير المنزل ولا اكتم اسرار زوجي واسراري وهذي مشكله اقول اسراري للكل حاولت اقرا كتب لكني ما اطبقها . ارجوكي ساعديني