زوجي فوضوي .. و ايده سخيه بزيااااااده

السلام عليكم و رحمة الله و بركاته


الحمد لله الله رزقني زوج ما اعتقد بلقى مثله
متفقين و الحمد لله و عندنا بنوته صغيره


تتلخص مشكلتي مع زوجي في شغلتين:

الاولى : زوجي مرتب و يسبح كل يوم و انيق و يختار ملابسه و اشيائه بتمعن
لكن عافس شقتنا عفاس و الي يشوف العفسه يقول عندي 10 اطفال مو بنوته وحده

يعني عمره ما حط شي مكانه و لما يفصخ ثيابه مستحيل يحطهم على الشماعه
لما يسبح مستحيل يرجع اغراض الحمام مكانهم
لما ياكل في المطبخ او غرفة الجلوس احس ان بنتي هي الي ماكله مو ابوها
يمكن غلطتي اني دلعته ايام الخطوبة و ايام بداية الزواج كنت شايلته شيل ما اخليه يسوي اي شي كل شي اسويه عنه
بس الحين الوضع تغير انا توظفت و عندي بنت ما اقدر و شغلي دوامين
ما اتحمل شي اضافي
و لما اقول له حبيبي اكل بطريقه شوي ارتب احسه يتضايق و يقول حق بنته بمزح امج ما تخليني اكل على راحتي لازم تنغص علي
مع ان لما نزور ناس او نروح مطعم ياكل بشكل مرتب و اتمنى ان يتصرف نفس التصرف لما نكون في شقتنا
و ملاحظه عليه ما يحب ياكل كثير في بيت اهلي احس ان يصير عليه قيود وما ياخذ راحته في طريقة اكله
للعلم هو ما يطلع صوت لما ياكل و لا يلعوز ثيابه بس يعفس الطاولة او السجاد اذا كان ياكل على الارض
تعبت وانا امشي وراه شغلتي اشيل الي يرميه على الارض و انظف
و مالي قلب كل ما اشوفه ياكل اسمعه اسطوانت تعليمات والله صرت استحي واحس ان بيغص مني:)


مشكلتي الثانيه : الحمد لله زوجي يشتغل وانا اشتغل و مدخولنا ممتاز
لكن زوجي ايده سخيه بزياده يعني يصرف 20 دينار كانه صارف 5 دينار
و يحب يوزع فلوس بداعي و بدون داعي
وانا هالكه نفسي على تامين مستقبلنا و ادخر و كل مره احقق شي من طموحنا
و هو ما يفكر شلون يسوي مثلي و يدخر
احنا ساكنيين في ايجار لازم يساعدني حتى نقدر نشتري ارض او بيت
مو لحالي شايله الهم
هو يبغي يسوي شي بس ما يعرف يدخر و من يشوف احد يحسه محتاج مباشر يعطيه بدون ما يساله اذا محتاج او لا
انا ما انهاه عن فعل الخير بس بعد لازم يفكر في مستقبلنا و حالة الايجار الي ساكنينها
وبعد جهد قدرت احصل حل وسط
فتحت حساب ثاني حق زوجي و رحت معاه البنك و خلينا البنك يسحب من راتبه مبلغ كل شهر ويخليه في الحساب الثاني للادخار و خليت بطاقة البنك عندي حتى ما يسحب منهم شي
بس نفس الازمه صرت ما اقدر ادخر مثل قبل ما راتبي لان المتبقي من راتبه بعد خصم الادخار بسرعه يخلصه و نضطر نكمل بقية الشهر و مصاريفنا من راتبي يعني ما سوينا شي
يعجبني فيه حبه للمساعده بس احاتي اولادي ابغي يكون عنده سكن باسم ابوهم حتى ما يضيعون ما عندهم سكن
مثل ابو زوجي ضيع اولاده و كلهم ساكنيين في شقق ايجار



للعلم هذي ازماتي مع زوجي من 3 سنوات من بداية زواجنا

هو يحبني و مرتاحه معاه لولا هالشغلتين الي منكدين علي حياتي :(