حل الخطوبة قبل الفرح بإسبوعين ؟

أنا مش لاقية حد أكلمه وأقوله عي اللي حاسة بيه غير ربنا ، وربنا ساعدني إني ألاقي القسم ده عشان حد يديني حل للي أنا بعاني منه دلوقتي.

أنا كنت إتعرفت علي شاب في أول سنة في الجامعة وارتبطت به عاطفياً، وحبيته قوي ووقفت جنبه كتير في كل المشاكل المادية والمعنوية اللي كان بيقابلها واحنا بندرس، وتخرجنا و جالي اتقدملي وطلب إيدي من بابا ، علي الرغم إني مكنتش محمسة إنه يجيلي ويدخل البيت وهو لسه ما اخدش الشهادة ولا عنده شغل، بس جالي ساعتها عشان كان خايف أضيع منه وحد يخدني منه.

وفعلاً اتخطبنا ، وكانت ظروفه المادية سيئة الي حد ما، فوقفت جنبه وخليته يحوش عشان نعرف نتجوز وكنت بحافظ علي فلوسه علي قد ماقدر لدرجة إن في البداية أما جيه اتفق مع بابا علي شبكة ، قلت لبابا أنا مش عايزة شبكة كفاية عليا دبلة ومحبس بس و أي فلوس تانية إحنا أولي بيها لبيتنا إن شاء الله.

مرت سنتين علي خطوبتنا ولكن يوم عن يوم بتزيد الضغوط عليه، في الأول كنت بواسيه علي أد مقدر بس أما الفترة طولت إكتشفت فيه عيوب مكنتش واخدة بالي منها ، وهو كمان بقي يصارحني بعيوب مش قادر يستحملها فيا طوال ال 6 سنوات ، من ضمنها إنه عايزني أتحجب وأسيب الشغل وأغير من نفسي عشان أخليه يرضي عني وانه شايف انه جيه علي نفسه كتير عشان احققله حاجة زي الحجاب وانا مكنش عملالها اعتبار لأني كنت شايفة ان دي حاجة بيني وبين ربنا ، بس أما وصل الموضوع لحد الأهل وانه جيه إشتكي لبابا وقاله يا عمي مشكلتي مع شيماء إني طالب منها طلب ومش راضية تعملهولي ومش مقتنعة إن ليا الحق أني أمرها بيه وهو إنها تلبس الحجاب ، وساعتها كانت مشكلة كبيرة في البيت لدرجة انه قال لبابا ساعتها ، انا عايز شيماء توعدني دلوقتي أدامكم إنها تلبسه بعد الجواز يا كده يا كل واحد فينا يروح لحاله ، وبابا ساعتها سأله : في حاجة تانية يا احمد مش عاجباك في شيماء عايزها تغيرها؟؟؟؟؟؟؟ قاله لأ يا عمي شيماء زي الفل هو ده الطلب الوحيد اللي أنا عاوزه منها .

ساعتها بعدنا عن بعض فترة وقعدت أفكر مع نفسي وأفكر في ال6سنين اللي ما بينا وقلت انا مش هضيع العلاقة اللي ما بيني وبين أحمد عشان عنادي وتعنتي ، ولو ده اللي هيخلينا مع بعض مفيش مشكلة .
وفعلاً كلمته وقلتله يا أحمد أنا مستعدة إني أتحجب بعد الجواز لو دي الحاجة اللي مش هتخلينا نسيب بعض، ووعدني إنه هيتغير معايا ويرجع يعاملني كويس زي الأول علي أساس ان الفترة دي كان كلها مشاكل ما بينا بسبب موضوع زي ده.

لكن اللي حصل عكس كده، أحمد معاملته إزدادت سوء بعد قراري ده وإسلوبه معايا إتغير ولمل كنت بقوله طب إيه سبب المشاكل دلوقتي ، يقولي : أنا مضغوط والظروف مأثرة عليا لدرجة ان كل ما يشوفني يتعصب ويتنرفز عليا بسبب وبدون سبب .

ويوم ورا يوم والعلاقة بينا بتزداد سوء ، وهو يكشف عن وجه تاني ، ويقولي كلام عمري ما توقعت إنه يقولهولي في يوم من الأيام ، ويقولي اني عمري ما وقفت جنبه ولا حسسته باللي بيعمله عشاني ، كل ده عشان كنت بقوله إن يا أحمد أي حد بيبقي عايز يتجوز بيشقي ويتعب في الاول بعد كده بيرتاح ، كنت الاقيه يثور عليا ويقولي انا مهما عملت عشانك عمرك ما هتحسي بيا وبتنتهي أي مشكلة إن احنا نسيب بعض كام يون مانكلمش بعضز

الفترة دي عملت حادثة عربية ودخلت المستشفي وجالي إرتجاج في المخ ، وقعدت في المستشفي فترة ، كان ما بيجيليش فيهم كتير وكان يقولي انه مشغول ومضغوط في الشغل كنت دايماً أقوله أنا محتجاك جمبي يا أحمد الفترة دي لأني حاسة إني تعبانة ، وهو كان شايف ان شغله اهم من اي حاجة الفترة دي عشان هو اللي يخلينا نتجوز بسرعة

بعد الحادثة انا اتغيرت معاه غصب عني ، بعد اما حسيت انه ما وقفش جمبي ، بس الأيام عدت وعرفت تنسيني بعد ما كنت عايزة أسيبه ومقتنعة تماماً ان كل واحد فينا مش للتاني، بس هو عرف إزاي يقنعني ان احنا ما ينفعش نعيش بعيد عن بعض ، ورجعتله بعد ما وعدني إنه يتغير معايا ويحاول يرضيني واني انا كمان اتغير واصبر عليه شوية، وفعلاً حاولنا نعمل كده بس اللي حصل ان حصلت مشاكل تاني وكل مشكلة كانت بتحصل كان بيجي يحكيها لأخويا الكبير ويشتكيله مني ، وعشان عارف ان أخويا هيغلطني سواء صح ولا غلط عشان ده طبع فيه ناحيتنا كلنا (أنا وإخواتي البنات كلهم)

لحد ما جيه يشتكيله في يوم وأخويا قعدت يشحنه من ناحيتي لحد ما خلي أحمد يقول أنا مش هكمل مع شيماء وفعلاً جاب باباه تاني يوم ، وأخويا ساعتها قعد يقول لأحمد وباباه جواز الحب ما بيدومش، وجواز الصالونات هو اللي بينجح، بالرغم إن حماياه كان جاي يهدي الموضوع ، وده يقوله شيماء كلمتها ماشية علي البيت كله وهي مش هتنفعك وبكرة تعرف ست ستها وتجوز واحدة أحسن منها و متدينة عنها وهي اللي خسرانة، ومشيوا بعد ما سمعوا كلام أخويا اللي مكفهوش كل اللي عملوا ، لأ كمان راح يسهر عندهم في البيت لحد الساعة 3 الفجر.

أنا قعدت يومين ما بنامش وراسي مكان الحادثة ورمت، وقررت في يوم إني أروح لأحمد البيت وأعتذرله وأخليه نبتدي صفحة جديدة ، وكنت فاكرة ان حركة زي دي هيقدرهالي اني روحتله لحد عنده بعد الأمور ما وصلت للي إحنا فيه ، بس ولا أكني عملا حاجة ، قعدت يقولي ربنا يسعدك مع واحد أحسن مني وانتي ما تستهلنيش